Te avariraa i te Pu Haapiiraa a te Taiete Watchtower—Te hoê oroa na Iehova

MAI mutaa iho mai â, ua riro te mau oroa oaoa ei tuhaa o te haamoriraa mau. Ia faatupuhia te tahi mau oroa i Iseraela i tahito ra, e rave rahi mahana te mairi e e rave rahi tausani taata haamori a Iehova te haere. E hitu mahana te avariraahia te hiero a Solomona e i muri iho, ua faatupuhia te Oroa Patiaraa tiahapa hoê hebedoma i te maoro. Maoti te reira i nehenehe ai te mau ati Iseraela e feruri i te mau mea faahiahia ta Iehova i rave no ratou. E hoˈi ratou i te fare “ma te rearea e ma te oaoa te aau i te mau maitai atoa ta Iehova i rave.”—Te mau arii 1, 8:66.

Ua faahaamanaˈo te ohipa i tupu i te Pu Haapiiraa a te Taiete Watchtower i Patterson, i New York, i te mau Hau Amui no Marite, mai te 17 e tae atu i te 22 no Me 1999, i te mau manihini i taua mau oroa oaoa i tahito ra. E hebedoma ohipa taa ê teie i niuhia i nia i te avariraa o na 28 fare i hamanihia no te turu i te haapiiraa Bibilia na te fenua atoa nei. Ua ravehia te mau faanahoraa ia nehenehe na 5 400 melo atoa o te pu i Brooklyn, i Wallkill, e i Patterson e mataitai i te mau fare atoa i Patterson i taua hebedoma faahiahia roa ra. I roto i te mau manihini, te vai ra hau atu i te 500 melo tahito i apiti atu i roto i te paturaa o te pu haapiiraa, te mau tia no ǒ mai e 23 amaa a te Taiete Watch Tower, e te mau amuiraa tapiri—te taatoaraa e 8 100 aˈe taata.

Te horoa ra te mau faaiteiteraa i te hoê haapiiraa

Ua faanahohia te tahi mau faaiteiteraa taa ê, te tahi mau pataraa hohoˈa video haapiiraa, e te mau haamataitairaa ia matau hoi te mau manihini i te pu haapiiraa. I te vahi fariiraa taata rahi, e huti-oioi-hia te ara-maite-raa o te mau manihini i nia i te hoê hohoˈa iti o te hiero i vai na i Ierusalema i te tau a tavini ai Iesu i te fenua nei. Ua haamatara te tahi atu mau faaiteiteraa i te aamu matamua o te Haapiiraa Bibilia no Gileada a te Taiete Watchtower, te mau tairururaa faahiahia roa ˈˈe, te mau putuputuraa a te amuiraa, te haamataraahia i teie nei tau te mau haapiiraa Bibilia i te fare o te taata—e mau mirioni teie e faaterehia nei i te mau hebedoma atoa—e te ohipa e ravehia ra e te Tuhaa tuatiraa e te Ture ia matara noa te uputa no taua ohipa ra no te pee i te faaueraa a Iesu.—Mataio 28:19, 20.

I roto i te piha rahi tapiri, 1 700 parahiraa au maitai to roto, ua patahia te hoê hohoˈa video e 33 minuti teie te tumu parau “Eiaha i te puai—I ta ˈu varua râ!” na te mau manihini o te mau oroa avariraa. Ua faaite teie hohoˈa video nafea te Pu Haapiiraa a te Taiete Watchtower i te faraa mai. Ua faaite te mau uiuiraa manaˈo i te tahi mau ohipa iti i tupu, o te faataa maitai ra i te aratairaa a Iehova i te mau mea e ta ˈna haamaitairaa i te mau tutavaraa e faaoti ma te manuïa i teie paturaa 15 matahiti i te maoro. E mau tausani taata tei apiti atu i roto i te paturaa. I te hoê taime i te matahiti 1994, e 526 rave ohipa to nia i te vahi paturaa, tae noa ˈtu e 350 taata tauturu ma te taime taatoa, 113 rave ohipa no te hoê taime, e e 63 o tei haere mai e tauturu i te mau mahana atoa. Mea rahi atu â tei turu i te ohipa maoti ta ratou mau ô. Ua taa ia ratou pauroa e e ore roa ˈtu te reira e manuïa maori noa râ te varua o Iehova.—Zekaria 4:6.

Ua nehenehe te feia i mataitai haere e ite e te tapao o te ohipa e ravehia ra i te pu haapiiraa, o te tururaa ïa i te haapiiraa a te Atua. Ua haamatara te faaiteiteraa e vai ra i te pae uputa o te Haapiiraa Gileada i te tahua matamua o te fare haapiiraa i te tufaa faufaa rahi i te pae varua e te aamu o te haapiiraa. Mai ta ˈna pǔpǔ matamua mai i te matahiti 1943 i te fare haapiiraa matamua i South Lansing, i New York, ua faaineine te Haapiiraa Gileada hau atu i te 7 000 taata haapii no te taviniraa mitionare. I te piti o te tahua o te fare haapiiraa, te vai ra te mau hohoˈa o te Haapiiraa no te mau melo o te Tomite a te Amaa e te Haapiiraa no te mau tiaau ratere, i reira ratou atoa e haapiihia ˈi. Mai to ˈna haamataraa mai i te avaˈe Novema 1995, ua horoa te haapiiraa o te amaa i te haapiiraa teitei no na 360 melo o te Tomite a te Amaa o na 106 fenua.

A mataitai ai te mau manihini, ua taa oioi ia ratou e i te rahiraa o te mau vahi, aita noa ratou i ite i te mau hohoˈa. Ua nehenehe ratou e haere roa ˈtu i roto i te mau tuhaa ohipa e rave rau, e mataitai i te mau piha ohipa e te tahi atu â mau vahi raveraa ohipa, e e ite hohonu i te ohipa e ravehia ra. Te hoê vahi faahiahia roa tei mataitaihia, o te fare ïa o te mau Tuhaa ripene haruharu e ripene video. E mau fare maitatai roa te faaohipahia ra no te turu i te haapiiraa Bibilia! Na roto i te hoê anairaa faaiteiteraa roro uira e ripene video poto noa, ua tauturuhia te mau manihini ia taa nafea te reo e haruharuhia ˈi e nafea te mau ripene video e faaineinehia ˈi. Ua ite ratou i te mau maimiraa rahi no nia i te faaineineraa i te mau tauihaa e te mau ahu. Ua ite ratou nafea te tahua e faanahohia ˈi ma te moni mama e te haapao maitai roa râ. Ua ite mata ratou nafea te upaupa e hautihia ˈi ia manaˈo te taata e tei roto ratou i te hohoˈa ta ratou e mataitai ra. Mai te matahiti 1990 mai, ua haruharu te Taiete hoê ahuru ripene video na roto e 41 reo, o te haamatara ra e rave rau tumu parau Bibilia, taa ê atu i te tahi atu â mau ripene video no te feia e faaohipa i te Reo Ǎparaa rima Marite.

E rave rahi taata tei haere e mataitai i te Piha no te mau hohoˈa i patahia, te Tuhaa o te mau Hohoˈa, te mau Tuhaa Haamaramaramaraa, e horoa ra i te tahi haapiiraa e tauturu i te pae roro uira, te Piha ohipa o te taviniraa, e tiaau ra i te ohipa a na 11 242 amuiraa e a na 572 tiaau ratere, e te Tuhaa e haapao ra i te pahono i te mau uiraa Bibilia, fatata 14 000 uiraa e tatarahia i te matahiti hoê. E neneihia te reira e te mau maimiraa i muri mai i te mau rata o te haponohia e te anaanatae mau no te feia e faaruru ra, ia au i ta ratou mau uiraa, i te mau fifi rahi.

Mea rahi noa te haere e mataitai i te mau Tuhaa huriraa. Ua maere ratou i to ratou iteraa e ua nenei te Taiete i te mau papai Bibilia na roto 102 reo hau i roto i na pae matahiti i mairi. Na te ao nei, fatata e 80 % o te mau Ite no Iehova e taio nei i te mau papai a te Taiete na roto i te mau reo taa ê atu i te reo Beretane. No te haapao i to ratou mau hinaaro, hau atu i te 1 700 taata tauturu e rave ra i te ohipa i roto i te tuhaa huriraa i roto 100 fenua. Te vai ra te mau faaiteiteraa o Te Pare Tiairaa na roto i te mau reo Marite, Europa, Asia, e Afirika. Ua nehenehe te mau manihini e ite i te Traduction du monde nouveau o te Bibilia tei neneihia na roto e 31 reo. Ua ite ratou e te vai ra te mau papai a te Taiete na roto e 332 reo e ua neneihia te buka rairai ra Eaha ta te Atua e titau ra ia tatou? na roto e 219 o taua rahiraa reo ra.

I te Tuhaa tuatiraa e te Ture, ua faaitehia i te mau manihini te mau tuhaa ohipa e rave rau e tia ia haapaohia ia au i te ture na te ao nei. I roto i te hoê ripene video, ua ite ratou i te hoê haavaraa mau e te tatara ra te hoê paruru Ite i te hoê fifi i te paeau o te pâmuraa toto. Ua ite atoa ratou eaha te ravehia ra ia matara noa te uputa no te poro i te parau apî maitai i mua i te taata. (Philipi 1:7) Ua hutihia te ara-maite-raa i nia i te faaotiraa i ravehia i te avaˈe Mati o teie matahiti, e te hoê tiribuna mataeinaa a te hau, e faaue ra i te tuhaa oire no Oradell, i New Jersey, i te mau Hau Amui no Marite, ia taui i ta ˈna mau ture no te faaore i te parau faatia e te tareta i titauhia i te mau Ite no Iehova e hinaaro ra e apiti i roto i ta ratou taviniraa i mua i te taata na te mau fare i roto i taua oire ra.

E ere te reira anaˈe ta te mau manihini i ite. Ua mataitai atoa ratou i te mau faaiteiteraa o te paturaa i roto i te Fare o te mau tauihaa i hamani-ê-na-hia e te mau Fare tamâraa i te pape ino, te Pu horoaraa uira, te Fare o te pape inu, e te mau fare atuaturaa e rave rahi, taa ê noa ˈtu te tahi atu mau fare. E taime otahi mau â te reira.

Te haamatara ra te porotarama avariraa i te haapiiraa a te Atua

Ua tupu te porotarama avariraa i te Mahana toru 19 no Me i te hora 4 i te taperaa mahana. I roto i na 6 929 taata oaoa i tae mai, te vai ra te mau melo o te pu rahi, te mau manihini o te Taiete, e na 372 i putuputu i te amaa no Kanada, o tei taaihia maoti te roro uira.

Ua oaoa mau â te feia i putuputu mai i te faarooraa i te mau parau manava tamahanahana a Milton G. Henschel, te peretiteni o te Taiete Watch Tower. I muri iho, ua vaiiho Theodore Jaracz, melo o te Tino Aratai e peretiteni o te avariraa, i te parahiraa ia William Malenfant. I roto i ta ˈna oreroraa parau “Te mau tupuraa faufaa o te porotarama paturaa,” ua uiui oia e toru taeae e tuhaa faufaa ta ratou i rave i roto i te opuaraa, te hamaniraa i te hohoˈa fare, e te paturaa i te Pu Haapiiraa a te Taiete Watchtower. I roto i te mau uiuiraa manaˈo, ua parauhia e i roto i te mau matahiti o te ohipa paturaa, hau atu i te 8 700 rave ohipa no te hoê taime tei aufau i te mau haamâuˈaraa no te haere i te paturaa. Auê ïa faaiteraa maitai i te tahoêraa e te horoa maitai ta te haapiiraa a te Atua i faatupu!

Ua vauvauhia i muri iho te hoê oreroraa parau tatuhaahia “Te haapiiraa a te Atua i nia i te fenua atoa.” E maha melo o te Tino Aratai tei vauvau i te reira. Ua haamatara John E. Barr e ua niuhia te haapiiraa a te Atua i nia i te Parau a te Atua, te Bibilia, o te faaitoito ra i te mau Kerisetiano ia ‘faatupu i te mau ohipa maitatai e ia rahi hoi to ratou ite papu i te Atua.’ (Kolosa 1:10) Ua faataa Daniel Sydlik nafea te haapiiraa a te Atua e faanahohia ˈi ma te raveraa teotaratia na nia mai i te upoo o te amuiraa Kerisetiano, o Iesu Mesia e tae atu i te mau melo atoa o te huitaeae na te ao atoa nei. (Korinetia 1, 12:12-27) Ua faaite na piti tuhaa hopea o te oreroraa parau, i vauvauhia e Gerrit Lösch raua Carey Barber, nafea te haapiiraa a te Atua e faaineine ai i te mau tavini ia poro ratou i te taata i te mau vahi atoa e ia haapii ia ratou ia haere atoa ratou na te eˈa o te Atua.—Isaia 2:1-4; Korinetia 2, 3:5.

Ia matau te feia i putuputu mai i te mau haapiiraa e rave rau i teie pu haapiiraa, ua ravehia te tahi mau uiuiraa manaˈo e aparauraa e te mau taeae i horoa i te haapiiraa e vetahi atu i apiti mai i roto i te tereraa o te reira. Ua faaitehia eaha te tuhaa a te haapiiraa taitahi i roto i te haamauraa i te porotarama o te haapiiraa a te Atua na te fenua atoa nei. Ua haamatarahia e te tuu ra te Haapiiraa no Gileada i te tapao i nia i te haapiiraa i te buka taitahi o te Bibilia, i te aamu o te nunaa o Iehova i teie nei tau, e i te faaineineraa no te taviniraa mitionare. I roto i te haapiiraa o te amaa, e tuatapapa-taatoa-hia ma te faahiahia te mau tuhaa ohipa e rave rahi a te mau melo o te Tomite a te Amaa. Ua faataahia te Haapiiraa no te mau Tiaau Ratere eiaha noa no te haapao i te mau hinaaro o te mau taeae ratere, no te faaineine atoa râ ia ratou ia horoa hoi ratou i te tauturu i te pae varua no te maitai o te mau amuiraa.

No te faaoti i te porotarama au maitai, ua hohora Lloyd Barry, melo o te Tino Aratai i te oreroraa parau o te avariraa “Te paturaa e to tatou Poiete Rahi.” Ua faaite oia e te oaoa ra te Poiete, o Iehova, i ta ˈna mau mea atoa i poiete e te titau maira oia ia oaoa tatou e o ˈna. (Isaia 65:18) I te mea e ‘na te Atua i faatia i te mau mea atoa,’ o te Atua ra o Iehova ïa te au ia faahanahanahia no teie paturaa atoa. (Hebera 3:4) I muri aˈe i to ˈna faahitiraa i taua mau manaˈo ra, ua faaoti te taeae orero i te hoê pure rotahi no te pûpû i te Pu Haapiiraa a te Taiete Watchtower no Iehova, to tatou Poiete Rahi.a

Aita e feaaraa, e haamanaˈo noa te feia i putuputu mai i te mau oroa o taua hebedoma taatoa ra. No te aha e ore ai e faanaho i te haere e mataitai i te Pu Haapiiraa a te Taiete Watchtower? Ua papu ia matou e e riro te mataitairaa i te reira i te faaitoito ia outou i roto i ta outou mau tutavaraa e haapii hau atu â no nia i to tatou Poiete î i te here e ia faaau i nia i ta ˈna mau faatureraa tia.

[Nota i raro i te api]

[Hohoˈa i te api 10]

Te hoê piha rahi î roa e te taata e rave rahi i roto i te piha tamaaraa

[Hohoˈa i te api 10]

E taime oaoa iho â te mau mataitairaa