E faaite anaˈe i te parau apî maitai, ma te ite e te ru nei te taime
1 Te faaite nei tatou i to tatou mauruuru hohonu no te tiaturiraa o te Basileia o te Atua, na roto i te apitiraa ma te mafatu taatoa i roto i te taviniraa kerisetiano. E tia ia tatou ia apiti atu ma te ite e te ru nei te taime. No te aha? Mea iti te mau rave ohipa, te fatata maira te hopea o te faanahoraa ino o te mau mea, e e nehenehe te mau taata o te tuhaa fenua e pohe. (Ezek. 3:19; Mat. 9:37, 38) Te titau ra te hoê hopoia faufaa roa ia tutava tatou i roto i te taviniraa. Nafea tatou e nehenehe ai e faaite e te ite nei tatou e te ru nei te taime i roto i te pororaa? Na roto i te faaineineraa i te mau omuaraa parau maitatai, te maimi-maite-raa i te mau taata na te mau vahi atoa to reira ratou, te tapao-maitai-raa i te mau anaanatae atoa i faaitehia, te hoˈi-oioi-faahou-raa e hiˈo i te mau taata no te atuatu i taua anaanatae ra, e na roto i te haamanaˈoraa e, i te mea hoi e e nehenehe te mau taata e pohe, e tia ia tatou ia haafaufaa i ta tatou taviniraa. E riro te mau manaˈo tauturu i muri nei ei mea faufaa no tatou, ia faaineine anaˈe tatou no te faaite i te parau apî maitai i te avaˈe Febuare, ma te ite e te ru nei te taime. E pûpû tatou i te buka ra Te Apokalupo: Ua fatata roa to ˈna tatararaa rahi hopea nei!
2 Peneiaˈe e nehenehe ta tatou e haamata i te hoê aparauraa ma te faahiti poto noa i te tahi mau fifi e tupu ra i to tatou vahi, ma te parau e:
◼ “Te tiaturi nei e rave rahi taata i te Atua, te uiui nei râ ratou e eaha te tau no a muri aˈe ta ˈna e faaineine ra no tatou. Eaha to oe manaˈo? [A vaiiho i te taata ia pahono.] Ua ite anei oe e te haamaramarama maitai maira te Bibilia ia tatou no nia i te hinaaro o te Atua no te huitaata nei, e no nia i te mea ta ˈna e rave ra no te faatupu i te reira?” A iriti i te buka ra Apokalupo: tatararaa hopea i te api 301. A taio i te Apokalupo 21:1 i roto i te paratarapha matamua, e to ˈna tatararaa i roto i te afaraa hopea o te paratarapha 2. A faaite i te hohoˈa i te api 302 o te faataa ra e mai teihea mau to tatou tau no a muri aˈe. I roto i te paratarapha 6, a taio i te Apokalupo 21:4. Mai te peu e e farii te taata, a pûpû atu i te buka. A faanaho i te hoê taime e tano no te faahaere i te aparauraa i mua.
3 E nehenehe tatou e faahaere i te aparauraa i mua i nia i te Apokalupo 21:1, 4 mai teie:
◼ “I to ˈu haereraa mai i tera mahana ra, ua tauaparau tâua no nia i te parau tǎpǔ a te Atua, e faaineine i te hoê totaiete taata apî i nia i te fenua nei. [A huti faahou i te ara-maite-raa i nia i te api 302 o te buka ra Apokalupo: tatararaa hopea.] E hinaaro anei oe e ia fanaˈo to oe utuafare i teie huru oraraa? [A vaiiho i te taata ia pahono.] Teie ïa te uiraa: e nehenehe anei e tiaturi i te mau parau tǎpǔ a te Atua? A hiˈo na i ta ˈna iho e parau ra.” A taio i te Apokalupo 21:5, 6a i roto i te paratarapha 8 i te api 303. A ui i te uiraa o te paratarapha 9, i te api 303, e a taio i te pahonoraa, e te pereota hopea atoa o te paratarapha. A pûpû i te hoê haapiiraa Bibilia tamoni ore. A faanaho no te rave i te hoê faahiˈoraa a muri aˈe.
4 Te tapitapi nei e rave rahi taata no nia i te mau fifi e maraa ra o ta te huitaata nei e faaruru ra; i te farereiraa matamua, e nehenehe ïa tatou e parau mai teie:
◼ “Te tapitapi nei te rahiraa o te mau taata no nia i te mau fifi ta tatou e farerei nei. [A faahiti i te tahi noa.] A tau ahuru matahiti i teie nei to te mau taata politita tǎpǔ-noa-raa i te faatitiaifaro roa i taua mau fifi ra, e ua tamata vetahi i te na reira. I to oe manaˈoraa, no te aha e te haere noa ra te huru oraraa i te inoraa? [A vaiiho i te taata ia pahono.] Te horoa maira te Bibilia i te hoê haamaramaramaraa, o ta te rahiraa o te mau taata i ore i hiˈopoa aˈenei. Te faataa ra te buka a te Apokalupo i te hoê tamaˈi tei tupu na i nia i te raˈi. A hiˈo na e eaha te faahopearaa, ia au i te Apokalupo 12:9.” A taio i te irava e a iriti i te buka ra Apokalupo: tatararaa hopea i te api 182. A faaohipa i te hohoˈa no te faataa e mea nafea to Satani faaôraa i roto i te mau ohipa a te taata nei. Mai te peu e e faaite te taata i te anaanatae haavare ore, a pûpû i te buka. A faanaho i te taime farereiraa no te hoˈi faahou mai e faaite ia ˈna, e mea nafea te Atua ia faatitiaifaro i te mau fifi o te huitaata nei.
5 Mai te peu e ua tǎpǔ tatou e hoˈi mai, no te faaite i te ravea a te Atua no te faatitiaifaro i te mau fifi o teie tau, e nehenehe tatou e tamata i te parau e:
◼ “Ua tutava vau no te hoˈi mai e hiˈo ia oe, ia faahaere tâua i ta tâua aparauraa i mua, no nia i te ravea mau no te faatitiaifaro i te mau fifi o te huitaata nei. I te taime i mairi aˈenei, ua ite tâua i roto i te Bibilia e te haavare nei o Satani i te fenua taatoa nei. I te mea hoi e varua poietehia oia tei hau aˈe i te taata nei, i to oe manaˈoraa, te vai ra anei te hoê ravea no te faaore i to ˈna mana ino? [A vaiiho i te taata ia pahono.] A hiˈo na i ta te Bibilia e parau ra.” A taio e a faataa i te Apokalupo 20:1-3. Ma te faaohipa i te hohoˈa i te mau api 4 e 5 o te buka ra Te ite, a faaite e mai te aha te huru o te oraraa ia ore anaˈe te mana o Satani. A pûpû i te hoê haapiiraa Bibilia, e a tamata i te haamata i reira iho.
6 Te anaanatae nei e rave rahi taata i te huru o te fenua. E nehenehe tatou e tamata i te haamata i te hoê aparauraa mai teie:
◼ “Te ite nei tatou e te tapitapi nei fatata te mau taata atoa no nia i te viiviiraa o te mataˈi, te pape, e te maa. I roto i te tahi mau fenua, te haamǎtaˈu atoa nei te huru o te fenua i te ora. I te mea hoi e o te Atua te Poiete o te fenua, i to oe manaˈoraa, eaha ta ˈna e rave? [A vaiiho i te taata ia pahono.] Te parau ra te Bibilia e e titau mai oia i te hopoia i te mau taata, no ta ratou huru faaohiparaa i te fenua. [A taio i te Apokalupo 11:18b.] A feruri na e te ora ra oe i nia i te hoê fenua tei tamâhia i te mau haaviiviiraa atoa!” A haamatara i te parau tǎpǔ a te Atua no nia i te hoê paradaiso i roto i te Apokalupo 21:3, 4. A faaite i te hohoˈa i te api 302 o te buka ra Apokalupo: tatararaa hopea. Mai te peu e te anaanatae ra te taata, a pûpû i te buka, e a rave i te mau faanahoraa no te hoˈi faahou mai.
7 Ia hoˈi faahou tatou e hiˈo i te hoê taata o tei faaite i te anaanatae no nia i te Paradaiso i nia i te fenua nei, e nehenehe tatou e parau e:
◼ “I te taime i mairi aˈenei, ua farii tâua e e tia i te Atua ia faatitiaifaro i te mau ohipa a te taata nei, ia matara te fifi o te haaviiviiraa i nia i te fenua nei. Teie râ te uiraa: eaha te tia ia tatou ia rave no te ora i roto i te ao apî e te parau-tia a te Atua?” A taio i te Ioane 17:3. A ani i te taata e ia fanaˈo oia i te hoê haapiiraa Bibilia tamoni ore ia noaa mai taua ite taa ê ra.
8 Auê ïa haamaitairaa taa ê ta tatou e faaohipahia ei mau rave ohipa i roto i te ootiraa e tupu ra i teie mahana, e e apiti i roto i te hoê ohipa pororaa o te faaora i te mau taata! Ia rohi maitai tatou no te faaite i te parau apî maitai, ma te ite e te ru nei te taime e ‘e ere i te mea faufaa ore ta tatou ohipa.’—Kor. 1, 15:58.