Te buka o te horoa i te hoê aratairaa mau
1 Ua taui te ao ma te maere i te roaraa o te senekele XX. Noa ˈtu te mau manuïaraa faatupuhia i roto i te haapurororaa parau, i te pae rapaauraa e i roto i te mau ravea utaraa taata, aita te oraraa utuafare i faaea i te ino. Te vaiiho nei tau mirioni mau taata ia arataihia ratou e te philosopho taata, o te tauiui-noa-hia.
2 A taui oioi noa ˈi te ao nei, te ite ra te mau tavini a Iehova i te mau haamaitairaa rarahi ma te faaau i ta ˈna Parau. Te vai noa ra te Bibilia ma te ore e tauihia a tausani matahiti i teie nei, e ta ˈna mau aˈoraa te mea ohie ia faaohipa no te faaruru i te mau fifi e farereihia ra i teie nei mahana. Nafea ia tauturu i te feia farii maitai ia ite e te horoa ra te Bibilia i te hoê aratairaa mau i to tatou nei tau?
3 Mai te peu e i te taime matamua, ua vaiiho tatou i te api parau iti “No te aha e tiaturi ai i te Bibilia”, e nehenehe tatou e parau e, ia hoˈi tatou:
◼ “Te parau ra te Bibilia ma te maramarama e poroi oia no ǒ mai i te Atua ra e te pûpû mai nei ia tatou te ora mure ore mai te peu e e tiaturi tatou i ta ˈna mau parau e e faaroo tatou; e manaˈo anei oe e mea faufaa ia faahohonu i taua mau parau ra? [Vaiiho i te taata ia pahono.] A hiˈo i te mea ta te Bibilia i tohu no nia i teie faanahoraa o te mau mea. [Taio Timoteo 2, 3:1-5 i te api 5 o te api parau iti.] I to oe manaˈo, te tuea ra anei teie tatararaa i te ao i teie nei mahana? [Vaiiho i te taata ia pahono.] Te vai ra anei te mau tumu papu ia tiaturi i te mau huru tupuraa maitai roa ˈˈe i mua?” E haamau tatou i muri iho i te hoê niu o te hoê hoˈi-faahou-raa e farerei ma te hiˈopoa i na paratarapha hopea e piti aore ra i te api 161 o te buka Te Bibilia — Parau na te Atua aore ra na te taata?, ma te haafaufaa i te tiaturiraa nehenehe ta te Bibilia e horoa ra i te mau taata.
4 Mai te peu e ua putapû te taata i te faufaa ohie o te Bibilia e ua haamatara mai tatou i te mau manaˈo tumu papu o te pene 12 o te buka “Te Bibilia — Parau na te Atua aore ra na te taata?”, e nehenehe tatou e parau e:
◼ “Te anaanatae ra tatou i te mea ohie no tatou ia faaohipa, e ere anei? Aita anei oe e manaˈo ra e mea faufaa aˈe ia faaorehia te mau tamaˈi? [Vaiiho i te taata ia pahono.] Mai te peu e e haapii te mau taata ia ora ma te hau e te tahi atu mau nunaa, e haamataraa maitai roa, e ere anei? [Vaiiho i te taata ia pahono.] O ta te Bibilia i tohu mai. [Taio Isaia 2:2, 3.] Aita anei outou i aniani aˈenei nafea e afea te reira e tupu ai?” E faataa tatou i te taata e e hinaaro tatou e faahaere i te aparauraa i mua i te hoê taime e tano no ˈna.
5 Mai te peu e ua vaiiho tatou i te “Tatararaa a te ao apî”, e nehenehe tatou e parau ia hoˈi tatou e:
◼ “Ma te taio i te Bibilia o ta ˈu i vaiiho ia oe, ua ite paha oe e te faaohipa ra oia i te iˈoa o te Atua i te haamataraa e tae noa ˈtu i te hopea. O te hoê ïa vahi maitai faufaa roa ia faaauhia i te tahi mau tatararaa o te Bibilia e rave rahi. Noa ˈtu te feaa nei te tahi mau taata ia faaohipa i te iˈoa o Iehova, e tia ia tatou ia tapea i roto i te feruriraa e ua faaite mai oia i to ˈna iˈoa e mea maoro i teie nei e ua faaitoito oia i ta ˈna mau tavini ia faaohipa no te haapapu e o ˈna te Atua ora mau. A hiˈo na ta te papai salamo e faaite ra i roto i te Salamo 83:18.” Taio i te irava, i muri iho vaiiho i te taata ia pahono. Ia au i te anaanatae ta ˈna e faaite ra, e nehenehe e horoa ˈtu i te tahi atu mau haamaramaramaraa hutihia i roto i te tumu parau “Iehova”, o te haamata i te api 195 o te buka Haaferuriraa.
6 O te Bibilia anaˈe te horoa ra i te aratairaa hinaarohia e te taata (Ier. 10:23). Te haapiiraa o te Parau a te Atua o te ravea otahi roa ia ite i ta ˈna mau opuaraa e ia noaa i to ˈna farii maitai. E titau manihini tatou ma te itoito i to tatou taata-tupu ia haafaufaa i ta ˈna mau aˈoraa paari e te ohie.