Ia pohe tei herehia
MAI te peu e ua pohe hoê taata tei herehia, e tauiui noa paha to oe huru: e oto, moemoe, manaˈonaˈo noa oe aita e nehenehe e rave i te tahi ohipa. E riri atoa paha oe, e faahapa oe ia oe iho aore ra e riaria atoa oe. Ua uiui paha oe, mea hoona anei ia ora?
Ia papu ia oe, e ere te oto i te hoê tapao e ua paruparu oe. E faaiteraa noa te reira no to oe here i te taata tei pohe. E nehenehe anei to oe mauiui e iti mai?
NAFEA VETAHI Ê I FAARURU AI I TERA TUPURAA?
No oe, e vai noa paha to oe mauiui e a muri noa ˈtu. E ite paha oe i te tamahanahanaraa maoti teie mau aratairaa:
A FAATAA I TE TAIME NO TE OTO
Aita te mau taata e oto hoê â huru aore ra hoê â maororaa. E taˈi oe no te haamâha rii i to oe mauiui. Te parau ra o Vanessa, tei faahitihia na mua ˈtu: “Taˈi noa vau. Ua hinaaro vau e haamâha i to ˈu mauiui.” Te na ô ra o Sofía, ua pohe taue hoi to ˈna tuahine: “Mea mauiui mau ia manaˈonaˈo noa i tei tupu. Ia na reira vau, e au ra e te paraˈuhia ra te hoê tutuˈa o tei ora. Ua navai roa i te mauiui. Tera râ, ma te feruri i tei tupu, ua nehenehe te tutuˈa e ora mai.”
A FAAITE I TO OE MANAˈO E HURU AAU
Papu maitai, i te tahi taime e hinaaro oe e vai o oe anaˈe. Mea teimaha roa râ ia amo o oe anaˈe i te oto. Teie ta Jared e parau ra, e 17 matahiti to ˈna e ua pohe to ˈna metua tane: “Ua faaite vau i to ˈu mau huru aau ia vetahi ê. Aita paha vau i paraparau ma te papu maitai. Tera râ, mea au aˈe na ˈu ia na reira.” Teie ta Janice, tei faahitihia ˈtu i te tuhaa matamua o teie tumu parau, e faaite ra: “Mea mahanahana roa no ˈu ia paraparau ia vetahi ê. Ua taa ia ratou to ˈu huru, e aita vau e moemoe faahou.”
A FARII I TE TAUTURU
Te na ô ra te hoê taote: “Ia farii te taata o te oto ra i te tauturu a to ˈna mau fetii e hoa, mea ohie aˈe no ˈna ia faaoromai no te maitai mai.” A faaite i to oe mau hoa eaha ta ratou e nehenehe e rave no te tauturu. Te hinaaro nei ratou e tauturu, aita râ ratou e ite nafea.—Maseli 17:17.
A FAAFATATA ˈTU Â I TE ATUA
Te parau ra o Tina: “I te pohe-taue-raa ta ˈu tane no te mariri ai taata, aita vau e nehenehe faahou e paraparau ia ˈna no nia i to ˈu mau huru aau, e paraparau ïa vau i teie nei ia Iehova! Te ohipa matamua ta ˈu e rave i te poipoi, o te aniraa ïa i ta Iehova tauturu ia noaa ia ˈu te faaoromai. Ua tauturu mai te Atua hau atu â i ta ˈu e nehenehe e faataa.” Te na ô ra o Tarsha, e 22 matahiti to ˈna i te taime i pohe ai to ˈna metua vahine: “Ua mahanahana roa vau i te taioraa i te Bibilia i te mau mahana atoa. Maoti te reira, ua feruri au i nia i te mau manaˈo itoito mau.”
A HIˈO ATEA I TE TIA-FAAHOU-RAA
Te parau atoa ra o Tina: “Na mua ˈtu, aita te tiaturiraa o te tia-faahou-raa i tamahanahana mai ia ˈu no te mea ua hinaaro vau e ite i ta ˈu tane i taua taime ra. Tera atoa te hinaaro o ta ˈu na tamaroa. Tera râ, i teie nei, maha matahiti i muri aˈe, te tapea papu noa nei au i te tiaturiraa o te tia-faahou-raa, mai te hoê taura o ta ˈu e tapea noa nei. A feruri noa ai au i te taime no te farerei atu ia ˈna, e fanaˈo ïa vau i te hau e te oaoa!”
Eita paha oe e maitai oioi mai. Tera râ, mea mahanahana mau te hiˈoraa o Vanessa. Te parau ra oia: “No oe, aita roa ˈtu oe e ite i te maitai. E iti mai râ to oe mauiui i te roaraa o te tau.”
A haamanaˈo na: Te mihi noâ ra oe i tei herehia. Noa ˈtu, mea hoona te oraraa. Maoti te tauturu î i te here a te Atua, e nehenehe oe e oaoa i roto i te mau auhoaraa maitatai e e fanaˈo atoa i te hoê oraraa faufaa mau. E fatata te Atua i te faatia mai i te mau taata tei pohe. Te hinaaro nei oia ia tauahi oe i tei herehia. E maitai roa mai to oe aau e a muri noa ˈtu!