Te porotarama o te tairururaa haaati i mua nei
1 Ua tuu noâ te mau kerisetiano mau i te Basileia i nia i te parahiraa matamua i roto i to ratou oraraa, ia au i te faaueraa a Iesu i roto i te Mataio 6:33. Ua tano roa ïa te upoo parau o te tairururaa haaati e tupu mai te avaˈe setepa ˈtu, “Ia tamau noa tatou i te imi na mua i te Basileia”.
2 I te omuaraa ra iho o te tairururaa, e tuuhia te tapao i nia i te vai-mau-raa o te Basileia, te hoê faatereraa e ohipa ra, te vai ra ta ˈna te hoê tuhaa fenua, te feia faatere, te mau taata auraro e te mau ture. Inaha, e rave rahi mau ture i haamauhia i teie nei tau e te mau faatereraa taata no te maitairaa o te huiraatira, ua niuhia ïa i roto i te Bibilia.
3 E faahitihia te parururaa e te mau haamaitairaa o ta tatou e fanaˈo mai te peu e e faariro tatou i te Basileia ei ohipa matamua i roto i te mau tuhaa atoa o to tatou oraraa. E horoahia mai te mau aˈoraa ohie ia faaohipa no te tauturu ia tatou ia ape i te mau haapeapearaa faufaa ore. E faaite mai te mau oreroraa parau, te mau faahiˈoraa e te mau tauaparauraa e no te aha e mea faufaa roa ia tapea i te hoê mata haehaa.
4 I te mahana maa, e nehenehe te mau taata e opua ra e bapetizo o te faaî i te mau titauraa e rave i te faˈiraa o to ratou pûpûraa ia ratou ia Iehova i mua i te aro o te taata. Hau atu, e tia ia tatou ia tae pauroa mai i te sabati no te faaroo i te oreroraa parau huiraatira oia hoi “Ta te Basileia o te Atua e faatupu no te huitaata nei”.
5 E ara anaˈe i te faanaho ia tatou no te tae atu i na mahana e piti o te tairururaa haaati. E hopoi mai te porotarama, e tae noa ˈtu te amuimuiraa au mau o to tatou mau taeae e mau tuahine, i te mau faaitoitoraa o te haapaari e o te haapuai ia tatou, te ore roa e tia i te hoê o tatou ia erehia.