E tauturu tatou ia vetahi ê ia ite i te hoê taoˈa faufaa
1 Ia poro tatou i te parau apî maitai o te Basileia, e tia ia tatou ia roaa i te hoê o te mau tapao oia hoi te tautururaa i te feia e mafatu ineine ia ite i te faufaaraa rahi o te Parau a te Atua (Phil. 3:8). E tiaraa rahi to te mau buka bibilia ta tatou e vaiiho nei i roto i te haaparareraa i te poroi o te Basileia. E mea na reira ma te haapii i te mau parau mau bibilia maoti te buka E ora e a muri noa ˈtu, ua haamata tau hanere tausani taata i te tavini ia Iehova.
2 E ere te tapao o ta tatou taviniraa o te vaiiho-noa-raa i te mau buka i te taata e hinaaro ra e rave. E tia ia tatou ia faaite i te poroi o te Basileia ma te huru anaanatae, e faaroo i te mau taata ia ite i to ratou manaˈo, e i te pae hopea ‘ia haaferuri e o ratou e te mau Papai’. — Ohipa 17:2.
3 Nafea ïa? Maoti ta tatou mau omuaraa parau, te horoa nei tatou i te taime i te mau taata ia faahiti i to ratou manaˈo e ia faaite mai te peu e te anaanatae ra ratou aore ra aita i te Bibilia e te poroi i roto.
E nehenehe tatou e parau e:
◼ “Te haere mai nei matou e farerei ia oe no te paraparau no nia i te auraa o te mau ohipa e tupu ra i teie nei mahana. E rave rahi mau taata o tei ore e tâuˈa faahou ra i te Atua e i te mau faaueraa no nia i te haerea ta ˈna i haamau i roto i ta ˈna Parau. Ua taui roa te reira i te haerea o te mau taata i rotopu ia ratou iho. Ua ite anei oe? [E vaiiho i te taata ia pahono. E nehenehe tatou e faahiti i te mau aamu papu.] A hiˈo e mea nafea te faataaraahia te huru o te tahi mau taata i roto i te Timoteo 2, 3:1-5, e e parau mai na oe mai te peu e aita anei teie faataaraa e faahaamanaˈo ra ia oe i te ao i teie nei mahana. [A taio.] E tumu papu mau anei to tatou ia tiaturi e e maitai mai te oraraa?” Mai te peu e te anaanatae ra te taata i te aparauraa, e faaite tatou ia ˈna te hohoˈa i te mau api 12 e 13 o te buka E ora e a muri noa ˈtu, e i muri iho e huti tatou i to ˈna ara-maite-raa i nia i te mau paratarapha 12 e 13. Mai te peu e aita oia e anaanatae ra, e pûpû ïa tatou ia ˈna te api parau iti Te hoê oraraa hau i roto i te hoê ao apî.
4 Mai te peu e o te hoê metua tane aore ra te hoê metua vahine o te haere mai i te uputa, e nehenehe tatou e haamata i te aparauraa mai teie te huru:
◼ “Te paraparau nei matou e te taata atoa e anaanatae ra no nia i te ravea maitai roa ˈˈe no te faatitiaifaro i te mau fifi o te utuafare. I roto i taua tuhaa ra, te tamata nei tatou paatoa i te mea maitai aˈe. Mai te peu râ te vai nei te hoê mea o te horoa mai i te mau faahopearaa maitatai roa ˈˈe, e oaoa roa tatou i te fanaˈo, e ere anei? [E vaiiho i te taata ia pahono.] Te horoa maira te Bibilia i te mau aˈoraa i roto i taua tuhaa ra, ei hiˈoraa i roto i te Kolosa 3:12-14. [A taio.] Eaha tei titauhia ra no te fanaˈo i te hoê oraraa utuafare oaoa? A hiˈo eaha ta teie buka e parau ra, i te pene ‘Mea nafea ia faatupu i te hoê oraraa utuafare fetii oaoa’”. A taio i te paratarapha 3 i te api 238 o te buka E ora e a muri noa ˈtu. Mai te peu e te ru ra te taata aore ra aita e anaanatae maitai ra, e tamata tatou i te pûpû ia ˈna te hoê vea apî no nia i te utuafare, aore ra te api parau iti Te hoê oraraa utuafare oaoa.
5 Eiaha ia moe ia tatou i ta tatou tapao oia hoi te pororaa ma te tuutuu ore no nia i te Basileia (Mat. 24:14). Mai te peu e e faaohipa maitai tatou i te Bibilia e te mau buka bibilia e vai ra ia tatou nei, e ani tatou ma te tiaturi papu ia Iehova ia haamaitai i te mau tutavaraa ta tatou e rave nei no te faatupu i to ˈna hinaaro i teie tau hopea. — Gal. 6:9.