E tauturu anaˈe i te mau utuafare ia haamau i te hoê oraraa papu no a muri aˈe
1 Ua parau te hoê taata tuatapapa faanavairaa faufaa i mua i te feia faatuitehia no te hoê fare haapiiraa tuatoru Marite e: “E huru faufaa roa te nounou. E nehenehe e riro ei taata nounou e te oaoa atoa.” Eita ïa e maerehia i teie nei ao inaha, te faarirohia nei te miimii ei ravea no te haamau papu i to ˈna oraraa no a muri aˈe. I to ˈna aˈe pae, ua haapii o Iesu e e tia i te hoê Kerisetiano ‘ia faarue ia ˈna iho, eaha hoi ta te taata faufaa i noaa, ia noaa ia ˈna te taoˈa atoa o teie nei ao, ia ere oia i te ora?’ (Mat. 16:24-26) No te haamau i te hoê oraraa papu no a muri aˈe, e tia ia niu i to ˈna oraraa taatoa i nia i te raveraa i te hinaaro o te Atua, te reira hoi te tia ia riro ei fa matamua no te mau utuafare i teie mahana. (Sal. 143:10; Tim. 1, 4:8) O te manaˈo ïa e vauvauhia ra i roto i te pene hopea o te buka ra Te ravea e itehia ˈi te oaoa i te utuafare. Na roto i teie buka apî, e nehenehe te mau taata e ite e, eaha mau te mea faufaa i roto i te oraraa e nafea ia ohipa no te paturaa i to ratou utuafare. A tamau noa ˈi tatou i te poro i te parau apî maitai na te mau vahi atoa, eaha ta tatou e nehenehe e parau no te faaitoito i te feia o ta tatou e farerei, ia taio i te buka ra Te oaoa i te utuafare? Teie vetahi mau manaˈo tauturu:
2 Na te mau fare aore ra na nia i te aroâ, e nehenehe tatou e tamata i te haamata i te hoê aparauraa e te api parau iti ra “A fanaˈo i te hoê oraraa utuafare oaoa.” E nehenehe tatou e ani e:
◼ “Ua î te oraraa i teie nei tau i te peapea, tera râ, ia manaˈo anaˈe oe, e nehenehe anei e fanaˈo i te hoê oraraa utuafare oaoa? [A vaiiho i te taata ia pahono.] Te na ô ra teie api parau iti e, oia. E hinaaro anei oe e taio?” Mai te peu e e farii te taata, e nehenehe tatou e parau i muri iho e: “I te mea e te anaanatae nei oe i teie tumu parau, peneiaˈe e oaoa atoa oe i te taioraa i teie buka, o te horoa nei i te mau aˈoraa papu no nia i te ravea e itehia ˈi te oaoa i roto i te utuafare fetii.” A faaite i te tabula tumu parau o te buka ra Te oaoa i te utuafare. A haamatara i te tahi mau pene te faaara nei to ratou upoo parau i te anaanatae. A iriti i te buka i te api 10 e a taio i te pereota hopea o te par. 17 e te par. 18 taatoa. A pûpû atu i te buka. A faataa ˈtu i te taata e e nehenehe tatou e faahohonu atu â i teie tumu parau e a ani atu e afea tatou e nehenehe ai e hoˈi mai e hiˈo ia ˈna.
3 E nehenehe tatou e faahohonu atu â i te aparauraa na mua ˈtu no nia i te oraraa utuafare oaoa, ma te parau atu e:
◼ “Te hinaaro nei au e huti i to oe ara-maite-raa i nia i te hoê manaˈo i roto i te buka o ta ˈu i vaiiho mai; ua papu ia ˈu e e anaanatae oe. Te tuatapapa ra te pene hopea i te ravea e itehia ˈi te oaoa i te utuafare. [A taio i te par. 2 i te api 183.] Te ite ra oe e, te taviri o te oaoa, o te rave-amui-raa ïa i te hinaaro o te Atua. Te faaitoito nei matou i te mau taata ia haapii i te Bibilia i roto i to ratou utuafare, no te ite i te hinaaro o te Atua e no te faaohipa atu i roto i te utuafare. Te pûpû nei matou i te hoê haapiiraa Bibilia tamoni ore, te tahi tau avaˈe noa te maoro. Mai te peu e e faatia oe, e nehenehe au e faaite atu ia oe e nafea teie haapiiraa e ravehia ˈi.” A hoˈi atu e te vea iti ra Eaha ta te Atua e titau ra ia tatou? aore ra e te buka ra Te ite, na tatou e maiti eaha te tano maitai aˈe.
4 Mai te peu e e aparau tatou e te mau hoa haapiiraa aore ra e te mau taurearea i roto i te tuhaa fenua, e nehenehe tatou e ani i te uiraa i muri nei:
◼ “Eaha te faufaaraa no te mau metua e no ta ratou mau tamarii ia tauaparau noa i te tahi e te tahi? [A vaiiho i te taata ia pahono.] A hiˈo na eaha te parauhia ra i roto i teie buka no nia i ‘te aparauraa tia e te haavare ore.’ [A taio i te par. 4 taatoa e te pereota matamua o te par. 5 i te api 65 o te buka ra Te oaoa i te utuafare.] Te horoa ra te mau paratarapha i muri iho i te mau manaˈo tano maitai no te haamaitai i te tauaparauraa i roto i te utuafare. Teie te iˈoa o teie buka, Te ravea e itehia ˈi te oaoa i te utuafare. Mai te peu e e hinaaro oe i teie buka e e taio iho â oe, e nehenehe au e vaiiho mai teie na oe.” A faataa ˈtu i te taata e te hinaaro ra tatou e hoˈi mai e hiˈo ia ˈna no te ite i to ˈna manaˈo no nia i te mea o ta ˈna i taio.
5 E nehenehe tatou e patu i nia i te niu o ta tatou aparauraa matamua e te hoê taurearea no nia i te tauaparauraa i rotopu i te mau metua e te mau tamarii, ma te parau atu e:
◼ “Ua oaoa roa vau i te iteraa e te haafaufaa nei oe i te tauaparauraa i roto i te utuafare fetii. I to oe manaˈoraa, eaha te tumu parau faufaa roa ˈˈe ta te mau metua e te mau tamarii e tia ia tauaparau?” A vaiiho i te taata ia pahono. A iriti i muri iho i te buka ra Te oaoa i te utuafare i te api 68 e a taio i te pahonoraa e horoahia ra i roto i te tuhaa matamua o te par. 11. “Te hoê ravea maitai roa ia noaa mai te ite o te Atua, o te haapiiraa ïa i te Bibilia i te mau hebedoma atoa.” A faaite atu i te vea iti ra Eaha ta te Atua e titau ra ia tatou? A faataa ˈtu e te vauvau ra te mau 16 haapiiraa i roto, i te mau haapiiraa matamua a te Bibilia. A taio i te omuaraa parau i te api 2 e a tuatapapa i te haapiiraa matamua e te taata.
6 Mai te peu e, na te mau fare, aore ra i te taime faafaaearaa, e farerei tatou i te hoê metua tane aore ra i te hoê metua vahine, e nehenehe tatou e faaara i to ˈna anaanatae na roto i te parauraa ˈtu e:
◼ “Ua papu ia ˈu e e farii oe i te parau e mea fifi roa ia rave i te mau tamarii i teie mahana. I to oe manaˈoraa, eaha te mea e nehenehe e paruru i to oe utuafare i te mau mana iino? [A vaiiho i te taata ia pahono.] Teie te tahi mau aˈoraa paari o ta ˈu iho i haafaahiahia.” A huti i to ˈna ara-maite-raa i nia i te hiˈoraa e horoahia ra i te api 90 o te buka ra Te oaoa i te utuafare, i te par. 1, e a taio i te par. 2. A faaite e no te aha te mau manaˈo aifaito e horoahia ra i roto i te buka, e tano maitai ai no te paruru i te mau utuafare i te mau mana iino. A pûpû atu i te taata ia vaiiho mai i te hoê buka na ˈna, e ia hoˈi mai tatou e hiˈo ia ˈna no te pahono i te mau uiraa ta ˈna e nehenehe e ui mai.
7 Ia hoˈi mai tatou e hiˈo i te metua tane aore ra te metua vahine o tei farii i te buka ra “Te oaoa i te utuafare,” e nehenehe tatou e faahaere i te aparauraa i mua, mai teie te huru:
◼ “I to tâua aparauraa i te taime i mairi aˈenei, ua taa ia ˈu e te tapitapi mau ra oe no ta oe mau tamarii e te hinaaro ra oe e imi i te mau ravea atoa no te paruru ia ratou i te mau mana iino. Peneiaˈe aitâ oe i taio atura i te buka o ta ˈu i vaiiho mai, tera râ, te vai ra i roto te hoê parau anaanatae roa o ta ˈu e hinaaro ra e faaite ia oe. [A taio i te par. 19 i te api 59.] No te faatupu i te mau taairaa e te Atua, e tia ia tatou ia haapii e o vai oia na roto i ta ˈna Parau i papaihia, te Bibilia. E farii anei oe e ia faaite atu vau e nafea matou ia rave i te hoê haapiiraa Bibilia utuafare?”
8 I roto i teie nei ao, eita ta te feia aˈo e nehenehe e faaite i te mau utuafare i te eˈa o te oaoa; e riro hoi i te ore e manuïa. E opere rahi anaˈe i te buka ra Te oaoa i te utuafare, ia nehenehe te Parau a te Atua e tauturu i te mau huru taata atoa ia haamau i te hoê oraraa papu no a muri aˈe.—Tim. 1, 6:19.