Ia taiva to oe hoa faaipoipo

Te na ô ra o Maria, no Paniora: “Ua hinaaro vau e pohe a parau mai ai ta ˈu tane e e faarue oia ia ˈu no te hoê vahine apî aˈe. Mea ino roa ˈtu. Ua haamanaˈo vau i te mau haapaeraa ta ˈu i rave no ˈna.”

Te parau ra o Bill, no Paniora: “Mai te huru ra e ua pohe vau i te taime i faarue taue ai ta ˈu vahine ia ˈu. Ua ore roa ta taua mau moemoeâ, ta taua mau tiaturiraa e opuaraa. Ua manaˈo vau i te tahi taime e ua maitai mai au. Tera râ, ua hepohepo faahou vau.”

TE MAUIUI mau ra te hoa faaipoipo hapa ore. Papu maitai, te vai ra te hoa faaipoipo o te nehenehe e faaore i te hara a te hoê hoa faaipoipo tei hapa e tei tatarahapa e o te nehenehe e tutava i te haamaitai i to raua faaipoiporaa.a Tera râ, mai te peu e e faaea noa raua aore ra eita, e ahoaho roa te hoa faaipoipo hapa ore. Nafea te hoa faaipoipo hapa ore e faaoromai ai i te mauiui?

IRAVA BIBILIA O TE TAUTURU MAI

Noa ˈtu te mauiui, ua tamahanahanahia te hoa faaipoipo hapa ore e rave rahi maoti te Bibilia. Ua haapii mai ratou e te ite ra te Atua i to ratou roimata e te taa ra ia ˈna to ratou mauiui.—Malaki 2:13-16.

“I rotopu i to ˈu nei manaˈo tapitapi i roto ia ˈu nei, na to haamahanahana e faaoaoa mai i tau varua.”—Salamo 94:19.

Teie ta Bill e parau ra: “A taio ai au i taua irava ra, mai te huru ra e ua tamahanahana Iehova ia ˈu ma te here, mai te hoê metua tane î i te aumihi.”

“I te feia e aroha [aore ra taiva ore] ra, ua aroha [aore ra taiva ore] atoa oe.”—Salamo 18:25.

Te faataa mai ra o Carmen, ua taiva ta ˈna tane ia ˈna e rave rahi avaˈe i te maoro: “Ua taiva ta ˈu tane ia ˈu. Ua tiaturi râ vau i to Iehova taiva-ore-raa. Aita roa ˈtu Oia e taiva ia ˈu.”

“Eiaha ïa e haapeapea noa ˈˈe, na roto râ i te pure e te taparuparuraa e te haamaitairaa, a faaite i ta outou mau aniraa i te Atua. E na te hau o te Atua, tei hau ê i te mau manaˈo atoa, e tiai i to outou aau e feruriraa na roto i te Mesia ra o Iesu.”—Philipi 4:6, 7.

Te na ô ra o Sasha: “Te taio noa ra vau i taua irava Bibilia ra. A pure atu â ˈi au i te Atua, ua horoa oia i to ˈna hau i roto i to ˈu oraraa.”

Ua hinaaro te mau taata atoa tei faahitihia i roto i teie tumu parau e taora i te tauera i te tahi taime. Ua tiaturi râ ratou ia Iehova e ua puai atu â ratou maoti te taioraa e te feruriruriraa i nia i te Bibilia. Teie ta Bill i faataa: “Mai te huru ra e ua arepurepu roa to ˈu oraraa. Tera râ, na to ˈu faaroo i tauturu mai ia haafaufaa faahou i te oraraa. Noa ˈtu i haere na vau ‘na te peho ra o te mǎrǔ pohe,’ ua vai noa te Atua i pihai iho ia ˈu.”—Salamo 23:4.

a No te ite e titauhia anei ia faaore i te hapa aore ra aita, a hiˈo i te anairaa tumu parau “Ia taiva te hoê hoa faaipoipo” itehia i roto i te vea A ara mai na! o te 22 no Eperera 1999 (Farani).

Eaha te nehenehe e tauturu mai?

A feruriruri i nia i te mau irava Bibilia tamahanahana mau.

Te faataa ra o Bill: “Ua taio vau i te buka Ioba e i te mau Salamo ma te reni i te mau irava atoa e tano ra i to ˈu tupuraa. Ua taa ia ˈu e ua ora atoa taua mau taata papai Bibilia ra i te hoê â huru mauiui e ahoaho i to ˈu.”

A ite i te tamahanahanaraa i roto i te upaupa.

Te haamanaˈo ra o Carmen: “Ia ore au e nehenehe e taoto i te po, e faaroo vau i te upaupa. Ua riro te reira ei tamahanahanaraa mau no ˈu.” Te na ô ra o Daniel: “Ua haapii au i te faataˈi i te tita e ua tauturu te reira ia ˈu ia ite i te hau o roto mai.”

A faaite i to oe mau huru aau.

Te na ô ra o Daniel: “Aita vau i matau i te faaite i to ˈu huru aau. E mau hoa maitai râ to ˈu. Ua paraparau vau ia ratou i te mau mahana atoa. Ua faaite atu vau i to ˈu mau huru aau ma te papai atu i te mau rata aore ra ma te paraparau roa ˈtu ia ratou. Ua tauturu mau te reira ia ˈu.” Te parau ra o Sasha: “Mea faufaa roa te tauturu a to ˈu utuafare. To reira noa to ˈu metua vahine no te tauturu mai. I te mau taime atoa i hinaaro ai au e paraparau, ua faaroo noa mai o ˈna. Ua ohipa atoa to ˈu metua tane ia ore au e haapeapea. Ua tauturu atoa mai oia ia maitai mǎrû noa mai au.”

A tamau i te pure.

Te parau ra o Carmen: “Ua tamau vau i te pure. Aita te Atua i faarue ia ˈu, ua faaroo noa mai râ oia e ua tauturu mai oia. I te roaraa o tera taime mauiui mau, ua faafatata ˈtu â vau i te Atua.”