E haapii anaˈe i te Parau a te Atua na roto i te mau vea iti
1 E hopoia na te taatoaraa o te mau tavini pûpûhia a Iehova i te haapiiraa ia vetahi ê i te Parau a te Atua. E itehia te faufaaraa o teie nei hopoia ia taa anaˈe ia tatou e te pûpû mai ra o tei horoahia te mana i nia i te raˈi e i nia i te fenua nei na tatou i te ohipa ra e faariro “i te mau fenua atoa ei pǐpǐ, (...) ma te haapii atu ia ratou.” (Mat. 28:18-20.) Te titau ra ïa te pororaa o te parau apî maitai e ia riro tatou ei feia haapii.—Tim. 2, 2:2.
2 I te avaˈe atete, e haafaufaa tatou i to tatou mau ite e aravihi ei feia haapii no te pûpûraa i te mau vea iti. E nehenehe tatou e huti mai te tahi mau manaˈo bibilia anaanatae mau e e faaineine i te tahi mau tumu parau no te haamata i te tauaparauraa.
3 Ia pûpû tatou i te vea iti “Te haapao mau ra anei te Atua ia tatou?” e nehenehe tatou e parau:
◼ “Ua farerei iho nei matou e rave rahi o to oe mau taata tapiri, e ua ite iho nei matou e te mǎtaˈu nei ratou i te maraaraa o te taparahiraa taata, te totovaraa e te haavîraa uˈana. I to oe manaˈoraa no te aha teie mau tupuraa i haere ai i te rahi? [E vaiiho tatou i te taata ia pahono]. E mea anaanatae e ia ite e ua faaite te Bibilia i te reira. [E taio anaˈe Timoteo 2, 3:1-3.] A tapao na e e tia i te reira ia tupu i te mau ‘mahana hopea.’ Te faaite ra ïa te reira e te piri mai ra te hopea o te hoê ohipa. Eaha ïa to oe manaˈo?” E vaiiho tatou i te taata ia pahono. E hohora anaˈe i te vea iti i te api 22, e faaite tatou i te hohoˈa, e e hiˈopoa anaˈe hoê aore ra e piti irava faahitihia i taua api ra. E rave tatou i te tahi mau faanahoraa no te hoˈi faahou mai e faataa e no te aha tatou e tiaturi ai e ua fatata roa taua mau haamaitairaa ra.
4 Peneiaˈe e hinaaro tatou e pûpû i te vea iti “Eaha te tumu o te oraraa? Nafea outou e ite ai i te reira?”:
◼ “E rave rahi mau taata o te fifi nei i te ite i te hoê auraa no to ratou oraraa. Mea varavara o te oaoa nei, area râ te ite nei te rahiraa i te mau hepohepo e te mau mauiui. E manaˈo anei oe e te reira anei te oraraa o ta te Atua i hinaaro no tatou? [E vaiiho tatou i te taata ia pahono.] Maoti i te Bibilia, te hinaaro nei te Atua e ia ora tatou i roto i te hoê ao mai teie te huru.” A faaite i te hohoˈa i te api 21, e te mau api 25 e 26, paratarapha 4-6, e e faataa tatou e eaha ta te Atua i tǎpǔ. E faahiti anaˈe i teie uiraa no te tahi atu hoˈi-faahou-raa e farerei: “Nafea e papu ai e faatupu iho â o te Atua i ta ˈna mau parau tǎpǔ?”
5 E nehenehe tatou e pûpû i te vea iti “E oaoa oe i te fenua e a muri noa ˈtu!” ma te faaite i te taatoaraa o te hohoˈa o te api matamua e ma te ani e:
◼ “E hinaaro anei oe e ora i roto i te hoê ao o tei î i te mau taata oaoa mai tei faaitehia i roto i teie vea iti? [E vaiiho tatou i te taata ia pahono.] Te na ô ra te Bibilia e e mea here roa na te Atua te mau taata e te hinaaro nei o ˈna e e ora ratou i nia i te fenua ma te oaoa e a muri noa ˈtu.” E hiˈo anaˈe i te hohoˈa 49, e e taio anaˈe hoê o te mau irava papaihia. E i muri iho e faaite ïa tatou i te hohoˈa numera 50, e e faataa eaha ïa te tia ia tatou ia rave e ia hinaaro anaˈe tatou e ora i roto i te Paradaiso. E ani tatou e e hoˈi faahou mai tatou e e tauaparau no nia i te faufaaraa ia faatupu i te faaroo i roto ia Iesu Mesia.
6 Mea oaoa na Iehova ia faaite anaˈe tatou i te ‘tupuraa o to tatou ite ma te ara i ta tatou e haapii ra.’ (Tim. 1, 4:15, 16.) E mea faufaa roa te mau vea iti ia nehenehe tatou e tauturu i te feia e hinaaro ra e faaroo i te “parau oaoa e te maitai ra.”—Isa. 52:7.