Pahonoraa i ta outou mau uiraa

◼ Eaha te tia ia tatou ia ara maitai, ia farerei anaˈe te hoê taeae i te hoê vahine, aore ra te hoê tuahine i te hoê tane, i roto i te pororaa, aore ra ia poro anaˈe te hoê taeae na muri iho i te hoê tuahine?

Ua papu maitai ia tatou e te hinaaro nei to tatou mau taeae e mau tuahine e pee i te hoê haerea tei au i te mau ture morare teitei roa ˈˈe. Teie râ hoi, te ora nei tatou i roto i te hoê ao viivii o te faatia nei i te mau mea atoa e mea varavara roa to ˈna mau otia morare. No reira, noa ˈtu e e manaˈo maitai roa to tatou, e tia ia tatou ia vai ara noa ia ore tatou ia faatupu i te tahi faainoraa aore ra ia rave i te tahi ohipa tia ore. E parau mau iho â râ te reira i roto i te tuhaa no te pororaa.

I roto i te pororaa, te farerei pinepine nei tatou i te mau tane aore ra i te mau vahine, o te anaanatae nei i te parau mau, e ia hiˈohia e aau rotahi to ratou. Mai te peu e, e taeae tatou e te poro ra tatou o tatou anaˈe, e e farerei atu tatou i te hoê vahine o ˈna anaˈe i to ˈna fare, e mea maitai aˈe ia paraparau noa ia ˈna i te pae opani, eiaha râ ia tomo atu i roto i to ˈna fare. Mai te peu e te anaanatae ra o ˈna, e rave ïa tatou i te mau faanahoraa no te hoˈi mai na muri iho i te tahi atu taata poro, aore ra i te hoê taime te vai ra te tahi atu mau taata i te fare. E mai te peu e eita e nehenehe, e haerea paari aˈe e vaiiho e na te hoê tuahine e hoˈi atu e farerei i teie vahine. Hoê â huru mai te peu e e farerei te hoê tuahine i te hoê tane i roto i te pororaa. E tano atoa teie mau aˈoraa no te mau haapiiraa Bibilia, mai te peu e te haapii ra te hoê taeae i te hoê vahine, aore ra te hoê tuahine i te hoê tane.—Mat. 10:16.

E tia atoa ia ara maitai ia maiti anaˈe tatou i te hoê hoa no te pororaa. Noa ˈtu e e nehenehe te hoê tane taata poro e te hoê vahine taata poro e faanaho ia raua ia poro raua i te tahi mau taime, e mea maitai aˈe ia apiti atu raua i roto i te hoê pǔpǔ. I te rahiraa o te mau tupuraa, e ere i te haerea paari ia haere pinepine te hoê tane e te hoê vahine o raua anaˈe mai te peu e aita raua i faaipoipohia, noa ˈtu e tei roto raua i te taviniraa. No reira, e tia i te taeae na ˈna e faanaho i te pǔpǔ ia haapao maitai ia tono apipiti anaˈe oia i te feia poro, e tae noa ˈtu i te mau taurearea.

Ia haapao maite noa tatou i teie mau tuhaa, ‘aore ïa tatou e tuu i te turoriraa’ ia tatou iho nei aore ra ia vetahi ê.—Kor. 2, 6:3.