E haamata tatou i te mau haapiiraa bibilia e te buka Te taata rahi roa ˈˈe
1 E faatere i te hoê haapiiraa bibilia i te fare o te taata, e mea oaoa e e horoa mai i te hoê haapiiraa, no outou e no te taata e faaroo maira. Aita ˈtu ohipa e nehenehe e faaauhia i te oaoa ia faaite ia vetahi ê i te ite no nia i te Bibilia. — Mas. 11:25.
2 Te tapao o te mau mahana hopea: Mai te peu e e pee outou i te manaˈo e horoahia ra i roto i te tumu parau i nia nei e e haamata outou i te aparauraa e te api parau iti E ora anei teie nei ao?, nafea ia haamata i te hoê haapiiraa i nia i te pene 111 o te buka Te taata rahi roa ˈˈe? A tatara i te buka i taua pene ra e a taio na paratarapha e toru matamua. A ui atu ai i te aniraa matamua i te hopea o te pene: “Eaha te mea i turai i te mau pǐpǐ ia uiui atu ia Iesu, eaha râ te tahi atu manaˈo e vai ra i roto i to ratou feruriraa?” A tauturu i te taata ia ite i te pahonoraa, i muri iho a faaohipa i te hohoˈa no te haapii. I muri aˈe i te taioraa i te mau paratarapha 4-6, a ui i te uiraa piti: “Eaha te tuhaa o te parau tohu a Iesu i tupu i te matahiti 70, eaha râ tei ore i tupu i taua taime ra?” Mai te peu e te anaanatae ra te taata e e taime to ˈna, a tamau noa i te aparauraa.
3 Mai te peu e e mea hau aˈe ia hoˈi mai i te tahi taime, a ui i te taata e: “E hinaaro anei oe e ite hau atu â no nia i te tau o te hopea o te faanahoraa o te mau mea?” A faataa i te hoê taime farereiraa no te pahono i teie uiraa.
4 E ite anei tatou i te hoê ao hau? Mai te peu e e faaohipa outou i te api parau iti Te hoê oraraa hau i roto i te hoê ao apî no te faaite atu i te buka Te taata rahi roa ˈˈe, nafea te pene 133 e tauturu ia outou ia haamata i te hoê haapiiraa?
I muri i te taioraa te Petero 2, 3:13, e taio aore ra e haapoto noa i te paratarapha piti o te api 3 o te api parau iti ma te parau faahou e:
◼ “E riro Iesu Mesia, te Tamaiti a te Atua, ei Arii no te Basileia o Iehova. A hiˈo na eaha ta te buka Te taata rahi roa ˈˈe i ora aˈenei e parau ra no Iesu e e faaite maira i te mea ta ˈna e faatupu i mua nei.” A taio i muri iho te pene taatoa. A ui i te taata e faaroo ra ia outou i te uiraa matamua, i te hopea o te pene: “Eaha te haamaitairaa oaoa mau ta te feia e ora ˈtu i Aramagedo e ta ratou mau tamarii e fanaˈo?” [A vaiiho ia ˈna ia pahono. E na reira atoa e te uiraa piti.] “E hinaaro anei oe e riro mai ei melo o te fenua apî ta Iesu e faatere na nia i to ˈna tiaraa Arii? E oaoa vau ia haere mai i te mau hebedoma atoa e tauturu ia oe ia ite i roto i te Bibilia e nafea râ.”
5 I muri iho i taua farereiraa ra, e hinaaro paha te tahi mau taata i te tahi atu mau aparauraa no nia ia Iesu.
E nehenehe outou e parau e:
◼ “I roto i teie buka, ua tutava matou i te faaite i te oraraa o Iesu i nia i te fenua, mai tei faaitehia i roto i te na Evanelia e maha. E hinaaro anei oe e ite hau atu â no nia i teie tumu parau?” Mai te peu e e farii te taata, e hinaaro paha outou e aparau no nia i te semeio matamua a Iesu, i te pene 15.
6 Te vai nei â e rave rahi taata aau rotahi o te hinaaro nei i te parau-tia e te imi nei i te hoê ravea i te mau fifi ta ratou e farerei nei. E faaite tatou ia vetahi ê i te haapiiraa a Iesu Mesia maoti te hoê haapiiraa bibilia; oia mau, e haamaitaihia ta tatou mau tutavaraa.