E faaite anaˈe i ‘te mau parau o te parau tohu’
1 Te ora nei tatou i te tau o te tupuraa te mau parau tohu faahitihia i roto i te buka o te Apokalupo. Te tamata nei e rave rahi mau taata i te taa i te auraa o te mau tupuraa peapea i teie mahana. E mea maitai paha no ratou ia ‘faaroo i te mau parau’ o te parau tohu o te Apokalupo (Apo. 1:3). I te avaˈe mati, e nehenehe ïa tatou e tauturu ia ratou ma te pûpû atu i te buka ra Apokalupo: tatararaa hopea. Ia pûpû anaˈe tatou, e tapea mai tatou i roto i te feruriraa e ua tohu te buka o te Apokalupo i te mau fifi e farereihia ra e te huitaata nei i teie mahana. Eaha ta tatou e nehenehe e parau?
2 E mea aravihi paha teie omuaraa parau:
◼ “Te faateimaha nei te tamaˈi, te oˈe e te maˈi i te mau taata o te senekele XX. I to oe manaˈoraa, no te aha e mai te reira e ua rave hoi tatou i te mau haereraa i mua i roto i te mau ravea aravihi? [E vaiiho tatou i te taata ia pahono.] E rave rahi tei maere i te haapiiraa e ua faaitehia taua mau fifi atoa ra i roto i te Bibilia. Ua faaroo aˈena paha oe i te parau no nia i na ‘taata faahoro puaahorofenua e maha o te Apokalupo.’ E parau tohu hoi ta te Bibilia e parau ra no nia i taua mau taata faahoro puaahorofenua ra o ta tatou e ite nei i te tupuraa i teie mahana na roto i te mau ohipa e tupu ra na te ao nei. [E hohora tatou i te buka ra Apokalupo: tatararaa hopea i te pene 16 e e faaite tatou i te mau hohoˈa i te mau api 91-97.] Te faaite nei teie parau tohu i te hoê tau ati rahi, te horoa atoa nei râ i te hoê tiaturiraa. [E taio tatou i te Apokalupo 6:2 i roto i te paratarapha 3.] O Iesu Mesia ïa te taata e faahoro ra i te puaahorofenua teatea. Ua tǎpǔ o ˈna e e faaore oia i te ino e e haamau i te hoê ao e vai ai te oaoa e te hau maoti te Basileia o ta ˈna hoi i haapii ia tatou ia pure atu.” E pûpû tatou i te buka.
3 E faatupu paha te uiraa i muri nei i te hoê aparauraa anaanatae:
◼ “I to oe manaˈoraa, eaha ta tatou e titau no te faaore roa i te huru oraraa ino o te ao nei? [E vaiiho tatou i te taata ia pahono.] Te manaˈo nei te rahiraa o te mau taata e, no te ora ˈtu, e te titau nei te ao i te hoê tauiraa taatoa. Te faaite nei te Bibilia e ua ite te Atua i te ravea o to tatou mau fifi e ua tǎpǔ o ˈna e tauturu ia tatou.” E hohora tatou i te buka ra Apokalupo: tatararaa hopea i te api 171 e e taio tatou i te Apokalupo 11:15 i roto i te paratarapha 1. E faaite tatou i te mau hohoˈa i te mau api 302 e te 308, e e huti tatou i te ara-maite-raa o te taata i nia i te mau haamaitairaa e niniihia mai e te Basileia faaterehia e te Mesia. E faataa tatou ia ˈna i muri iho e nafea o ˈna iho e nehenehe ai e fanaˈo atoa.
4 Peneiaˈe e tano te omuaraa parau i muri nei:
◼ “Ua ite e rave rahi taata o tei taio i te buka bibilia ra o te Apokalupo e mea fifi ia taa i te auraa. Te faataa nei te buka ra e rave rahi tupuraa matau-ore-hia e te faufaa rahi. Teie buka, Te Apokalupo: Ua fatata roa to ˈna tatararaa rahi hopea nei!, e tuatapaparaa ïa i te irava tataitahi o te Apokalupo. Te faataa ra oia e te ohipa nei te tupuraa o te mau parau tohu i nia ia tatou tataitahi.” E hohora tatou i te buka i te api 15, paratarapha 2, e e faaite tatou i te Apokalupo 1:1 papaihia e te mau reta meumeu. E parau tatou i te taata e hoê â atoa no te irava tataitahi o te buka o te Apokalupo e e tauturu te mau haamaramaramaraa horoahia ia ˈna ia taa i te auraa o taua mau parau tohu faahiahia ra. E pûpû tatou i te buka mai te peu e mea maitai te huru o te taata.
5 Mai te peu e te ohipa ra te taata aore ra mai te peu e aita tatou e papu maitai e anaanatae anei te taata, e nehenehe tatou e vaiiho atu i te hoê vea aore ra hoê api parau iti. Mai te peu e e anaanatae o ˈna i te farereiraa i muri aˈe, e nehenehe ïa tatou e pûpû i te buka.
6 No te mau taata atoa te poroi i roto i te Apokalupo. E mea faufaa ïa e ia faaroo te taata tataitahi i te mau parau o te parau tohu. Ia imi ïa tatou i te mau ravea atoa no te faaite i taua poroi faufaa roa ra!