Te mau tauaparauraa auhoa o te haaputapû te mafatu

¹ E nehenehe e faataahia te tauaparauraa mai te hoê “faaiteraa parau.” E nehenehe te tauaparauraa ma te auhoa i nia i te hoê tumu parau e anaanataehia e te taata, e huti mai i to ˈna ara-maite-raa e e tauturu ia tatou ia haaputapû to ˈna mafatu e te poroi o te Basileia. Ua itehia e mea aravihi aˈe ia tauaparau e te mau taata ma te auhoa e te mǎrû, i te horoaraa ˈtu i te hoê oreroraa parau.

² Nafea ia haamata i te hoê tauaparauraa auhoa: Te neheneheraa e tauaparau e te hoê taata, e ere ïa te auraa te hohoraraa ˈtu i te anairaa faahiahia o te mau manaˈo e te mau irava. O te haamau-noa-raa râ i te hoê aparauraa. Ei hiˈoraa, ia tauaparau anaˈe tatou e te taata tapiri, e ere ïa ma te etaeta, ma te mǎrû râ. Ma te ore e manaˈo na mua i te mea o ta tatou e parau, e pahono oioi tatou i te mau manaˈo ta ˈna i faaite mai. Mai te peu e e anaanatae mau tatou i te mea ta ˈna e parau ra, peneiaˈe e hinaaro faahou â o ˈna e tauaparau. Ia na reira atoa ïa tatou ia poro tatou.

³ E nehenehe te mau tumu parau mai te taparahiraa taata, te mau fifi o te mau taurearea, te mau uiraa e tano i te fenua, te mau huru tupuraa na te ao nei aore ra te huru o te mahana atoa, e riro ei tumu parau no te haamata i te mau tauaparauraa auhoa. E mea aravihi roa te mau tumu parau no nia roa i te oraraa o te mau taata i te mau mahana atoa no te faaara i to ratou anaanatae. I roto i te tauaparauraa, e nehenehe tatou e faaite mǎrû noa ia ˈna te poroi o te Basileia.

⁴ Te hoê tauaparauraa mǎrû, e ere ïa te auraa e aita e faufaa ia faaineine. E mea faufaa. Tera râ, aita e titauhia ra e hamani i te hoê tino parau etaeta aore ra e tamau aau i te hoê tumu parau, eita ïa ta tatou e nehenehe e faaau ohie e i te taime tano. (Hiˈo Korinetia 1, 9:20-23.) Te hoê ravea faahiahia roa ˈˈe no te faaineine, o te maitiraa ïa hoê aore ra e piti tumu parau o te Bibilia, ma te tapao e aratai i te mau tauaparauraa i nia i taua na tumu parau nei. E tauturu rahi mai te hiˈo-faahou-raa i te mau tuhaa o te buka Haaferuriraa (farani).

⁵ Mau huru maitatai faufaa no te hoê tauaparauraa auhoa: Ia tauaparau anaˈe tatou e te hoê taata, e tia ia tatou ia faaite i te mahanahana e te aau rotahi. Na te hoê mata ataata e te oaoa e tauturu ia tatou ia faaite i teie mau huru maitatai. Te afai nei tatou i te poroi maitai roa ˈˈe na te ao nei; aita ˈtu e mea anaanatae roa no te mau taata aau rotahi. Ia ite anaˈe ratou e no te hinaaro mau e faaite atu ia ratou i te hoê parau apî maitai e anaanatae ai tatou ia ratou, peneiaˈe e turaihia ratou ia faaroo mai.—Kor. 2, 2:17.

⁶ Ia riro te hoê tauaparauraa ei taime oaoa. No reira, ia faaite tatou i te maitai e te aravihi ia pûpû anaˈe tatou i te poroi o te Basileia. (Gal. 5:22; Kol. 4:6) E tutava anaˈe ia tapea mai te taata te hoê manaˈo maitai no nia ia tatou. Ia na reira tatou, noa ˈtu e aita tatou i haaputapû to ˈna mafatu i te taime matamua, peneiaˈe e farii maitai aˈe paha taua taata ra ia tauaparau atu te hoê Ite ia ˈna.

⁷ E ere na roto i te tamau-aau-raa i te hoê tumu parau fifi e haamata ˈi tatou i te mau tauaparauraa auhoa. Na roto noa râ i te faaararaa i te anaanatae o te hoê taata ma te paraparau no nia i te hoê tumu parau e tano no ˈna iho. Ia ineine anaˈe, e nehenehe ïa ta tatou e haamata i te mau tauaparauraa auhoa e te mau taata atoa. E tutava anaˈe i te haaputapû te mafatu o te mau taata ta tatou e farerei, na roto i te faaiteraa ˈtu i te parau apî maitai roa ˈˈe te nehenehe e faaroo: te mau haamaitairaa aita e hopearaa a te Basileia.—Pet. 2, 3:13.