E rave tamau noa tatou i ta tatou mau ohipa teotaratia i te mau tau faafaaearaa
1 Te horoa mai ra te mau tau faafaaearaa i te taime no te faatupu e rave rahi mau ohipa. Mea au roa na te rahiraa o tatou e haafaufaa i te tau maitai no te taui i ta ratou mau peu e no te faaanaanatae ia ratou. E tia râ ia tatou ia vai ara ia ore e faaea roa i ta tatou mau ohipa teotaratia.—Phil. 3:16.
2 Te tiai ru nei tatou i te tairururaa mataeinaa o te tupu i te mau matahiti atoa. Ua rave anei tatou i te mau faanahoraa papu no te haere atu, ma te faaineine i te faurao e te vahi nohoraa ta tatou e titau ra? Ua manaˈo anei tatou i te hoê melo o te amuiraa o te hinaaro ra i te tauturu taa ê? E afai mai taua huru hamani maitai ra i te tahi mau haamaitairaa no te taata tataitahi.
3 Mai te peu e e taime vata to tatou, i te tau faafaaearaa haapiiraa paha, te opua ra anei tatou i te apiti hau atu â i roto i te taviniraa? Ua ite e rave rahi e taime faahiahia roa te reira no te riro mai ei mau taata pionie tauturu. Ua haamatara pinepine taua ohipa ra i te uputa no te mau haamaitairaa o te taviniraa rahi atu â. E nehenehe te mau utuafare e ite i te oaoa mau ia poro amui ratou i te mau mahana taatoa. Noa ˈtu eaha to tatou huru oraraa, e nehenehe anei tatou e horoa hau atu â i te taime no te pororaa? E te mahana maitai e te mau taime vata, e rahi aˈe tatou i te haafaufaa i te pororaa i te ahiahi.
4 No te aha e ore ai e tauturu i te hoê amuiraa i roto i te mau motu o te fifi ra i te rave i ta ˈna tuhaa fenua? E hinaaro paha te tahi atu mau taeae e mau tuahine e haere mai na muri ia tatou no te tavini hoê aore ra e piti hebedoma i te vahi e hiaai rahi ra. Mai te peu e e mea iti roa ta tatou pǔpǔ, e hinaaro paha te feia poro o te mau amuiraa tapiri e apee mai ia tatou. Mai te peu e eita tatou e nehenehe e haere i te vahi atea, e tono ïa te tiaau haaati ia tatou i roto i te hoê amuiraa piri o te mauruuru i ta tatou tauturu.
5 Te opua ra anei tatou e reva? Mai te peu e e, te faanaho ra anei tatou i te haere i te mau putuputuraa i te vahi ta tatou e haere ra? No te aha e ore ai e poro e te mau taeae o taua vahi ra? E faufaa-roa-hia tatou e o vetahi ê atoa, ia faaô tatou i taua mau ohipa ra i roto i ta tatou mau tau faafaaearaa (Roma 1:11, 12). E nehenehe anei tatou e horoa i te faaiteraa faanaho-ore-hia i roto i to tatou tereraa? E ara tatou i te afai i ta tatou Bibilia e te tahi tau buka. E haafaufaa tatou i to tatou taime vata no te apee i te taioraa e te haapiiraa i te Bibilia. E haamanaˈo tatou, e noa ˈtu e hinaaro tatou e faafaaea i te tahi taime i ta tatou ohipa, eita tatou e hinaaro e haaparuparu i roto i ta tatou taviniraa no Iehova.
6 E ara te mau matahiapo i te faanaho-maitai-raa o te mau ohipa a te amuiraa. Mai te peu e e reva te mau matahiapo aore ra te mau tavini tauturu, e tia ia ravehia i te mau faanahoraa ia haapao vetahi i ta ratou mau hopoia. Ia faaara-anaˈe-hia i te tiaau-peretiteni na mua roa i te mau taio mahana ratou e reva ˈi, e tauturu ïa te mau taeae ia ˈna ia ite eaha te mau tauiraa e rave.
7 E mea papu, e tau ohipa rahi mau te tau faafaaearaa. E nehenehe râ te mau faaanaanataeraa e tâpû ohie noa i te taviniraa tamau ta tatou e rave ra no te Basileia. E haafaufaa tatou i te mau taime e pûpûhia maira ia tatou i te roaraa o te mau tau faafaaearaa. Ia faaoti tatou eaha te mau ohipa faufaa i te pae varua, e ia mau maite atu tatou.—Phil. 1:10.