Te porotarama o te tairururaa haaati i mua nei
1 Teie te upoo parau o te mau tairururaa haaati apî, e haamata i te avaˈe Setepa, “E tamata anaˈe i te oaoaraa ia horoa.” (Ohi. 20:35) Te faataahia ra te oaoaraa mai “te vai-maitai-raa e te mauruururaa.” I teie mahana, te tapapa nei te rahiraa o te taata i te mau peu faanavenave atoa o teie oraraa, e mea pinepine, e morohi oioi noa teie faanavenaveraa. E ere râ te reira te oaoaraa mau. Area râ, te haapii maira Iehova nafea tatou ia fanaˈo i te mau haamaitairaa mure ore. (Isa. 48:17; Ioa. 1, 2:17) E haamatara te tairururaa haaati i mua nei e nafea tatou ia tamata i te oaoaraa rahi atu â, na roto i te horoaraa i te pae varua.
2 E tuatapapahia vetahi mau ravea ohie ia faaohipa no te rohi i roto i te taviniraa. Teie te tahi mau upoo parau o te mau oreroraa parau e vauvauhia mai e te mau tiaau ratere: “E faahoa anaˈe i te mau taoˈa tia ore,” “E faatura anaˈe i te faanahoraa a te Atua no te mau ‘ǒ taata’” e “E tamata anaˈe i te mau tuhaa huru rau o te oaoaraa mau.” Te feia e hinaaro ra e bapetizo i taua tairururaa ra, a haere atu ïa e farerei i te tiaau-peretiteni, e na ˈna e rave i te mau faanahoraa ia tuatapapa te mau matahiapo i te mau uiraa no te bapetizoraa e o ratou. E riro te taviniraa ia Iehova ma te atuatu i te mau taairaa viivii ore e o ˈna, ei tumu oaoaraa rahi no te feia bapetizo apî.
3 E horoa atoa mai te fariiraa ma te tia i te mana o Iehova, i te oaoaraa mau e te vai-maitai-raa. E tia i te mau taata atoa ia ite. No reira te oreroraa parau huiraatira o te tairururaa e vauvau ai i te upoo parau ra “A tahoê atu i te nunaa oaoa o te Atua.” Ia titau manihini tatou i te feia atoa e anaanatae ra i te parau mau ia haere mai e faaroo i teie oreroraa parau. I raro aˈe i te faatereraa a te taata, i roto i teie ao tei raro aˈe i te mana o Satani, aita ratou i fanaˈo i te vai-maitai-raa mau aore ra te oaoaraa e vai maoro. (Koh. 8:9) Auê râ ratou i te oaoa e, ahiri e e tahoê mai ratou i te nunaa oaoa o Iehova!—Sal. 144:15b.
4 Noa ˈtu te mau huru tupuraa e ino noa ˈtura i roto i teie faanahoraa o te mau mea, eita roa te feia e tamata ra i te oaoaraa ia horoa i te pae varua, e tatarahapa ia tiaturi ratou i te Atua oaoa. (Tim. 1, 1:11) E haapapu mai te porotarama o te tairururaa haaati i mua nei i te reira. Eiaha ïa e mairi!