Te faufaaraa o te Bibilia i roto i teie nei ao
1 No te rahiraa o te mau taata i teie nei mahana, e mea tahito te Bibilia e te ere ra i te parau mau. Noa ˈtu e buka opere e huri-rahi-hia i te roaraa o te Aamu, e mea iti roa te mau taata o te taio ra ia ˈna, e mea iti atu â o te pee nei i ta ˈna mau aˈoraa.
2 Area tatou nei, te haafaufaa nei tatou i te Bibilia, ma te faariro ia ˈna mai te Parau a te Atua. Te haapapu ra te mau tupuraa e mea tano i te pae o te aamu. Hau atu, te haapapu ra to ˈna tuearaa faahiahia, ta ˈna mau parau tohu, to ˈna paari e te maitai ta ˈna e turai ra i te mau taata ia rave, e mea “faaurua mai ïa e te Atua.” (Tim. 2, 3:16.) Turaihia e ta tatou iho ohipa i ite e to tatou aau mehara no taua ô faahiahia ra, e tia ia tatou ia faaitoito ia vetahi ê ia ite atoa i to ˈna faufaaraa mau.
3 E nehenehe e tauaparau i te mau taata mai teie te huru:
◼ “No te mau fifi rarahi e farereihia ra e te mau taata, e mea fifi roa no te mau taata e rave rahi ia tiaturi i te Atua. Aore ra te uiui nei ratou ia ratou iho e nehenehe anei te Atua e faatitiaifaro i to tatou mau fifi. Eaha to oe manaˈo no nia i te uiraa? [A vaiiho i te taata ia pahono.] A hiˈo na i te upoo parau o teie api parau iti: No te aha e tiaturi ai i te Bibilia.” E faaite tatou i te hohoˈa o te api matamua, e i muri iho e taio tatou i na paratarapha matamua e piti, api 2. Mai te peu e e faaite te taata i te anaanatae, e taio e tatara tatou i te mau irava horoahia ei faahororaa i te paratarapha piti. E rave tatou i te mau faanahoraa no te hoˈi faahou mai e no te hiˈopoa i te mau parau i muri iho o te api parau iti, peneiaˈe ma te faaohipa i te hoê upoo parau ei uiraa, no te faaara i te anaanatae o te taata e faaroo maira ia tatou.
4 E nehenehe atoa e rave mai teie te huru:
◼ “Aita anei oe e manaˈo ra e te hinaaro nei te mau taata i te mau aˈoraa no te faaruru i te mau fifi o te oraraa? [Vaiiho i te taata ia pahono.] I mutaa ihora, e pinepine te mau taata i te imi i te hoê aratairaa i roto i te Bibilia, tera râ ua taui te mau tau. Te manaˈo ra anei oe e faufaa ohie to te Bibilia i teie nei mahana? [Vaiiho i te taata ia pahono.] A hiˈo na i te mea i papaihia i roto i te Timoteo 2, 3:16. [Taio.] Aita te Parau papaihia a te Atua e tauturu noa ia tatou ia rave i te mau faaotiraa paari, te horoa atoa mai nei râ i te hoê tiaturiraa papu no te oraraa no a muri aˈe.” Taio i te Ioane 17:3. E faaite tatou i te taata e faaroo maira hoê aore ra e piti manaˈo papu ta tatou i maiti i roto i te buka Te Bibilia — Parau na te Atua aore ra na te taata? no te faaite ia ˈna i te faufaaraa ohie o te Bibilia.
5 E manaˈo paha outou e mea faufaa ia rave faahou i te tahi mau omuaraa parau faahitihia i te mau api 10 e 11 o te buka Haaferuriraa, i raro aˈe i te upoo parau iti “Bibilia/Atua”. Te vai ra te tahi mau haamaramaramaraa i te mau api 51-60, o ta outou paha e faaohipa no te pahono i te mau uiraa a te mau taata aore ra no te haapaiuma i te mau patoiraa.
6 Te pûpûraa i te Tatararaa a te ao apî: Mai te peu e e faaarahia te anaanatae i te farereiraa matamua aore ra i te hoê hoˈi-faahou-raa e farerei, e nehenehe e pûpû i te Tatararaa a te ao apî. E ani outou i te taata mai te peu e te vai ra ta ˈna Bibilia e mea ohie anei no ˈna ia taio. Ia au i ta ˈna pahonoraa, a faaite ia ˈna i te tahi mau haamaitairaa o te Tatararaa a te ao apî. E nehenehe outou e haapapu hoê aore ra e piti manaˈo o te api 408-411 o te buka Haaferuriraa.
7 A faaohipa i te mau taime atoa no te faaitoito i te mau taata ia taio i te Bibilia. A haapii i te feia farii maitai ia auraro e ia here i te Parau papaihia a te Atua. Ma te faaohipa i ta ˈna mau faaueraa tumu i roto i to ratou oraraa e ma te titau i te ite o te parau mau, e noaa ia ratou te mau haamaitairaa e rave rahi, i teie nei mahana e a muri aˈe. — Sal. 119:105.