Te hoê poroi e noaa ˈi te ora mure ore

“Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—IOANE 17:3.

E NEHENEHE te ite e faaora i te taata. I Niger, a maˈihia ˈi Nouhou, te hoê aiû e ahuru avaˈe, ua ite to ˈna mama eaha te rave no te mea e taata ite o ˈna i te pae rapaauraa. Ua faainu oia i ta ˈna aiû i te pape inu mâ ta ˈna i tatihota e i tamiti. Ia au i te afata a te mau Nunaa Amui no te tamarii (UNICEF), ua ora mai ta ˈna tamarii no te mea ua haa oioi oia e ua ite i te mau ravea rapaauraa.

E nehenehe atoa te ite o te Bibilia e faaora i te taata. Ua parau te taata papai Bibilia matamua ra o Mose: “E ere hoi teie i te parau faufaa ore ia outou; o to outou ïa ora: e o te mea teie e maoro ai to outou pue mahana.” (Deuteronomi 32:47) E nehenehe anei te Bibilia e haamaoro i to tatou pue mahana? E nafea e noaa ˈi te ora mure ore maoti ta ˈna poroi?

Ua faaite na tumu parau e pae matamua e aita e buka e nehenehe e faaauhia i te Bibilia no nia anei i ta ˈna mau parau tohu tei tupu noa iho â, te tanoraa i te pae o te tuatapaparaa e o te ihi, to ˈna au-maite-raa e ta ˈna aratairaa au mau. E tapao te reira e mea otahi te Bibilia. No reira, ia faaite mai oia i te ravea e noaa ˈi te ora mure ore, no te aha e ore ai e hiˈopoa maite i te reira?

Te faaitoito nei matou ia oe ia haapii e nafea te ite mau o te Bibilia e aratai ai i te hau o te feruriraa i teie nei e i te oaoa i te tau no a muri aˈe. E oaoa te mau Ite no Iehova i te faaite ia oe e nafea ia noaa i teie ite.

[Tumu parau tarenihia/Hohoˈa i te api 9]

Mea otahi atoa te Bibilia, no te mea o ˈna anaˈe te pahono ma te papu i te mau uiraa faufaa roa ta tatou e uiui ra:

• No te aha tatou e ora ˈi?

• No te aha mea rahi roa ˈi te mauiui?

• E tiaturiraa anei to tatou no te feia herehia tei pohe?

E ite oe i te mau pahonoraa Bibilia i roto i teie buka, Eaha ta te Bibilia e haapii mau ra?, piahia e te mau Ite no Iehova.