E faatura anaˈe i ta tatou euhe i te mau mahana atoa
1 Ua turaihia te papai salamo ra o Davida ia parau atu ia Iehova e: “E tamau â vau i te himene ei haamaitai i to oe ra iˈoa; e rave â vau i ta ˈu i euhe ra i te mau mahana atoa.” (Sal. 61:8) Ua ite o Davida e, ia euhe tatou, mea na roto ïa i to tatou hinaaro taatoa. Teie râ, ua ite atoa oia e, ia euhe oia, e tia ia ˈna ia faatura i ta ˈna i tǎpǔ. Noa ˈtu râ, ua arue oia ia Iehova i to ˈna neheneheraa e faatura i ta ˈna mau euhe i te mau mahana atoa.
2 I to tatou pûpûraa ia tatou no Iehova, mea na roto i to tatou aau taatoa to tatou euheraa e rave i to ˈna hinaaro. Ua faarue tatou ia tatou iho e ua faariro tatou i te taviniraa a Iehova, ei tumu matamua o to tatou oraraa. (Luka 9:23) No reira, e tia atoa ia tatou ia faatura i ta tatou euhe i te mau mahana atoa. (Koh. 5:4-6) Te faaiteraa i mua i te taata o ta tatou i rave i te taime tatou a bapetizohia ˈi, e tia ïa ia itehia i roto i to tatou huru oraraa taatoa, inaha ua ite tatou e, “o te vaha hoi tei faˈi i te parau, e ia roaa ˈtu te ora.” (Roma 10:10) Oia atoa ïa te pororaa i te parau apî maitai. (Heb. 13:15) Mea taa ê to te tahi e to tahi huru tupuraa, tera râ, e tia ia tatou paatoa ia haamanaˈo i te mau mahana atoa, i te faufaaraa ia faaite i te parau apî maitai ia vetahi ê.
3 E imi anaˈe i te mau ravea no te poro i te mau mahana atoa: E oaoahia tatou i te faaiteraa i te parau apî maitai i te taata. Ia na reira tatou i te mau mahana atoa, e tia ia tatou ia imi i te mau ravea no te poro i te mau taime atoa e nehenehe ai. Te oaoa nei te feia e imi ra i te ravea no te poro ma te faanaho-ore-hia i te vahi raveraa ohipa, i te fare haapiiraa, i to ratou feia tapiri aore ra i te tahi atu mau taata o ta ratou e farerei nei i te mau mahana atoa. E nehenehe atoa e poro na roto i te rata aore ra te niuniu paraparau. Ia faaohipa tatou i teie mau ravea atoa e ia faaherehere tamau tatou i te taime, no te poro na te mau fare e no te hoˈi e farerei i te taata, e fanaˈo atoa paha tatou i te oaoa taa ê e noaa mai, ia faatere tatou i te hoê haapiiraa i te fare o te taata. Oia, e nehenehe e itea mai i te mau ravea no te poro i te mau mahana atoa.
4 Ua taio te hoê tuahine i te buka iti ra E hiˈopoa anaˈe i te mau Papai i te mau mahana atoa i te taime faafaaearaa. Ua ani oia i te hoê hoa rave ohipa ia taio raua i te irava mahana, e ua haamatahia ˈtura te hoê haapiiraa Bibilia e teie nei vahine. Ua haapii raua hoê afa hora i te mau mahana atoa, e pae taime i te hebedoma. Ua ite mai te tahi atu hoa rave ohipa i ta raua haapiiraa tamahana. Ua haere maira oia ia raua ra e ua na ô maira e e taeae atoa oia, aita râ oia e ohipa faahou ra. Ua putapû roa oia i te itoito o teie tuahine, e ua paraparau atu oia i te hoê matahiapo ia nehenehe oia e ohipa faahou. Auaa to ˈna hinaaro e faatura maite i ta ˈna euhe i te mau mahana atoa, e piti ïa taata ta teie tuahine i tauturu.
5 Turaihia e te hoê mafatu î i te mauruuru no te mau mea maitatai atoa ta Iehova i rave no tatou, e faatura ïa tatou i ta tatou euhe i te mau mahana atoa, ia au i te maraa ia tatou, e horoa mai hoi te reira i te oaoa e te manaˈo popou. Mai te papai salamo, e nehenehe tatou e parau e: “E haamaitai â vau ia oe, e te Fatu, e tau Atua, ma tau aau atoa ra; e faarahi tamau â vau i to oe ra iˈoa.”—Sal. 86:12.