E tapea maite tatou i to tatou feruriraa i nia i te mau mea no nia mai
1 No nia i te ui e haaati ra ia tatou e to ˈna huru manaˈo no nia i te tau no a muri aˈe, teie ta te hoê tumu parau o te vea ra New York Times no te 31 no titema 1994 i parau: “Te mǎtaˈu nei [te mau taata] i te tau no a muri aˈe. Te mǎtaˈu nei ratou no te pae o te ohipa, te maˈi, te mau tupuraa i te pae faanavairaa faufaa, te huru oraraa na te ao nei.” I te mau vahi atoa, mea papu ore te ora. Na roto i ta tatou taviniraa, te tauaparau nei tatou i te mau mahana atoa e te feia o te faaruru nei i taua mau mǎtaˈu ra. Te farerei nei tatou i te hoê â huru fifi; tera râ, e nehenehe to tatou faaroo e to tatou tiaturiraa i te mau parau tǎpǔ haavare ore a te Parau a te Atua e horoa mai i te hoê huru hiˈoraa taa ê o te oraraa e te tau no a muri aˈe o te huitaata nei.—Isa. 65:13, 14, 17.
2 Te turai nei to tatou hiˈoraa maitai e to tatou tiaturiraa papu e rave rahi mau taata aau rotahi ia farii i te poroi o ta tatou e pûpû nei. Te ite nei e rave rahi mau taata o te hepohepo nei e o te autâ nei i te tamahanahanaraa ia aparau ratou ia tatou. No te mea hoi te au nei ratou i ta ratou e faaroo ra, te farii nei vetahi e haapii i te Bibilia e o tatou. Te vai nei râ te feia o te hinaaro nei e aparau no nia i to ratou mau fifi hohonu roa. Parau mau, e nehenehe tatou e horoa i te hoê taime no te faaroo i te hoê taata ia paraparau no nia i to ˈna mau tapitapiraa, teie nei râ eiaha e moe ia tatou i ta tatou tapao, oia hoi e haapii i te mau taata i te parau mau faahiahia no nia i te Parau a te Atua.
3 Parau mau, te hinaaro nei tatou e tamahanahana i te mau taata o te mauiui nei. Ua horoa o Iesu i te hiˈoraa i te taime a parau ai oia, ia au i te Mataio 11:28: “E haere mai outou ia ˈu nei, e te feia atoa i haˈa rahi.” Te hinaaro nei tatou e faaitoito i te mau taata mai te reira te huru. Teie nei râ, a tapao anaˈe na i te mau parau a Iesu, i te hopea o te Mt 11 irava 28: “Na ˈu outou e faaora.” Te reira ïa ta tatou fa, e tia ˈi. Te na reira nei tatou ma te faaite atu i te mau parau tǎpǔ mahanahana mau o te Parau a te Atua. Te faaite nei tatou e te anaanatae taa ê nei tatou i te hoê taata e te tapitapi nei tatou no ˈna ma te faaroo maitai atu ia ˈna, o tei riro ei mea faufaa no te amo i ta tatou hopoia e poro i te parau apî maitai o te Basileia e te tautururaa ia vetahi ê ia taa e o te Basileia te ravea tano otahi roa no te mau fifi o te huitaata nei.—Mat. 24:14.
4 E ere ta tatou taviniraa mai ta te mau taata aravihi i te pae rapaauraa. Ua riro râ ei taviniraa niuhia i nia i te ‘haapiiraa maitai’ tei itehia i roto i te Parau a te Atua, mai ta te aposetolo Paulo e faataa ra i roto i te Timoteo 1, 4:6. Te feia o te faaruru nei i te tahi mau fifi i te pae no to ratou oraraa taa ê, o te mauiui nei i te pae o te mau manaˈo horuhoru, peneiaˈe te hinaaro nei ratou e ia tauturuhia ratou ia turui atu i nia ia Iehova. E haapii ïa tatou ia ratou ia haamau i to ratou feruriraa i nia i “te mau mea i nia ra,” o te taai ra i nia i te tiaturiraa o te Basileia (Kol. 3:2). Mai te peu e te tuu nei ratou i to ratou ara-maite-raa i nia i te Parau a te Atua, e nehenehe ratou e faaitoitohia maoti te mana puai o ta ˈna e faaohipa nei i roto i to ratou oraraa.—Heb. 4:12.
5 No reira, ta tatou tapao o te tautururaa ïa i te mau taata ia haamau i to ratou feruriraa i nia i te mau mea ‘tia ra, te mau mea viivii ore ra, te mau mea popouhia ra e te mau mea roo maitatai ra.’ (Phil. 4:8.) Mai te peu e e tuu atu ratou i to ratou ara-maite-raa i nia i te tiaturiraa o te Basileia, e haamaitaihia ratou mai ia tatou atoa. E oaoa atoa ratou i te iteraa e e faatitiaifaro roa o Iehova i te mau fifi e rave rahi na roto i te arai o to ˈna ra Basileia.—Sal. 145:16.