E arue anaˈe ia Iehova i te mau mahana atoa
1 Ua riro to tatou Atua, o Iehova, ei Poiete faahiahia tei î i te here, te Pu o te mau mea ora atoa e o te oaoaraa. E tia mau â e ia aruehia oia no to ˈna teitei e no ta ˈna poieteraa taatoa. Te hinaaro nei tatou tataitahi e parau mai te papai salamo, o tei na ô e: “E haamaitai â vau ia oe na nia iho e na nia iho. Na tau vaha e faaite i te parau-tia na oe, e te ora na oe, eiaha ia faaea.” (Sal. 71:14, 15). No te na reira, e tia ia tatou ia imi i te mau ravea no te arue ia Iehova i tera mahana i muri aˈe i te tahi e ia turaihia tatou ia faahiti i te parau maitai no ˈna, no ta ˈna parau-tia, e no te mau faanahoraa o ta ˈna i rave ia ora te mau taata.
2 Ua vaiiho mai te mau kerisetiano matamua i te hoê hiˈoraa maitai roa i te pae no te arueraa ia Iehova. No nia i na 3 000 feia o tei bapetizo i te Penetekose, te taio nei tatou i roto i te Ohipa 2:46, 47: “E tia ratou atoa i roto i te hiero i te mau mahana atoa ma te hinaaro hoê, . . . i te haamaitairaa i te Atua, e ma te itehia mai hoi e te taata atoa. E te feia i faaorahia ra, ua amuihia ïa e te Fatu i te ekalesia ra, aita e mahana i tuua.” Ua haapii ratou i te mau parau mau faahiahia no nia ia Iehova e no nia i ta ˈna Mesia. Ua parare haere to ratou oaoa e inaha, ua turai-atoa-hia vetahi atu mau taata ia faaroo e ia arue ia Iehova.
3 Te mau taime e tano i te mau mahana atoa: E rave rahi o te manaˈo nei e e nehenehe e arue ia Iehova i te mau mahana atoa maoti te pororaa faanaho-ore-hia e te amuiraa. Ia faaineine anaˈe ratou, e rahi atu â te hotu e noaa mai. I te hoê mahana, i muri aˈe i to ˈna faaotiraa e poro ma te faanaho-ore-hia, ua ite atura te hoê tuahine e ua eiâhia i roto i to ˈna pereoo, e e piti hiˈo o tei tupararihia. Ua taniuniu atura oia i te hoê taata tataˈi pereoo e ua faaineine ihora no te paraparau i taua taata ra no nia i te Basileia, ma te pure atoa ia Iehova ia aratai mai ia ˈna. A faaineine ai te taata tataˈi pereoo i te haere, ua haamata ˈtura te tuahine i te faaite atu i te poroi. I muri aˈe i to raua paraparauraa hoê hora taatoa, ua horoa ˈtura to tatou tuahine i te buka E ora e a muri noa ˈtu.
4 E farerei tamau na te tahi atu tuahine i te hoê vahine tapiri ia faaôri haere raua i ta raua urî. I te hoê mahana, ua tauaparau maitai raua no nia i te mau fifi o te oraraa, e ua faatupu te reira i te tahi atu mau aparauraa. I te pae hopea, ua haamatahia ˈtura te hoê haapiiraa bibilia. Te vahi anaanatae, ua faaite mai teie vahine tapiri i muri iho e aita roa ˈtu oia i faaroo i te mau Ite no Iehova ia haere mai ratou i to ˈna fare, no te mea, i taua tau ra, aita oia i tiaturi i te Atua e i te Bibilia.
5 Te manaˈo nei vetahi e e nehenehe e faaite atu i te poroi i te feia hoo haere aore ra i te tahi atu mau taata e patoto mai i to ratou fare. I te hoê mahana, ua haere mai te hoê taata hoo haere i te fare o te hoê tuahine no Irelane no te pûpû mai i te hoê paruru i nia i te ora. Ua pahono atura oia e te tiaturi ra oia e ora e a muri noa ˈtu. E manaˈo apî roa te reira no taua taata ra o tei paari i roto i te faaroo katolika. Ua rave oia i te buka E ora e a muri noa ˈtu, ua haere atu oia i te hoê putuputuraa i te hebedoma i muri iho e ua farii oia i te hoê haapiiraa bibilia. E taeae oia i teie nei.
6 E tia ia tatou ia ineine noa i te arue ia Iehova i te mau mahana atoa. E mea maitai ia vaiiho i te mau vea aore ra te mau api parau iti ma te ite-maitai-hia ia ohie noa tatou ia pûpû atu i te feia e haere mai i ǒ tatou. Ia parahi tatou maa taime iti i roto i te hoê aua huiraatira, peneiaˈe e nehenehe tatou e paraparau e te mau taata o te haere mai no te faafaaea rii. I te fare haapiiraa, te vaiiho nei vetahi mau taurearea Ite i te mau buka aore ra te mau vea bibilia i nia i ta ratou iri papairaa, e nehenehe hoi te reira e turai i te feia e ite mai ia uiui mai e peneiaˈe ia haamata i te hoê aparauraa. E tamau anaˈe hoê aore ra e piti irava o ta tatou e nehenehe e faaohipa. E ani anaˈe ia Iehova ia tauturu mai ia tatou. E haamaitaihia tatou mai te peu e e na reira tatou.—Ioa. 1, 5:14.