Faaueraa no nia i te Putuputuraa no te taviniraa
Mai teie atu Taviniraa i te Basileia, e faaohiehia te porotarama o te Putuputuraa no te taviniraa. E mono e e faataa maitai te mau faaueraa e haamanaˈoraa i muri nei i te tumu parau “E nafea ia faaineine ia tatou no te Putuputuraa no te taviniraa,” o Ta tatou taviniraa i te Basileia no Me 2009.
◼ Oreroraa parau: E vauvauraa parau teie i nia i te hoê papai i faataahia. Eita te feia e faaroo ra e apiti mai. E hohora te taeae orero i te mea faufaa roa no te amuiraa.
◼ Uiraa e pahonoraa: Mai no te Haapiiraa o Te Pare Tiairaa, e omua poto noa mai te taeae na ˈna teie tuhaa, e ui i te mau uiraa o te mau paratarafa atoa e e faaoti poto noa. Eiaha oia ia paraparau rahi roa. E taiohia te mau irava faufaa ia taimehia. Aita anaˈe e faaueraa, eita te mau paratarafa e taiohia.
◼ Aparauraa: E oreroraa parau teie e apiti mai te feia e faaroo ra. E ere i te hoê noa oreroraa parau, e ere atoa i te uiraa e te pahonoraa.
◼ Faahiˈoraa e uiuiraa manaˈo: Na te taeae na ˈna te tumu parau e faahiˈoraa to roto e faanaho i te reira, e ere râ na ˈna e rave. E maiti oia i te feia poro aravihi hiˈoraa maitai ta ˈna e faaara oioi atu. E mea maitai aˈe eiaha e rave i te feia poro aravihi ore no te hinaaro noa e ite ia ratou i nia i te tahua. E nehenehe râ e faaohipa ia ratou ei fatu fare. Eiaha na taata poro e rave ra i te faahiˈoraa e huri i to raua tua i te feia e faaroo ra. E paraparau te feia e uiuihia ra mai nia mai i te tahua eiaha râ mai to ratou parahiraa. Ia hiˈopoahia te mau faahiˈoraa e uiuiraa manaˈo na mua ˈˈe. Ia haapoto mai te taeae i ta ˈna tumu parau no te taime ore, eiaha oia e faaore i te mau faahiˈoraa aore ra uiuiraa manaˈo. No te maiti i te feia apiti no teie na tuhaa, e ani te mau tavini tauturu i te manaˈo o te tiaau o te tino matahiapo aore ra o te tahi atu matahiapo.
Mai te peu e e faaueraa taa ê to te hoê tuhaa, a pee maite i te reira. Ia faatere te mau taeae i te Putuputuraa no te taviniraa mai teie, e tupu ïa te reira “ma te tia e ma te nehenehe.”—Kor. 1, 14:40.