E tauturu no teie tau

“E lamepa ta oe parau i to ˈu nei avae, e tiarama no to ˈu nei mau eˈa.”—SALAMO 119:105.

NO TE AHA MEA TAA Ê AI TE BIBILIA? E buka maitai roa paha te tahi mau papai, eiaha râ no te aratai ia tatou. E e titauhia ia faaapî tamau i te mau buka haapiiraa. Area râ te Bibilia, te na ô ra ïa: “Te mau parau atoa hoi i papaihia i mutaa ihora, i papaihia ïa ia ite tatou.”—Roma 15:4.

TE HOÊ HIˈORAA: Aita te Bibilia e horoa ra i te mau ravea rapaauraa, te horoa maira râ i te mau manaˈo tauturu ia maitai tatou i te pae tino e aau. A hiˈo na, te parau ra te Bibilia e “tei te maˈi ore to te aau, o to te tino ïa ora.” (Maseli 14:30) Te faaara atoa maira te reira: “O tei faataa ê ia ˈna ihora, te imi ra ïa i to ˈna ihora hinaaro; e mârô oia i te imi i te mau paari atoa.” (Maseli 18:1) Te parau atoa nei râ te Bibilia e “e mea maitai i te horoa ˈtu i te rave mai.”—Ohipa 20:35.

EAHA TA TE MAU MAIMIRAA E FAAITE RA? E nehenehe te mǎrû, te auhoaraa piri e te aau horoa noa e haamaitai i to outou ea. Te faaite ra te hoê vea (The Journal of the American Medical Association): “Ia faaauhia i te mau tane e haavî ra i to ratou riri, e tataipiti te mau tane e riri taue nei i te atâtaraa e ia faaea to ratou roro i te ohipa.” Ia au i te hoê titorotororaa i ravehia i Auteralia i te roaraa ahuru matahiti, e ora maoro aˈe te feia paari “e hoa e e taata tiaturihia anaˈe to ratou no te paraparau atu.” E i 2008, ua itea i te feia maimi no Kanada e no Marite e e oaoa aˈe te hoê taata ia faaohipa oia i ta ˈna moni no vetahi atu.

EAHA TO OE MANAˈO? E tiaturi anei oe i te mau aˈoraa i te pae o te ea no ǒ mai i te tahi atu buka tei papaihia a fatata e 2 000 matahiti aˈenei? Aore ra i te Bibilia anaˈe?

[Parau iti faaôhia i te api 8]

‘Mea au roa na ˈu te Bibilia no ta ˈna mau aˈoraa maitai roa i te pae rapaauraa.’—HOWARD KELLY, MELO O TEI HAAMAU I TE HOÊ HAAPIIRAA TUATORU (JOHNS HOPKINS UNIVERSITY SCHOOL OF MEDICINE)