E tauturu anaˈe ia vetahi ê ia noaa i te ite e aratai i te ora
1 Ua faataa te aposetolo Paulo e ‘te hinaaro o te Atua, ia ora ïa te taata atoa e ia noaa te ite papu i te parau mau.’ (Tim. 1, 2:4) Nafea tatou ia tauturu ia vetahi ê ia fanaˈo i taua ite nei? Hoê ravea, o te hoˈiraa ˈtu ïa e farerei i te feia o tei anaanatae i te buka ra Te ite e aratai i te ora mure ore. Te vauvau nei teie buka i te parau mau bibilia na roto i te mau parau maramarama, te ohie e tei maiti-maitai-hia. Ia haapii ratou i teie buka, e nehenehe ïa te mau huru taata atoa e arataihia i te ora. Eaha ta tatou e nehenehe e parau no te tauturu ia vetahi ê ia haapii e o tatou nei?
2 E nehenehe tatou e pûpû i te hoê haapiiraa i te feia o te farii i te Bibilia ei aratai papu, ma te parau atu e:
◼ “I te taime i mairi aˈenei, ua ite mai tâua e no te aha tatou e nehenehe ai e tiaturi i te Bibilia ei aratai papu no tatou. I te mea e ua faauruahia mai oia e te Atua, ua riro atoa te Bibilia ei pu hape ore e noaa mai ai te tamahanahanaraa e te tiaturiraa, mai ta te hoê aposetolo a te Mesia ïa i haapapu. [A taio i te Roma 15:4.] Ua faahope tâua i te aparauraa i nia i teie uiraa: nafea tatou tataitahi e faufaahia ˈi i te ite e vai ra i roto i te Bibilia?” A taio i te paratarapha 18 i te api 11 o te buka Te ite. A faaite atu e te aratai nei te mau Ite no Iehova tau pae mirioni haapiiraa bibilia na te ao nei, ma te tauturu i te taata na te mau vahi atoa, ia fanaˈo i te ite e aratai i te ora mure ore. A parau i te taata e faaroo maira e, e nehenehe tatou e faaite poto noa ˈtu nafea ia faaterehia te hoê haapiiraa, ma te faaohipa i na paratarapha matamua e pae o te pene 1.
3 Mai te peu e ua paraparau tatou no nia i te pure i ta tatou tauaparauraa matamua ra, e nehenehe tatou e tamata i te haamata i te hoê haapiiraa na roto i teie huru faaiteraa:
◼ “Te tiaturi nei au e ua oaoa oe i ta tâua aparauraa no nia i te pure, i roto i te buka ra Te ite e aratai i te ora mure ore. Ua parau atu vau ia oe i te taime i mairi aˈenei e, e hoˈi mai au ia tuatapapa tâua e nafea te feia e pure nei i te Atua ia faaroo atoa ˈtu ia ˈna. A hiˈo na i te parau faahitihia i te api 158. [A taio i te paratarapha 18.] Na roto i te haapiiraa tatou tataitahi i te Bibilia, mea na reira ïa tatou e faaroo ai i te mea ta te Atua e hinaaro ra e faaite mai. E fatata ˈtu ïa tatou ia ˈna e e tauturu atoa te reira ia tatou ia faatitiaifaro i te mau fifi farereihia i te mau mahana atoa no reira hoi tatou e pure ai. E oaoa roa vau i te haapii i te Bibilia e o oe.” Mai te peu e e farii te taata, a haamata i te haapiiraa i nia i te pene matamua o te buka Te ite.
4 Mai te peu e ua faaau roa ˈtu tatou i te haapiiraa, e nehenehe tatou e parau atu i te taata, ei faatuatiraa e te aparauraa matamua e:
◼ “Ua rave au i te faanahoraa no te haere faahou mai e hiˈo ia oe, no te mea te hinaaro nei au e faataa hohonu atu â no nia i ta matou porotarama haapiiraa bibilia tamoni ore. Ua vaiiho mai au i te hoê buka na oe, Te ite e aratai i te ora mure ore; o te buka ïa ta matou e faaohipa nei. A hiˈo na e nafea oia ia tauturu ia tatou ia tuatapapa i te Parau a te Atua. [A taio i te paratarapha 23, api 22.] A rave mai na i ta oe buka, ia nehenehe tâua e haamata faahou i te haapiiraa i te vahi o ta tâua i faaea.” Mai te peu e aita tatou i haamata i te haapiiraa i te taime na mua ˈtu, e nehenehe tatou e parau e: “Peneiaˈe e taime tano teie no te faaite ia oe nafea matou ia haapii i te Bibilia.” I muri aˈe i te tuatapaparaa i te tahi mau paratarapha, a faanaho i te hoê taime farereiraa no te haapiiraa i mua nei.
5 Mea na roto i te faaohiparaa i te buka Te ite e nehenehe mau ai tatou e haaparare i te ite papu ia maitaihia vetahi ê. (Mas. 15:7) E oaoa roa te feia aau tia, e e turai puai oia i te feia e faaau nei i to ratou oraraa i te parau-tia a Iehova, e aratai tia ˈtu ai ia ratou i te ora mure ore.