E tauturu anaˈe i to tatou mau taata-tupu ia taa i te faufaaraa o te Bibilia
1 Ua horoa o Iesu no ta ˈna mau pǐpǐ i te mea o ta ratou e hinaaro ra. Te taio nei tatou i roto i te Luka 24:45 e: “Ua faaite maira oia i to ratou aau ia ite ratou i te parau i papaihia ra.” Ua ite o ˈna e ia fariihia mai ratou e to ˈna Metua, e tia ia ratou ia haapii e ia taa i te Parau a te Atua, te Bibilia (Sal. 1:1, 2). Teie atoa te tapao o ta tatou pororaa. Te hinaaro nei tatou e haamata i te mau haapiiraa bibilia no te ‘haapii i te mau taata ia haapao i te mau mea o ta Iesu i faaue.’ (Mat. 28:20.) Ma te tapea i te reira i roto i to tatou feruriraa, e hiˈopoa tatou i te tahi mau manaˈo o te nehenehe e haafaufaahia i roto i ta tatou mau hoˈi-faahou-raa e farerei.
2 Mai te peu e ua niuhia ta tatou tauaparauraa matamua i nia i te buka ra “Te Bibilia—Parau na te Atua aore ra na te taata?,” e nehenehe tatou e parau faahou atu:
◼ “Te hinaaro nei au e tauaparau ia oe no nia i te tahi atu manaˈo o te faaite ra i te faufaaraa ohie o te mau aˈoraa bibilia. E rave rahi mau taata o te ite ra e mea fifi roa ia vai afaro noa e o vetahi ê. Eaha ta tatou e nehenehe e rave no te haamaitai i to tatou mau taairaa e te mau taata-tupu? [E faaroo tatou i te pahonoraa, e tatara anaˈe i te buka i te api 168, § 15, e e taio i te Mataio 7:12. E faahiti tatou i te mau manaˈo o te § 16.] O te tahi atu ïa hiˈoraa o te paari o ta tatou e nehenehe e ite i roto i te mau aˈoraa bibilia. Ia hoˈi mai au, e hinaaro vau e faaite atu ia oe i te mau aˈoraa o ta te Bibilia e horoa ra no te hoê oraraa o na hoa faaipoipo oaoa aˈe.” E ani tatou e e hoˈi faahou mai tatou no te paraparau i nia i te mau api 170-2, i reira tatou e ite ai i te mau aˈoraa bibilia no te hoê oraraa utuafare oaoa.
3 Mai te peu e ua anaanatae te taata i te Bibilia, e nehenehe paha tatou e haamata i te hoê haapiiraa bibilia mai teie:
◼ “Te hinaaro nei te taatoaraa aore ra te tahi pae e ora i roto i te hoê ao hau e te ino ore. I te mea e te reira te hinaaro o te taatoaraa, no te aha ïa i rahi ai te mau arepurepuraa e te haavîraa uˈana i roto i te ao nei? [E faaroo tatou i te pahonoraa.] Te faaite ra te Traduction du monde nouveau ihea e itehia ˈi te pahonoraa o teie uiraa i roto i te Bibilia.” E tatara tatou i te api 1655 e e faaite i te tuhaa “Sujets de conversation bibliques,” n° 23a: “Auteur de la détresse mondiale.” E taio tatou i te Korinetia 2, 4:4. E faataa tatou e haamou te Atua i te Diabolo e e haamau o ˈna i te hoê ao hau e te oaoa mure ore. E taio tatou i te Apokalupo 21:3, 4. E nehenehe tatou e parau atu i muri iho: “Ia hoˈi mai au, e hinaaro vau e faaite ia oe i te tahi mau irava o te faataa ra no te aha oe e nehenehe ai e tiaturi i te hoê ao aita e fifi faahou.”
4 Mai te peu e ua horoa mai te haamata-roa-raa i te hoê haapiiraa i te mau faahopearaa maitatai, ia hoˈi faahou tatou e hiˈo i te taata e nehenehe tatou e parau e:
◼ “I te taime i mairi ua faahiti tâua i te tahi mau tumu e faaite ra e mea faufaa iho â ia haapii i te Bibilia. E roaa i te taata o te rave i te taime no te haapii i te oaoa ia ite i te mea o ta te Atua i tǎpǔ mai. [E taio tatou i te Ioane 17:3.] Ua tauturu aˈena ta matou porotarama haapiiraa bibilia tau tausani taata ia haapii hau atu â no nia i te parau tǎpǔ a te Atua e no nia i te huru tatou e faaoaoa ˈi ia ˈna.” E rave tatou i te buka ra Te ite, e hiˈopoa tatou i te mau tumu parau o te mau pene e e faaite tatou i te tereraa o te hoê haapiiraa bibilia.
5 Ma te tauturu i te mau taata aau rotahi ia ite i te faufaaraa taa ê o te Parau a te Atua, e horoa ˈtu ïa tatou i te tauturu maitai roa ˈˈe e vai nei. E riro te paari e noaa ia ratou ma te haapii atu i te reira ei “raau ora” e o te faaoaoa rahi ia ratou.—Mas. 3:18.