Te hoê tairururaa mataeinaa o te faafaaroo ra i te hoê pu faaitoitoraa!—Arue anaˈe ia Iehova ma te oaoa i te mau mahana atoa!
1 Ua ani te aposetolo Paulo i teie uiraa: “E ia ore hoi ia taa te oto o te pu ra, na vai e faaineine ia ˈna iho e haere i te tamaˈi?” (Kor. 1, 14:8). Te pu tei faaotohia na te tairururaa mataeinaa oia hoi “Te feia e arue i te Atua ma te oaoa” ua puai e ua maramarama anei? Oia mau! ‘E arue anaˈe ia Iehova ma te oaoa i te mau mahana atoa,’ teie ïa te poroi mahanahana i horoahia mai na tatou. Ua turai anei teie piiraa i to tatou mafatu ia rave i te ohipa? Ua faataa maitai mai te porotarama o teie tairururaa ia tatou e rave rahi tumu e te faufaa no te arue-tamau-raa ia Iehova, te Arii e a muri noa ˈtu.—Sal. 35:27, 28.
2 Te faaite hua nei te mau raˈi i te hanahana o Iehova “te tahi ao i te tahi.” (Sal. 19:1-3.) Ahiri e te arue tamau noa ra te mau mea poietehia paraparau ore e te hauti ore atoa ia Iehova, o tatou o tei horoahia mai i te maramarama, eita anei tatou e turaihia ia arue i te mau taime atoa no to ˈna mau huru maitatai faito ore e no ta ˈna e rave ra? O vai, i nia ˈtu i to tatou Poiete rahi, e tia ia aruehia ma te oaoa?—Sal. 145:3, 7.
3 Te mau mahana atoa: I raro aˈe i te manaˈo a te Atua, ua papai te hoê taata papai salamo: “E faaite i te ora na ˈna eiaha e mahana tuua. E rahi hoi Iehova, e ia rahi hoi i te haamaitai ia ˈna.” (Sal. 96:2, 4). No te mau pionie anaˈe anei te reira? Aita roa ˈtu! To ˈna auraa e ere anei e e tia ia tatou ia paraparau no nia ia Iehova i te mau taime atoa, te mau mahana atoa aita tatou e poro nei? Papu maitai! E tia ia tatou ia arue ia Iehova i te mau mahana atoa e ia paraparau i te tahi atu no nia iho i te mau faanahoraa o ta ˈna i rave no to tatou faaora. E tia i te mau taata no teie tau ia ite e e o Iehova te Arii no a muri noa ˈtu e ua horoa o ˈna i te faatereraa na te ao taatoa ia Iesu Mesia, ta ˈna Tamaiti faahanahanahia. E turai te here no Iehova e no to tatou mau taata-tupu ia paraparau no nia i teie poroi e te mau faanahoraa no ǒ mai i te Atua ra no te faaora i te mau vahi atoa o ta tatou e farerei nei i te mau taata.—Sal. 71:15.
4 I te taime a tavini ai o ˈna i nia i te fenua, ua horoa o Iesu Mesia i te mau mahana atoa i te hoê hiˈoraa maitai roa ˈˈe no te hoê ïa taata o tei arue ia Iehova ma te haavarevare ore. Ua parau o ˈna: “E haamaitai au ia oe, e tau Metua, e te Fatu o te raˈi e te fenua.” (Mat. 11:25). Ma te haapao maitai ia ˈna iho, i te mau vahi atoa o ta ˈna i tia, ua arue o Iesu i te Atua i mua te aro o te mau taata. I te vahi o ta te nahoa e tia, i roto i te mau sunago, i te hiero i Ierusalema, i nia i te tupuai mouˈa, i te pae miti, i te mau vahi atoa ua arue o ˈna ia Iehova. Ia apee anaˈe tatou ma te haapao maitai i te mau taahiraa a Iesu ma te faahanahana mau ia Iehova i te mau mahana atoa i mua i te mau taata, e ite ïa tatou i te oaoa e e noaa ïa ia tatou i te mau faahopearaa oaoa.
5 E pahono anaˈe i te piiraa: E pahono anei tatou i te piiraa e arue ia Iehova i mua i te mau taata atoa e i te mau mahana atoa? E haamanaˈo tatou, e ere ïa i te hoê uiraa no nia i te matahiti. Te titau nei te Salamo 148:12 i te mau taata apî, te mau paretenia, te mau taata paari e te mau tamarii ia arue ia Iehova. Te mau ui apî, e arue anei outou ia Iehova ma te faaite i to outou mau hoa i te fare haapiiraa e ta outou mau orometua haapii i te roaraa o te matahiti? Outou te mau taata paari, te faaroo ra anei to outou mau hoa ohipa i te parau no nia ia Iehova e i ta ˈna mau opuaraa ia tae anaˈe i te mau taime tano? No te faaite i to tatou vai-ora-raa e tia ia tatou ia paraparau no nia ia Iehova, mai te hutiraa i te aho aore ra te tamaaraa. Noa ˈtu e aita te mau taata tâuˈa ore e horoa maira i te tariˈa faaroo i ta tatou e parau atu, te vai ra Hoê o te faaroo ra, e e haamaitai mai o ˈna ia tatou.—Mal. 3:16.
6 No te mea hoi e te haere nei teie ao i te hopea, te piihia nei na te ao taatoa: “E haamaitai ia Iehova.” (Sal. 106:1). Ia riro mai ta tatou himene ei himene arueraa ma te puai ia ite te taata atoa e o Iehova To ˈna iˈoa e o o ˈna te Teitei i te fenua atoa nei!—Sal. 83:18.