Te hinaaro-rahi-hia nei te mau taeae pionie
1 Te faaue ra Paulo ia tatou “ia rahi â te rave i te ohipa a te Fatu.” (Kor. 1, 15:58) No e rave rahi, te auraa ra, e rave ïa i te taviniraa pionie.
2 I teie nei, e mau tuahine te rahiraa o te mau pionie o ta tatou tuhaa fenua. (Sal. 68:11) Auê te oaoa no te amuiraa e, ahiri e mea rahi aˈe te mau taeae o te nehenehe e rave i te taviniraa ma te taime taatoa! (Sal. 110:3) Parau mau, e rave rahi mau taeae, e tia ia ratou ia amo i te mau hopoia rahi i te pae no te ohipa e te utuafare. Te tutava atoa nei te tahi pae no te haapao i te mau hinaaro i te pae varua o te amuiraa. E tia ia tatou ia haamauruuru i teie mau taeae e rohi nei no te Basileia.—Tim. 1, 4:10.
3 Teie râ, e nehenehe anei ta te mau taeae hau atu â e rave i te taviniraa pionie? Mai te peu e e pionie ta outou vahine, e nehenehe atoa anei outou e apiti atu ia ˈna? Mai te peu e ua tatuhaahia outou, aita anei outou e manaˈo ra e, aita ˈtu ravea maitai aˈe no te faaohipa i to outou taime, maoti râ te raveraa i te taviniraa ma te taime taatoa? Mai te peu e te faaoti ra outou i ta outou tau haapiiraa, ua feruri hohonu anei outou, e ma te pure, i te raveraa i te taviniraa pionie, ravea o te riro hoi ei taahiraa avae matamua e fanaˈo atu ai i te mau hopoia no te taviniraa rahi atu â?—Eph. 5:15-17.
4 Ua hoo te hoê taeae i ta ˈna pu raveraa ohipa mea tere maitai hoi, e ua rave oia i te hoê ohipa afa taime no te riro ei pionie. Ma te pee i to ˈna hiˈoraa, ua riro mai e toru o ta ˈna e maha tamarii ei mau pionie i te otiraa iho â ta ratou tau haapiiraa. Ua hinaaro oioi hoi te tamarii hopea e apiti atu ia ratou. Ua haamaitai-rahi-hia teie taeae e to ˈna utuafare.
5 Te matara nei te hoê opani rahi: E nehenehe te taviniraa pionie e iriti i te hoê “opani rahi” e aratai tia ˈtu i te ohipa. (Kor. 1, 16:9) E nehenehe te mau taeae pionie e faaohipa-rahi-hia i roto i te amuiraa. Auaa ta ratou ohipa itoito i roto i te pororaa e paari ai ratou i te pae varua e e haere ai ratou i mua i roto i te ohipa teotaratia. E nehenehe te taviniraa pionie e iriti i te eˈa ia noaa mai te mau hopoia taviniraa rahi atu â. Ia hope ta ˈna matahiti matamua, e fanaˈo te pionie i te oaoaraa e haere atu i te Haapiiraa pionie. E nehenehe te mau tavini tauturu e te mau matahiapo taa noa e opua e haere i te Haapiiraa faaineineraa no te taviniraa. E nehenehe te feia faaipoipohia e faaî ra i te mau titauraa, e ani ia haere i te Haapiiraa no Gileada. I te roaraa o te tau, e nehenehe te mau taeae e aravihihia no te taviniraa ratere. Oia, te iriti nei te taviniraa pionie i te opani ia noaa teie mau hopoia taviniraa rahi atu â i roto i te faanahonahoraa a Iehova.
6 E fanaˈo te mau taeae o te faanaho ia ratou no te riro mai ei pionie tamau, i te oaoaraa rahi e noaa mai ia horoa hua tatou.—Ohi. 20:35.