Te faaineine ra te putuputuraa no te taviniraa ia tatou no te mau ohipa maitatai atoa
1 Te tumu o te putuputuraa no te taviniraa oia hoi no te turai e no te faaineine ia tatou no te apiti rahi atu â i roto i te ohipa pororaa e te faariroraa i te mau taata ei mau pǐpǐ (Tim. 2, 3:17). Mai te peu râ eita tatou e faaineine maitai atu, aore ra aita tatou e faaohipa ra i te mea o ta tatou e haapii ra, e iti ïa te haamaitairaa ta tatou e huti mai.
2 Ma te faaineine ia tatou, e noaa hau atu â ia tatou te haapiiraa e operehia ra. E hiˈo faahou tatou i te mau buka e faaohipahia, e e rave mai na muri ia tatou no te apee e no te horoa i te pahonoraa. E faaroo maitai tatou e e tapaopao tatou i te mau manaˈo no te hiˈo faahou i muri iho.
3 E tuatapapa maite te tiaau-peretiteni i te mau tuhaa taa ê atoa o te porotarama. E maitihia te mau matahiapo e te mau tavini tauturu aravihi no te vauvau i te reira (om api 70 [farani]). I roto i te mau amuiraa aita i rahi te mau matahiapo e te mau tavini tauturu, e nehenehe e anihia i te tahi atu mau taeae aravihi no te tauturu ia ratou (km 4/77, Pahonoraa i ta outou mau uiraa). E tia i te taeae orero tataitahi ia faaineine maitai ia ˈna, ia apee maite i te mau faaueraa e ia haapao maitai ia ore ia mairi te taime i faataahia.
4 E haamata pinepine te putuputuraa na roto i te mau parau faaara. Na mua roa e haere te taeae o tei maitihia no te vauvau i taua tuhaa ra e farerei i te tiaau-peretiteni no te faaoti eaha te faahitihia. E mau rata paha a te Taiete aore ra te mau faahaamanaˈoraa no nia i te mau faanahoraa tei ravehia no te pororaa aore ra te horoaraa ˈtu i te mau tabula o te mau avaˈe atoa. E ite paha tatou e tia ia haere e farerei i te tahi feia maˈi, aore ra e faaroo tatou i te tahi atu mau tuhaa iti no nia i te mau ohipa a te amuiraa. Ia faaroo maitai tatou no te rave atoa i ta tatou tuhaa.
5 Ia anihia i te feia i putuputu mai ia pahono, e faaineine tatou ma te taio i te mau tumu parau e ma te imi i te mau irava bibilia. E feruri tatou i te mau ravea no te faaohipa i te mau manaˈo; eaha te mau pahonoraa ta tatou e horoa no te faaitoito ia vetahi ê? E nehenehe e faatia i te huru ohie o te haapiiraa e horoahia ra ma te faahiti i te hoê aamu poto i farereihia.
6 I te roaraa o te mau faahiˈoraa, e tamata tatou i te feruri e tei roto atoa tatou i te hoê â huru tupuraa, e e manaˈo tatou i te mea ta tatou e parau. E tapao tatou i te mau tatararaa e te haaferuriraa tei faaohipahia. E tamata tatou i te haamanaˈo faahou i te mea ta tatou i parau na i te taime i mairi aˈenei i roto i te hoê â tupuraa, e e hiˈo tatou e nafea te mau manaˈo o te faahiˈoraa e tauturu ia tatou ia noaa i te mau faahopearaa maitatai roa.
7 E tia i te feia o te rave i te mau faahiˈoraa e o te uiuihia ia faaineine maitai ia ratou. E tia i te taata tataitahi ia ite i te mea ta ˈna e parau e e rave i nia i te tahua. Eita te mau faahiˈoraa aita i faaineine-maitai-hia e faaitoito rahi i te feia i putuputu mai. Te hiˈo faahou nei vetahi i ta ratou faahiˈoraa ia oti te haapiiraa o Te Pare Tiairaa, no te haamatau ia ratou i nia i te tahua e ia ite atoa te mau taeae haapao i te mau taoˈa haapuai reo i te mea e hinaarohia.
8 I te tahi mau taime i te putuputuraa, e hohorahia i te hoê oreroraa parau no nia i te hoê hinaaro taa ê o te amuiraa, aore ra niuhia i nia i te hoê tumu parau tano maitai o Te Pare Tiairaa. Ia faaroo maitai tatou e ia tutava tatou i te faaohipa i te mea e parauhia ra.
9 Te hinaaro nei tatou ia ‘faaineinehia tatou no te mau ohipa maitatai atoa’. (Tim. 2, 2:21.) Te putuputuraa no te taviniraa o te hoê ïa o te mau faanahoraa ta Iehova e rave ra no te tauturu ia tatou. Mai te peu e e haere tatou ma te taiva ore i taua putuputuraa ra e e tutava tatou ma te haavare ore i te faaohipa i te mea ta tatou e haapii ra, e ‘rave faahope mau â tatou i ta tatou taviniraa’.—Tim. 2, 4:5.