E faaite tatou i te poroi faahiahia roa o te Apokalupo
1 Te tauturu ra te buka Te Apokalupo: to ˈna tatararaa hopea ia tatou ia taa i te poroi faahiahia roa o te Apokalupo. E tauturu tatou ia vetahi ê ia ite e no te aha e no ratou atoa teie poroi, ma te haafaufaa i teie buka i roto i ta tatou taviniraa i te avaˈe mati. E tauturu te mau manaˈo i muri nei ia tatou ia faaineine i ta tatou faaiteraa.
2 I muri aˈe i te aroharaa i te taata, e nehenehe tatou e parau ia ˈna e:
◼ “Ua faaroo aˈena anei oe i te faahitiraahia na taata horo puaahorofenua e maha o te Apokalupo? [A vaiiho i te taata ia pahono.] E rave rahi mau faataaraa tei horoahia i nia i te mea e faahohoˈa nei i taua mau taata horo puaahorofenua ra. Tera râ, ua ite anei oe e i te tupuraa mau, e tuhaa ta ratou hororaa taipe no te parau tohu Bibilia o te faaite ra i te mau ohipa e tupu i to tatou tau, e no tatou atoa te reira i roto i te hoê huru aore ra te tahi atu? [A vaiiho i te taata ia pahono.] E hinaaro anei oe e taa i teie parau tohu e eaha to ˈna auraa no tatou?” E faaite tatou i te mau hohoˈa o te pene 16 o te buka Te Apokalupo: to ˈna tatararaa hopea e e faatuati atu tatou i te mau irava papaihia e te mau reta meumeu. Aore ra e faataa tatou i te tahi mau tuhaa o te orama maoti te api parau iti E ora anei teie nei ao? I reira tatou e pûpû ai i te buka aore ra e faanaho ai i te hoê taime farereiraa no te faahohonu atu â i te orama e to ˈna auraa.
3 Peneiaˈe e mea au aˈe na tatou e parau e:
◼ “Ua faaroo aˈena anei oe i te parau ra ‘Aramagedo’? [A vaiiho i te taata ia pahono.] E rave rahi o te manaˈo ra e tamaˈi atomi pohe te reira. Tera râ, e ohipa taa ê mau o Aramagedo. Ia au i te Bibilia, e afai mai teie ohipa i te mau tauiraa rarahi no te haamau i te mea maitai aˈe e e faatupu i te hoê hau e vai tamau.” Ia au i te huru o te taata, e taio tatou i te hoê irava mai te Apokalupo 16:16 aore ra te Salamo 37:10, 11, e i muri iho, e aratai tatou i to ˈna ara-maite-raa i nia i te pene 39 o te buka Te Apokalupo: to ˈna tatararaa hopea. E pûpû tatou i te buka ia ˈna, mai te peu e aita te taata e anaanatae ra aore ra te ru nei oia, e maiti paha tatou i te tuatapapa i te mau manaˈo tano o te api parau iti E ora anei teie nei ao?
4 E faaara paha tatou i te anaanatae ma te apee i teie manaˈo:
◼ “I teie taime o te matahiti, e rave rahi mau taata i roto i te ao nei o te manaˈo ra i te pohe e i te tia-faahou-raa o Iesu Mesia. Te aniani ra paha oe e eaha ta ˈna e rave ra mai to ˈna tia-faahou-raa mai? E rave rahi mau tupuraa maere i to tatou nei tau e taairaa to ratou e te tiaraa o Iesu i teie nei mahana i roto i te opuaraa a te Atua. Te tatarahia ra vetahi i roto i te buka o te Apokalupo. E hinaaro anei oe e ite hau atu â no nia i te opuaraa a te Atua i to ˈna tonoraa mai i ta ˈna Tamaiti i nia i te fenua nei e te auraa o te reira no oe e no to oe mau fetii?” E huti tatou i te ara-maite-raa i nia i te mau paratarapha 1 e 2 o te pene 41 o te buka Te Apokalupo: to ˈna tatararaa hopea, aore ra e haafaufaa tatou i te mau manaˈo tano o te mau vea apî o Te Pare Tiairaa e te A ara mai na! Aore ra e faaohipa tatou i te api parau iti Te hoê oraraa hau i roto i te hoê ao apî no te faaara i te anaanatae.
5 E titau manihini tatou i te oroa Haamanaˈoraa i te feia atoa o tei faaite i te anaanatae. Maoti te haamaitairaa a Iehova, e nehenehe tatou e tauturu i te hoê taata ia ‘faaroo i teie nei mau parau tohu e ia haapao i tei papaihia i roto ra’.—Apo. 1:3.