E mea faufaa te mau Papai no te haapii
1 E rave rahi e e rave rau manaˈo no nia i te faufaaraa o te Bibilia. No tatou nei râ, ua papu maitai ia tatou e te vai ra i roto i ta ˈna mau api te mau pahonoraa no nia i te mau fifi teimaha roa o te mau taata, e te mau faaiteraa faahiahia atoa no te aratai maitai i to tatou oraraa (Mas. 3:5, 6). Aita hoê aˈe e aifaito nei i te mau aˈoraa bibilia. Aita hoê aˈe mea e nehenehe e na nia aˈe i te mau faaueraa tumu morare o ta ˈna e horoa ra. E mea puai ta ˈna poroi, no te mea e nehenehe oia e ‘hiˈopoa i te manaˈo e te opuaraa o te aau.’ (Heb. 4:12.) Nafea ia tauturu i to tatou mau taata-tupu ia taa e e tia ia ratou ia rave i teie buka e vai noa ra i nia i te vairaa buka e ia taio tamau? E tamata anaˈe ïa, i te avaˈe novema, i te tahi o te mau manaˈo i muri nei no te pûpû atu i te Traduction du monde nouveau e te buka ra Te Bibilia—Parau na te Atua aore ra na te taata?
2 Ma te ite e te haapeapearaa o te rahiraa o te haamâharaa ïa i to ratou mau hinaaro matamua, e haamata ïa tatou na roto i teie nei mau parau:
◼ “Te parau nei e rave rahi taata o ta ˈu e farerei nei i teie mau mahana e to ratou fifi matamua o te amoraa ïa i ta ratou mau hopoia i te pae moni. E rave rahi o tei topa i roto i te haapueraa i te mau taoˈa materia, te hoê ïa tumu no te mau fifi. Ihea roa e itehia ˈi i te mau aˈoraa maitai roa ˈˈe no nia i taua tumu parau ra? [E tiai tatou i te hoê pahonoraa.] Ua ite au e te horoa nei te Bibilia i te mau aˈoraa ohie o te nehenehe e tauturu ia ape i te mau fifi faufaa ore. Teie te hoê hiˈoraa.” E tatara anaˈe i te buka ra Te Bibilia—Parau na te Atua aore ra na te taata? i te api 163 e e taio anaˈe i te Timoteo 1, 6:9, 10, tei faahitihia i te paratarapha 3. E horoa tatou i te tahi atu mau manaˈo no nia i te paratarapha 4, i muri iho e pûpû tatou i te buka.
3 E nehenehe tatou e faaohipa i teie manaˈo ê atu:
◼ “Ia taio tatou i te vea aore ra ia faaroo tatou i te mau parau apî, e mau fifi apî peapea mau ta tatou e ite noa nei, e e maraa iho â to tatou peapea. [E faaite tatou i te hoê ohipa peapea tei tupu.] Nafea ia faaruru i teie mau huru fifi? [E tiai tatou i te hoê pahonoraa.] I te matahiti 1983, ua parau te peretiteni o te mau Hau Amui (o Ronald Reagan i taua tau ra) tei roto i te Bibilia te hoê poroi faufaa roa aita i papaihia aˈenei e e ‘itehia i roto i ta ˈna mau api te pahonoraa o te mau fifi atoa e farereihia e te taata.’ Te faahaamanaˈo ra ta ˈna mau parau i ta te Bibilia iho e parau ra. [E taio tatou te Timoteo 2, 3:16, 17.] Te hinaaro nei au e faaite ia oe e no te aha e nehenehe e tiaturi i te Bibilia.” E haamatara anaˈe i te tahi mau manaˈo faufaa o te api parau iti No te aha e tiaturi ai i te Bibilia. E ani tatou ia ˈna e hoˈi faahou mai tatou no te faataa e mea nafea te mau ohipa e itehia ra na te ao atoa nei i teie mahana i te faatupuraa i te mau parau tohu o te Bibilia.
4 Mai te peu e e farerei tatou i te mau taata aita ta ratou e haapaoraa, e tamata anaˈe i teie faaiteraa:
◼ “Te manaˈo ra te tahi mau taata e te faahapa nei te tahi mau buka moˈa ia ratou iho e ua riro noa ei mau aai. No te rahi o te mau ohipa iino e ravehia ra na nia i te iˈoa o te haapaoraa aita ratou e tiaturi faahou ra i te Bibilia. Inaha, te rahi noa ˈtura te mau taata o te aniani ra e mai te peu e e Parau te Bibilia na te Atua aore ra na te taata. Eaha to oe manaˈo?” E tiai tatou i te hoê pahonoraa. Ia au i te pahonoraa, e tatara anaˈe i te buka Te Bibilia—Parau na te Atua aore ra na te taata? i roto i te hoê tuhaa no nia i te patoiraa aore ra te manaˈo o te taata, e tauaparau anaˈe no nia i te hoê aore ra e piti manaˈo. Ei hiˈoraa, e nehenehe tatou e faaohipa i te mau paratarapha 27 tae atu i te 29 o te haamata i te api 66 i raro aˈe i te tumu parau iti “Iesu—E ere i te hoê taata feruri-noa-hia.”
5 Te vai ara ra to tatou Orometua rahi ia noaa i te mau taata atoa i te ite no nia i to ˈna hinaaro. Te hoê o te mau ravea faahiahia roa ˈˈe o ta tatou e nehenehe e rave no to tatou mau taata-tupu o te tautururaa ïa ia ratou ia haafaufaa i te Bibilia ia au i to ˈna faito tano; e nehenehe te reira e faaora ia ratou.—Mas. 1:32, 33.