E hoˈi tatou e farerei i te feia tei farii i te mau vea aore ra i te hoê vea iti
1 Ua faaitoito Iesu i ta ˈna mau pǐpǐ ia faariro ratou iho i te mau taata ei pǐpǐ (Mat. 28:19). Eita e navai noa i te vaiihoraa i te mau buka; te hinaaro nei tatou e tauturu i te mau taata ia haere i mua i te pae varua. No reira, e tia ia tatou ia hoˈi e farerei i te feia tei anaanatae no te horoa ˈtu i te tahi tauturu.
2 Mai te peu e ua haafaufaa tatou i te hoê tumu parau o te hoê vea i ta tatou aparauraa matamua, e mea maitai ia rave faahou i taua noâ tumu parau ia hoˈi tatou:
◼ “I to ˈu tere i mairi aˈenei, ua huti au i to oe ara-maite-raa i nia i te hoê tumu parau o Te Pare Tiairaa (aore ra o te A ara mai na!) o tei faaite i te faufaaraa ia tuatapapa i te Bibilia. Ua niuhia te opuaraa a te Atua, oia hoi e pûpû i te hoê oraraa no a muri aˈe faahiahia roa no te huitaata nei, i nia i to ˈna Basileia. Te tohu ra taua parau tǎpǔ ra, i roto i te Mika 4:3, 4, e e faaore roa taua Basileia ra i te mau tamaˈi atoa.” I muri aˈe i te taioraa i te irava, a pûpû i te vea iti “Inaha!” e a faaite i te hohoˈa o te api matamua. A tuatapapa i te paratarapha matamua e te mau irava i horoahia ei faahororaa, ma te faaite e tei roto atoa te Mika 4:3, 4. A faataa i te farereiraa i mua no te tuatapapa i te paratarapha 2.
3 Mai te peu e aita te taata e anaanatae maitai ra, aore ra aita to ˈna e taime no te tauaparau, e nehenehe outou e faaoti e faaô ia ˈna i roto i ta outou eˈa opereraa vea:
◼ “I te mea e ua anaanatae oe i te mau vea ta ˈu i vaiiho mai, ua manaˈo vau e e hinaaro oe e taio i teie mau numera hopea nei. Ia manaˈo anaˈe vau e au oe i teie tumu parau.” A huti i te ara-maite-raa o te taata i nia i te hoê tumu parau ta outou e manaˈo ra e haaputapû te reira ia ˈna. A parau e te hinaaro nei outou e hoˈi mai no te afai mai i te mau numera apî i muri iho.
4 Mai te peu e e taio e e anaanatae te taata i te mau vea, e nehenehe ïa outou e pûpû atu na ˈna i te hoê tamatahitiraa:
◼ “I te mea hoi e e au ra e te anaanatae ra oe i Te Pare Tiairaa e mai te peu e e hinaaro oe, e faatae-tamau-hia teie vea ia oe ra na roto i te afata rata ia noaa noa ta oe numera tataitahi.” E pûpûhia ra te tamatahitiraa i Te Pare Tiairaa no te tino moni e 320 tara e 24 numera, na roto i te reo farani aore ra reo tahiti, e nehenehe atoa oe e tamatahiti e ono avaˈe e noaa ïa e 12 numera no te tino moni e 160 tara.
5 Mai te peu e ua vaiiho outou i te hoê vea iti e aita i faataahia i te tereraa o te hoê haapiiraa, a faanaho i te reira no te farereiraa i mua.
Ei hiˈoraa, mai te peu e ua vaiiho outou i te vea iti “Faatereraa”, a ani i te taata ia haere e tii i ta ˈna iho vea iti e a parau e:
◼ “A hiˈo na i te mea tei papaihia i te api 3 no nia i te poroi ta Iesu i poro i to ˈna oraraa i nia i te fenua.” I muri iho, a tuatapapa poto noa i te mea i papaihia i te api 3. A ani i te taata e i to ˈna manaˈoraa eaha te tia ia rave no te haapii hau atu â. A parau i muri iho e: “E mea faufaa ia taa e no te aha tatou e hinaaro rahi ai i Basileia o te Atua. Te hinaaro nei au e hoˈi mai e faataa ia oe no te aha e tia ia tatou ia huri tia ˈtu i nia i te faatereraa i faataahia e te Atua, to tatou tiaturiraa otahi roa.”
6 E rave rahi ta tatou vea iti. A tapao i te mau manaˈo anaanatae i roto i te mau vea ta outou e hinaaro ra e faaohipa. E tauturu te reira ia outou ia faaitoito i te mau taata aau rotahi ia haapii hau atu â no nia i te mau mea ta Iesu i faaue mai.—Mat. 28:20.