E haaparare anaˈe i te ite e aratai i te ora mure ore
1 O Iehova ‘Tei haapii i te taata nei i te ite.’ (Sal. 94:10) Te faaohipa nei o ˈna ia tatou no te haaparare i te ite no nia ia ˈna—ite o te faaora i te mau taata—i te feia aita i ite e nafea ia tavini ia ˈna mai ta ˈna e hinaaro. E buka faahiahia roa Te ite e aratai i te ora mure ore, no te haafanaˈo i te feia aau rotahi i te maramarama papu o te Atua maoti ta ˈna Parau papaihia, te Bibilia. (Tim. 1, 2:3, 4) E tauturu te huru faataaraa taa maitai e te maramarama a te buka ra Te ite i te parau mau, i te mau taata ia taa eaha ta Iehova e haapii maira ia ratou. I teie avaˈe, te hinaaro nei tatou e haamata i te mau aparauraa o te turai i te mau taata ia hiaai e taio i te buka. Teie vetahi mau ravea. Eiaha e tamata i te tamau aau, e tutava râ tatou i te faahiti i te mau manaˈo faufaa na roto i ta tatou iho mau parau e te huru ohie.
2 E nehenehe tatou e faahiti i te tiaturiraa o te tia-faahou-raa ia paraparau tatou i te rahiraa o te mau taata e ua pohe te hoê taata herehia e ratou, ei hiˈoraa:
◼ “I rotopu i te rahiraa o tatou, ua pohe te hoê taata herehia e tatou. Mai te peu e o oe atoa, aita anei oe i uiui aˈenei e e farerei faahou anei oe ia ˈna? [A tiai i te pahonoraa.] I te omuaraa, aita te Atua i opua noa ˈˈe e ia pohe te taata. Ua haapapu mai Iesu e e nehenehe te feia herehia e tatou e faatiamâhia mai i te pohe. [A taio i te Ioane 11:11, 25, 44.] Noa ˈtu e mau senekele i teie nei, e faaiteraa teie no nia i ta te Atua i tǎpǔ i te rave no tatou. [A hohora i te buka Te ite i te api 85 e a taio i te pereota i papaihia i nia aˈe i te hohoˈa. A faataa i muri iho i te hohoˈa i te api 86.] Mai te peu e te hinaaro ra oe e ite hau atu â no nia i te tiaturiraa tamahanahana o te tia-faahou-raa, e oaoa ïa vau i te vaiiho mai i teie buka.”
3 I muri aˈe i ta tatou aparauraa matamua no nia i te tiaturiraa o te tia-faahou-raa, teie ïa te tahi atu ravea no te haamata i te piti o ta tatou aparauraa i taua noâ taata ra:
◼ “Te haamanaˈo ra paha oe, ua parau atu vau ia oe e aita te Atua i opua noa ˈˈe e ia pohe te taata. Mai te peu e e parau mau, no te aha ïa tatou e ruau ai e e pohe ai? Te ora nei hoi vetahi mau honu hau atu i te 100 matahiti, e vetahi mau tumu raau e rave rahi tausani matahiti. No te aha ïa te mau taata e ora ˈi e 70 aore ra e 80 noa matahiti? [A vaiiho i te taata ia pahono.] Te pohe nei tatou no te mea ua faaroo ore te tane e te vahine matamua i te Atua.” A taio i te Roma 5:12. A hohora i te buka Te ite i te api 53 e a taio i te upoo parau o te pene. A hiˈopoa i na paratarapha matamua e toru ma te faaite i te mau pahonoraa o te mau uiraa i neneihia. A faanaho i te hoê taime farereiraa no te tauaparau no nia i te toea o te pene. A tiai noa ˈi, a faaitoito i te taata ia faahope i te taioraa.
4 Mai te peu e e paraparau tatou i te hoê taata faaroo, e nehenehe ïa tatou e parau atu e:
◼ “Te vai ra i teie mahana fatata tau hanere haapaoraa taa ê. Te haapii nei ratou i te mau huru tiaturiraa atoa e patoi ra i te tahi e te tahi. Te parau nei vetahi mau taata e mea maitai te mau haapaoraa atoa, e ere i te mea faufaa roa ta tatou tiaturiraa. Eaha to oe manaˈo? [A faaroo i te pahonoraa.] Ua haapii Iesu i te haapaoraa mau e ua faaite o ˈna e eita te Atua e farii i te tahi atu mau huru haamoriraa. [A taio i te Mataio 7:21-23.] Mai te peu e te hinaaro ra tatou e faaoaoa i te Atua, e tia ïa ia tatou ia haamori ia ˈna ia au i to ˈna hinaaro.” A hohora i te buka Te ite i te pene 5, a taio i te upoo parau e a huti i te ara-maite-raa i nia i te tahi mau upoo parau iti. A faataa e e tauturu teie mau api i te taata taio ia haapii e nafea ia faaoaoa i te Atua. A pûpû i te buka mai te peu e te hinaaro ra te taata e taio.
5 I te piti o to tatou tere, e mauruuru paha te feia tei ore e taa faahou no te rahi-roa-raa o te mau haapaoraa i te pahonoraa o teie uiraa:
◼ “I rotopu i te mau haapaoraa atoa i teie mahana, nafea tatou e nehenehe ai e ite i te haapaoraa mau? Nafea ïa outou ia maiti? [A tiai i te pahonoraa.] Ua parau mai Iesu e nafea e itehia ˈi ta ˈna mau pǐpǐ mau.” A taio i te Ioane 13:35. A hiˈo i roto i te buka Te ite te mau paratarapha 18 e 19 o te pene 5. A faaite atu e e nehenehe te mau taata atoa, ma te faaohipa i te mau faaueraa tumu faufaa a te Bibilia e ma te faaore i te tahi i muri aˈe i te tahi, e ite i te haapaoraa mau. A faataa e ua matauhia te mau Ite no Iehova ati aˈe te ao nei no to ratou here mau e ta ratou mau ture teitei i te pae morare. A faataa e nafea te hoê haapiiraa o te Bibilia, i nia i te buka Te ite, e tauturu ai ia ite maitai i te huru haamoriraa e fariihia e te Atua.
6 Ia farerei tatou i te hoê metua tane aore ra te hoê metua vahine, e riro paha teie omuaraa parau ei mea aravihi:
◼ “Ite mau mahana atoa, te faaroo pinepine nei tatou e aita te mau taurearea e auraro ra e e au ra e aita faahou ta ratou e mau ture morare. Te faahapa nei vetahi feia paari i te faanahoraa haapiiraa, i te oreraa e haapii i te mau tamarii i te taa-ê-raa i rotopu i te maitai e te ino. I to oe manaˈoraa, na vai hoi teie hopoia? [A vaiiho i te taata ia pahono.] A tapao na i ta te Bibilia e parau ra no nia i te reira. [A taio i te Ephesia 6:4.] Na te mau metua ïa te hopoia e haapii i te mau faufaa morare i ta ratou mau tamarii.” A hohora i te buka Te ite i te api 145, a taio i te paratarapha 16 e a faataa i te mau hohoˈa i te api 147. A faaite e e tano roa teie buka ia haapiihia e te utuafare. Ma te faaohipa i te mau paratarapha 17 e 18 i te api 146, a faaite atu e nafea tatou ia faatere i teie huru haapiiraa e te mau utuafare.
7 Mai te peu e ua haamata tatou, i to tatou tere matamua, i te hoê haapiiraa e te hoê metua vahine aore ra hoê metua tane e haapeapea ra, e nehenehe ïa tatou e faahaere â i te aparauraa i mua i te tere i muri iho mai teie e:
◼ “Te tuu nei te ao i teie mahana i te mau faahemaraa atoa i mua i ta tatou mau tamarii. E mea fifi roa no ratou ia faatupu i te mǎtaˈu i te Atua a paari mai ai ratou. I te taime i mairi aˈenei, te haamanaˈo ra paha oe, ua faahiti na tâua e piti faaueraa tumu. Ei metua faaroo, e tia ia tatou ia horoa i te hiˈoraa maitai i ta tatou mau tamarii e ia faaite tamau ia ratou e te here nei tatou ia ratou. Ia au i te Bibilia, te hinaaro nei te mau tamarii e imi i te tahi atu mea i pihai iho i to ratou mau metua.” A taio i te Maseli 1:8. A hohora i te buka Te ite i te api 148 e a faahaere â i te haapiiraa i mua ma te hiˈopoa i te mau paratarapha 19-23. A ani e e hoˈi faahou mai outou no te haapii e te utuafare taatoa, ma te haamata i te pene 1.