Te mau hoˈi-faahou-raa e farerei maitai maoti i te hoê haapiiraa aravihi
1 Ua riro te mau hoˈi-faahou-raa e farerei ei tuhaa faufaa e te oaoa no ta tatou taviniraa. No te aha e hoˈi oioi faahou ai e hiˈo i te mau taata o tei faaite i te anaanatae? Maoti te ohipa e faariro i te mau taata ei pǐpǐ, ua itehia e ua faahanahanahia te iˈoa o Iehova, e te fanaˈo nei te feia e mǎtaˈu ra i te Atua i te tauturu ta ratou e hinaaro no te ite i te eˈa o te ora (Kor. 2, 2:17 e tae atu i te 3:3). Mai te peu e e taa ia tatou e te fifi nei te faaraaraa i te iˈoa o Iehova e te ora o te mau taata, e turaihia tatou ia faaineine maitai na mua ˈˈe e hoˈi ai e farerei i te mau taata.
2 E tauturu te hoê taata haapii maitai i te taata e haapii ra ia patu i nia i te hoê niu i haamau-aˈena-hia. Mai te hoê orometua haapii o te horoa maite i te ite tamau i te mau mahana atoa e fanaˈohia e te feia e haapii nei, e tia ia tatou ia tamau i te faataa i te mau haamaramaramaraa no nia i te tumu parau mai te taime matamua o te farereiraa. Na te reira e tapea i te mau manaˈo e te apeeraa i te hoê haaferuriraa tamau.
3 Ia hoˈi mai tatou i muri aˈe i to tatou vaiihoraa i te vea iti ra “Te haapao mau ra anei te Atua ia tatou?,” e nehenehe tatou e parau e:
◼ “I te taime hopea i mairi aˈenei, ua aparau tâua no nia i te mau ‘mahana hopea’ e faahitihia ra e te Bibilia e eaha to ˈna auraa no tatou nei. Te aniani nei paha oe eaha te haapapuraa e vai nei e te ora mau ra tatou i te mau mahana hopea (Tim. 2, 3:1). Ua hinaaro rahi te mau pǐpǐ a Iesu i te hoê pahonoraa i taua uiraa ra [e taio anaˈe ia Mataio 24:3]. I roto i ta ˈna pahonoraa, ua faataa o Iesu i te mau tupuraa e haaati nei e o ta tatou e ite nei, tae noa ˈtu te hoê ahoaho e te hoê haavîraa uˈana faito ore.” E haafaufaa anaˈe i te mau tuhaa atoa o te tapao i roto i te mau paratarapha 3 e 4, api 19. Mai te peu e e pahono maitai mai taua taata ra, e faaite anaˈe i te tahi mau tuhaa o te tapao e faahitihia ra i roto i te mau paratarapha 5 e tae atu i te 8, api 20. E ani tatou e hoˈi faahou mai tatou no te pahono i te mau uiraa faahitihia i te api matamua o te vea iti.
4 No te atuatu i te anaanatae o te taata i nia i te vea iti “Eaha te tumu o te oraraa? Nafea outou e ite ai i te reira?” e nehenehe tatou e parau:
◼ “Te hinaaro nei au e tauaparau faahou tâua no nia i te tumu o te oraraa. Te farii papu nei oe e ua hinaaro te Atua ia ora tatou ma te oaoa e te hau i nia i te fenua nei, eiaha râ i roto i te mau peapea ta tatou i matau noa. Ia manaˈo oe e tapea anei o ˈna i ta ˈna parau tǎpǔ?” E vaiiho tatou i te taata ia pahono. E taio anaˈe i te Isaia 55:11, i muri iho e paraparau ia ˈna i nia i te mau manaˈo e vai ra i roto i te mau paratarapha 25 tae atu i te 27, api 30. E faaite tatou e ua riro te haapiiraa i te Bibilia ei ravea maitai roa ˈˈe no te ite i te tumu mau o to tatou oraraa.
5 No te atuatu i te anaanatae faatupuhia e te vea iti “E oaoa oe i te fenua e a muri noa ˈtu!” e nehenehe tatou e faaite faahou e e parau:
◼ “Ua tauaparau tâua i nia i te ao nehenehe faahohoˈahia i nia i te api matamua o teie vea iti. Ua hoˈi faahou mai au no te faataa maitai ia oe no te aha e mea faufaa roa no te mau taata o te hinaaro ra e ora i roto i te hoê ao mai teie ia faatupu i te faaroo i roto ia Iesu Mesia.” E faaite tatou i te hohoˈa 41 e e taio i te Isaia 9:6. Ma te hohoˈa 62, e taio anaˈe i te Ioane 3:16 e e faataa maitai tatou e no te aha e tia ia auraro. E faataa tatou e te tauturu nei te mau Ite no Iehova i te mau taata; te haapii nei ratou nafea ia faatupu i te faaroo na roto i te haapiiraa i te Bibilia e te tutavaraa i te faaohipa i te mau aˈoraa.
6 E hiˈopoa anaˈe i ta tatou mau hoˈi-faahou-raa e farerei tataitahi no te faaaravihiraa. E uiui tatou e: Te vai ra anei i roto to ˈu feruriraa i te manaˈo papu ia paraparau atu? Ua huti anei au i to ˈna manaˈo i nia i te Bibilia? Ua patu anei au i nia i te mau niu haamauhia i te farereiraa matamua? Ua hohora anei au i ta ˈu faaiteraa no te haamata i te hoê haapiiraa bibilia? Mai te peu e e nehenehe tatou e pahono maitai i teie mau uiraa, te rave nei tatou hau atu â i ta tatou e nehenehe no te riro mai ei taata haapii maitai i te Parau a te Atua.