E nehenehe anei outou e rave?
1 ‘E rave i te aha?’ o ta outou paha e ani mai. Te pahono ra te Maseli 3:27 e: “Eiaha oe e tapea i te maitai i te taata e au ia ˈna ia hopoi ra, tei to rima taua maitai ra ia [rave].” ‘Tei to outou rima’ anei te faaaanoraa i ta outou mau ohipa na roto i te raveraa i te taviniraa pionie tauturu aore ra tamau? E nehenehe anei outou e rave i te reira?
2 Mea faaitoito mau â ia taio i roto i te Buka matahiti 1993 (farani) e, i roto i te faito au noa, ua naeahia e 131 pionie tamau e tauturu i Polinesia nei, oia hoi te faito e 1 pionie no 10 feia poro. Te hinaaro nei matou e haapopou i te feia atoa o tei hiˈopoa i to ratou oraraa e o tei ite e e nehenehe ta ratou e rave hau atu â i roto i te taviniraa.
3 Ua riro te taviniraa pionie tauturu ei ravea no te rave i te maitai i nia ia vetahi ê. I te matahiti i mairi aˈenei, ua naeahia te hoê faito teitei e 164 pionie tauturu, e mea faahiahia roa. E rave rahi mau taata poro o te imi nei i te rave pinepine aˈe i teie taviniraa i roto i te matahiti.
4 No te faataa mai te peu e e nehenehe anei ta outou ‘e rave’ i te reira aore ra eita, e tia na mua ia hiˈopoa i te mau manaˈo e turai ra ia outou (Mat. 22:37-39). Te na ô ra te Ohipa 20:35 e: “E mea maitai i te horoa ˈtu i te rave mai.” Ma te feaa ore, te feia o te tauturu hua nei ia vetahi ê i te pae varua, e mau manaˈo maitatai ïa o te turai ra ia ratou. Mea faufaa roa ia faatupu i teie mau huru manaˈo no te riro ei taata poro aore ra ei pionie aravihi.
5 I muri iho, a hiˈopoa i to outou huru tupuraa i teie nei. E nehenehe anei outou e taui i ta outou tabula ohipa tamahana ia nehenehe outou e tavini ma te taime taatoa? Eita ta te mau taata atoa e nehenehe e na reira. Teie râ, i muri aˈe i to ratou hiˈopoaraa ia ratou iho i roto i te pure, i te mau matahiti atoa, e mau tausani feia poro o te ite nei i te ravea no te ‘rave i te reira’. (Kol. 4:5; w78 1/7 api 9, 10 [farani].) Ei hiˈoraa, te faanaho nei te mau utuafare e ia riro e rave rahi o to ratou mau melo, e peneiaˈe te taatoaraa, ei mau pionie tauturu i te tahi mau avaˈe. Te faanaho nei te tahi mau utuafare ia riro te hoê o ratou ei pionie tamau. Ua feruri anei outou i teie mau ravea e to outou utuafare? — Hiˈo Maseli 11:25.
6 Noa ˈtu e e taata poro tatou aore ra e pionie, mea na roto i te tautururaa ia vetahi ê ia ite i te parau mau e noaa mai ai te mauruuru mau. Ua ite tatou e mea na roto i te raveraa i te maitai i nia ia vetahi ê tatou e fanaˈo mau ai i te oaoa, mai te peu iho â râ e ‘tei to tatou rima te raveraa’.