A faaore ma te aau atoa i te hapa
“E na reira atoa mai tau Metua i te ao ra ia outou atoa na, ia ore outou ia faaore ma te aau atoa i te hapa a to ˈna taeae.”—MATAIO 18:35.
1, 2. (a) Nafea to te hoê vahine hara matauhia faaiteraa i to ˈna mauruuru ia Iesu? (b) Eaha te manaˈo ta Iesu i horoa?
E VAHINE taiata paha oia, te hoê ïa huru vahine eita outou e manaˈo e farerei i roto i te fare o te hoê taata faaroo. Ua maere vetahi i te iteraa ia ˈna i reira, te mea huru ê roa ˈtu â râ, o ta ˈna ïa i rave. Ua haafatata ˈtu oia i te taata ra ma te mau peu morare teitei roa e ua faaite oia i to ˈna mauruuru no ta ˈna mau ohipa, ma te horoi i te avae o te taata ra i to ˈna roimata e ma te tamǎrô i to ˈna rouru.
2 Aita taua taata ra, o Iesu, i huru ê i teie vahine, tei matauhia i roto ‘i te oire ei vahine hara.’ Area te Pharisea ra o Simona, te fatu fare, ua haapeapea ïa i te mea e vahine hara oia. Ua pahono Iesu na roto i te parauraa e e piti amutarahu ta te hoê taata. Mea rahi te tarahu a te hoê—fatata e piti matahiti moni ohipa a te hoê rave ohipa. E ta te tahi, hoê ïa tuhaa i nia i te ahuru o te reira—oia hoi iti aˈe i te toru avaˈe moni ohipa. I te mea hoi e eita hoê aˈe e nehenehe e faahoˈi i te moni, “faaore noa ˈtura” te taata horoa “i ta raua atoa tarahu.” Papu maitai e o te taata i faaore-rahi-aˈe-hia ta ˈna tarahu te here ia ˈna. I muri aˈe i to ˈna faaauraa i te reira e te ohipa maitai e ravehia ra e te vahine, ua faahiti Iesu i teie manaˈo: “Area te taata hara iti i faaorehia ra, e iti ïa to ˈna [here].” Na ô atura oia i te vahine ra: “Ua faaorehia ta oe hara.”—Luka 7:36-48; MN.
3. Eaha te tia ia tatou ia hiˈo no nia ia tatou?
3 A uiui na, ‘Ahiri e o vau aˈe taua vahine ra aore ra ua farerei au i teie huru tupuraa e ua arohahia mai au, e patoi anei au ma te etaeta i te faaore i te hapa a vetahi ê?’ E pahono paha outou e, ‘Eita roa ˈtu ïa!’ Teie râ, te tiaturi mau ra anei outou e e hinaaro iho â outou e faaore i te hapa? Mai tera iho â anei outou? Ua na reira pinepine anei outou ma te aau tae, e ua parau anei vetahi ê e e taata faaore outou i te hapa? E hiˈo ïa tatou no te aha e tia ˈi ia tatou taitahi ia hiˈopoa maite ia tatou iho ma te huna ore.
Mea titauhia ia faaore i te hapa—e te faaorehia ra ta tatou
4. Eaha te tia ia tatou ia farii no nia ia tatou?
4 E taata tia ore outou, ua ite maitai hoi outou. Ia anihia mai outou, e farii paha outou i te reira, peneiaˈe ma te haamanaˈo i te mau parau i roto i te Ioane 1, 1:8: “Ia parau tatou e aita a tatou e hara, te haavare nei tatou ia tatou iho, e aore te parau mau i roto ia tatou nei.” (Roma 3:23; 5:12) Ua rave paha vetahi i te mau hara rahi e te ino mau. Noa ˈtu râ e aita outou i rave i teie mau hara rahi ma te ite maite, eita e ore e mea rahi te taime e te tupuraa aita outou i pee i te mau faatureraa a te Atua—ua hara outou. E ere anei?
5. No te aha tatou e mauruuru ai i te Atua?
5 No reira, e tuea paha to outou tupuraa e te faataaraa a te aposetolo Paulo: “E o outou hoi, o tei pohe i ta outou hara, e te peritome ore o to outou tino, tei faaora-atoa-hia e ana e oia atoa, ua oti hoi i te faaorehia ta outou mau hara atoa.” (Kolosa 2:13; Ephesia 2:1-3) A tapao na i te mau parau ra “faaorehia ta outou mau hara atoa.” Mea rahi tera. E tumu papu maitai ta tatou taitahi e taparu mai ia Davida: “Rahi noa iho â ta ˈu nei hara, e Iehova, e faaore mai â oe i to oe ra iˈoa.”—Salamo 25:11.
6. Eaha ta tatou e nehenehe e papu no nia ia Iehova e te faaoreraa i te hara?
6 Nafea ta outou—aore ra ta te hoê o tatou nei—mau hara e faaorehia ˈi? Te mea faufaa roa, ua ineine te Atua ra o Iehova i te faaore i te hara. Tera iho â te hoê o to ˈna mau huru. (Exodo 34:6, 7; Salamo 86:5) Papu maitai, e hinaaro te Atua ia fariu tia ˈtu tatou i nia ia ˈna na roto i te pure e ia ani tatou ia faaore mai i ta tatou mau hara. (Paraleipomeno 2, 6:21; Salamo 103:3, 10, 14) E ua haamau oia i te hoê niu papu no te faaore i te hara—te tusia taraehara a Iesu.—Roma 3:24; Petero 1, 1:18, 19; Ioane 1, 4:9, 14.
7. Nafea tatou ia pee i te hiˈoraa o Iehova?
7 E tia ia faariro outou i te ineineraa te Atua i te faaore i te hara ei hiˈoraa nafea outou ia ohipa i nia ia vetahi ê. Ua haamatara Paulo i te reira, a papai ai e: “Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.” (Ephesia 4:32) Aita e feaaraa, te hinaaro ra Paulo ia huti tatou i te haapiiraa na roto i te hiˈoraa o te Atua, inaha te na ô ra te irava i muri iho e: “E teie nei, ei pee outou i te Atua mai te tamarii herehia ra.” (Ephesia 5:1) Te ite ra anei outou i te taairaa? Ua faaore te Atua ra o Iehova i ta outou mau hara, no reira—ia au i te haaferuriraa puai a Paulo—e tia ia pee outou i To ˈna hiˈoraa e ia “aroha noa, ma te faaore hoi i te hara” a vetahi ê. A uiui na râ, ‘Te na reira ra anei au? Mai te peu e e ere tera to ˈu huru, te tutava ra anei au i te na reira e te pee i te hiˈoraa o te Atua i te faaoreraa i te hara?’
Ia rohi tatou i te faaore i te hara
8. Eaha te tia ia tatou ia farii no nia i te mau melo o ta tatou amuiraa?
8 Mea maitai roa ïa mai te peu e mea iti te mau taime e faaohipa ˈi tatou i te haerea paieti e faaore i te hara i roto i te amuiraa Kerisetiano. E ere râ mai te reira te tupuraa mau. Parau mau, te tutava ra to tatou mau taeae e mau tuahine Kerisetiano i te pee i te hiˈoraa o te here o Iesu. (Ioane 13:35; 15:12, 13; Galatia 6:2) Ua rohi maoro ratou, e te rohi noa râ i te haapae i te huru feruriraa, paraparau, e te haerea o teie nei ao ino. Te hinaaro mau ra ratou e faaite i te huru taata apî. (Kolosa 3:9, 10) Eita râ tatou e nehenehe e haavare ite ore i te mea ra e mau taata tia ore anaˈe te mau melo o te mau amuiraa na te fenua atoa e o te amuiraa taitahi. I roto i te taatoaraa, mea maitai aˈe ratou i teie nei i na mua ˈˈe, noa ˈtu e e mau taata tia ore noâ ratou.
9, 10. No te aha tatou e ore ai e maere ia tupu te peapea i rotopu i te mau taeae?
9 I roto i te Bibilia, ua faaite roa mai te Atua e e ite tatou i te huru tia ore i roto i te amuiraa, i rotopu i to tatou mau taeae e mau tuahine. A hiˈo na i te mau parau a Paulo i roto i te Kolosa 3:13, [MN]: “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai [ta Iehova] atoa i faaore i ta outou na, e na reira atoa outou.”
10 Te faahaamanaˈo papu maira te Bibilia i ǒ nei i te taairaa i rotopu i te faaoreraa te Atua i ta tatou mau hara e ta tatou hopoia e faaore i ta vetahi ê. No te aha hoi mea fifi ia na reira? No te mea, mai ta Paulo i parau, e nehenehe te hoê taata ‘e pari i te tahi.’ Ua ite oia e e tupu taua mau pariraa ra. Inaha, ua tupu te reira i te senekele matamua i rotopu i “te feia moˈa” Kerisetiano i ‘tiaturi e haere i nia i te raˈi.’ (Kolosa 1:2, 5, MN) No reira, e nehenehe anei tatou e manaˈo e mea taa ê i teie mahana, aita hoi te rahiraa o te mau Kerisetiano mau e fanaˈo ra i te faaiteraa a te varua e e “feia moˈa e te herehia” ratou “i maitihia e te Atua”? (Kolosa 3:12) Eiaha ïa tatou e parau e te fifihia ra ta tatou amuiraa mai te peu e te tupu ra te mau pariraa—te inoino no te mau hape mau aore ra manaˈo-noa-hia.
11. Eaha ta te pǐpǐ Iakobo i faaara mai ia tatou?
11 Te faaite atoa ra te mau parau a Iakobo, te taeae o Iesu, e e nehenehe tatou i te tahi mau taime e farerei i te tahi mau tupuraa i reira tatou e titauhia ˈi ia faaore i te hara a to tatou mau taeae. “O vai te taata paari e te ite i roto ia outou na? ia na te haapao maitai oia i te faaite mai i ta ˈna ohipa, ma te mǎrû o te paari mau ra. Te vai na te feii rahi, e te mârô i roto i to outou aau, eiaha na e faarahi, a pari haavare ai i te parau mau.” (Iakobo 3:13, 14) ‘Te feii rahi e te mârô’ i roto i te mafatu o te mau Kerisetiano mau? Oia mau, te parau maitai ra Iakobo e ua tupu te reira i roto i te amuiraa i te senekele matamua e e tupu atoa ïa i teie mahana.
12. Eaha te fifi i tupu i roto i te amuiraa no Philipi i tahito ra?
12 Te vai ra te hiˈoraa o na Kerisetiano faatavaihia e piti, e roo maitai to raua i te rohiraa i pihai iho ia Paulo. Te haamanaˈo ra paha outou i te taioraa i te aamu o Euodia e o Sunetuhe, melo o te amuiraa no Philipi. Noa ˈtu e aita i faataa-maitai-hia eaha te fifi, te faaite ra te Philipi 4:2, 3 e ua tupu te tahi peapea i rotopu ia raua. Ua haamata anei te reira na roto i te hoê parau mauiui feruri-ore-hia, te faarooraa e ua faainohia te hoê fetii, aore ra te pohehae tataˈu? Noa ˈtu eaha te tumu, ua rahi roa to raua fifi inaha ua faaroo roa Paulo i te reira i Roma. Aita paha teie na tuahine pae varua e piti i paraparau faahou, ua ape paha te tahi i te tahi i te mau putuputuraa aore ra ua faaino te tahi i te tahi i to raua mau hoa.
13. Eaha paha tei tupu i rotopu ia Euodia raua Sunetuhe, o te horoa maira i teihea haapiiraa?
13 Te faahaamanaˈo ra anei te reira i te tahi peapea paha i rotopu ia vetahi i roto i ta outou amuiraa aore ra ta outou i farerei? Te tupu ra paha teie huru fifi i teie nei i nia i te hoê faito nainai. E nafea ïa tatou? I roto i te hiˈoraa i tahito ra, ua aˈo Paulo i na tuahine pûpûhia e piti “ia hoê â a raua parau i te Fatu nei.” Ua farii paha raua i te tauaparau, i te faaafaro i te mau parau, i te faaore ma te aau tae i ta te tahi hapa, e i te pee i te hiˈoraa o Iehova e faaore i te hara. Mea papu e ua afaro Euodia e o Sunetuhe, e e nehenehe atoa ïa tatou. E nehenehe taua huru faaoreraa i te hara e faaohipahia ma te manuïa i teie mahana.
A faahau—A faaore i te hara
14. No te aha e nehenehe pinepine ai e mea maitai aˈe e faaore noa i te peapea?
14 Eaha te titau-mau-hia no te faaore i te hara ia peapea outou e te tahi atu Kerisetiano? Ma te huna ore, aita e ravea ohie, tera râ, te horoa maira te Bibilia i te tahi mau hiˈoraa o te tauturu mai e te tahi mau manaˈo paari mau. Teie te hoê aˈoraa—noa ˈtu e e ere i te mea ohie ia farii e ia faaohipa—a haamoe noa i te peapea, a tapoˈi atu. E pinepine ia tupu te hoê fifi, mai tei itehia i rotopu ia Euodia e Sunetuhe, e manaˈo te taata taitahi e na te tahi te hape. No reira, i roto i teie huru tupuraa, e manaˈo paha outou e na te tahi atu Kerisetiano iho â te hape aore ra o ˈna tei haamauiui rahi roa ˈˈe. Noa ˈtu râ, e nehenehe anei outou e vaiiho noa ˈtu ma te faaore i te hara? Ia taa ia outou e mai te peu e o te tahi atu Kerisetiano tei hape na mua aore ra no ˈna anaˈe te hape, mea papu ore roa hoi te reira, o outou ïa na mua te tia ia tapoˈi i te fifi a faaore ai i te hara.
15, 16. (a) Eaha ta Mika i parau no nia ia Iehova? (b) Eaha te auraa ia ‘faarue’ Iehova “i te hapa”?
15 Eiaha tatou e haamoe e e hiˈoraa te Atua no tatou i te pae faaoreraa i te hara. (Ephesia 4:32–5:1) Teie ta te peropheta Mika i papai no nia i To ˈna hiˈoraa e tapoˈi i te mau hape: “O vai ïa Atua e au ia oe ra, i te faaoreraa i te parau-tia ore, e te faarueraa ˈtu i te hapa a te toea o to ˈna kelero? o tei ore i tapea tamau i to ˈna riri e a muri noa ˈtu, no te mea, e mea au ia ˈna te aroha.”—Mika 7:18.
16 A parau ai te Bibilia e e ‘faarue’ Iehova “i te hapa,” e ere ïa te auraa e eita ta ˈna e nehenehe e haamanaˈo i te mau hape, mai te mea ra e ua moehia ia ˈna te tahi mau mea. A rave na i te hiˈoraa o Samasona raua Davida, tei rave i te mau hara ino mau. Te haamanaˈo noa ra te Atua i taua mau hara ra maoro roa i muri iho; ua ite atoa tatou i te tahi o ta raua mau hara, inaha ua haapapai Iehova i te reira i roto i te Bibilia. Ua aroha râ to tatou Atua o te faaore i te hara ia raua toopiti, a tuu ai ia raua i mua ia tatou ei hiˈoraa o te faaroo no tatou.—Hebera 11:32; 12:1.
17. (a) Eaha te tauturu mai ia tapoˈi tatou i te mau hape aore ra mau hara a vetahi ê? (b) Ia tutava tatou i te na reira, nafea tatou e pee ai i te hiˈoraa o Iehova? (A hiˈo i te nota i raro i te api.)
17 Oia, e nehenehe Iehova e ‘faarue’a i te hapa, mai ta Davida i ani pinepine ia ˈna. (Samuela 2, 12:13; 24:10) E nehenehe anei tatou e pee i te hiˈoraa o te Atua, ma te hinaaro e faarue i te mau faainoraa e mau hapa a to tatou mau hoa faaroo tia ore? A feruri na e tei roto outou i te hoê manureva e fatata ra i te faareva. A hiˈo ai outou i rapae, e ite outou i pihai iho i te eˈa tauraa i te hoê vahine ta outou i matau e toro maira i to ˈna arero mai te hoê tamarii. Ua ite outou e ua inoino oia e te haamanaˈo ra o ˈna ia outou. Aore ra aita roa ˈtu paha oia e manaˈo ra ia outou. Noa ˈtu râ, a maraa noa ˈi te manureva i nia, eita outou e tâuˈa faahou i te vahine ra, e au oia i teie nei i te hoê noa mea haihai roa. I roto i te hoê hora, tei te mau hanere kilometera outou, e to muri roa ta ˈna faaoooraa. Oia atoa tatou nei, mea rahi te taime e noaa ˈi ia tatou i te faaore i te hara ia tamata tatou i te riro mai ia Iehova e i te tapoˈi i te faainoraa ma te paari. (Maseli 19:11) Eita anei te faainoraa e au i te mea faufaa ore i roto hoê ahuru matahiti aore ra e piti hanere matahiti i roto i te Mileniuma? No te aha e ore ai e vaiiho noa ˈtu i te reira?
18. Mai te peu e e au ra e eita ta tatou e nehenehe e faaore i te hara, eaha te manaˈo paari ta tatou e faaohipa?
18 I roto i te tahi mau tupuraa varavara, ua pure paha outou no nia i te peapea e ua tamata i te faaore i te hara, te ite ra râ outou e eita ta outou e nehenehe. Nafea ïa? Ua aˈo Iesu e haere e farerei i te tahi atu e e tamata i te faaafaro i te peapea orua anaˈe no te faahau. “E teie nei ia hopoi oe i ta oe taoˈa horoa noa i te fata ra, e ua manaˈo ihora oe i reira, e e hara ta to taeae ia oe na; e vaiiho atu i to taoˈa i mua i te fata ra, e mata na i te haere e faaite i to taeae, a haere a hopoi ai i ta oe taoˈa.”—Mataio 5:23, 24.
19. Eaha te huru e tia e eaha te huru e ore e tia ia tatou ia pee ia imi tatou i te faahau e to tatou taeae?
19 Ia papu ia outou e aita Iesu i parau e e haere e hiˈo i to outou taeae no te haapapu ia ˈna e ua tano outou e ua hape o ˈna. Peneiaˈe ua hape o ˈna. Eita râ e ore e ua hape orua toopiti. Noa ˈtu râ, eiaha e imi ia faˈi to outou taeae e ua hape oia, ia tuu roa oia ia ˈna i raro, ei auraa parau. Ia na reira outou i te paraparau, mea papu e eita te fifi e afaro. Aita atoa e faufaa ia faahaamanaˈo i te mau tuhaa rii atoa o te hapa mau aore ra feruri-noa-hia. Ia faaite mai te hoê aparauraa mǎrû i roto i te here Kerisetiano e o te hoê taa-ore-raa peapea te tumu o te fifi, e nehenehe orua e tamata i te faaafaro i te reira. Noa ˈtu râ e eita te aparauraa e aratai i te afaro-roa-raa, e titau-noa-hia anei te reira? E ere anei i te mea maitai aˈe ia farii outou e te hinaaro mau ra orua toopiti e haamori i to tatou Atua o te faaore i te hara? Ia ite outou i taua tupuraa mau ra, mea ohie aˈe no orua taitahi ia parau ma te rotahi e, “Eiaha oe e inoino mai e no to tâua hoi huru tia ore i peapea ˈi tâua. E haamoe anaˈe na tâua i te reira.”
20. Eaha ta tatou e haapii na roto i te hiˈoraa o te mau aposetolo?
20 A haamanaˈo na e ua peapea atoa te mau aposetolo, i te hinaaroraa vetahi i te hanahana rahi. (Mareko 10:35-39; Luka 9:46; 22:24-26) Ua faatupu te reira i te mǎrô, i te inoino, aore ra te mauiui rahi. Ua nehenehe râ ratou e faarue i taua mau peapea ra e e rave amui noa i te ohipa. Ua papai te hoê i muri aˈe e: “O te hinaaro hoi i te ora ra, e ia maitai to ˈna ra pue mahana, e tapea oia i to ˈna arero i te ino, e to ˈna vaha ia ore ia parau i te aparau haavare: e haapae oia i te ino, e rave i te maitai; e imi oia i te hau, e aruaru atu i te reira.”—Petero 1, 3:10, 11.
21. Ua horoa Iesu i teihea manaˈo paari hohonu no nia i te faaoreraa i te hara?
21 Ua ite tatou i te omuaraa i te hoê tuhaa o te hoê ohuraa: Ua faaore te Atua i ta tatou mau hara e rave rahi i rave i mutaa ihora, e tia ïa ia pee tatou i to ˈna hiˈoraa e e faaore i te hara a to tatou mau taeae. (Salamo 103:12; Isaia 43:25) Te vai ra râ te tahi atu tuhaa o teie ohuraa. I muri aˈe i to ˈna horoaraa i te hohoˈa pure, ua parau Iesu e: “Ia faaore hoi outou i ta vetahi ê ra hapa, e faaore atoa mai to outou Metua i te ao ra i ta outou.” Hau atu i te hoê matahiti i muri aˈe, ua faahiti faahou oia i te manaˈo tumu, a haapii ai i ta ˈna mau pǐpǐ ia pure: “E faaore mai i ta matou hara, te faaore nei hoi matou i tei hara atoa ia matou nei.” (Mataio 6:12, 14; Luka 11:4) Ua na ô â Iesu tau mahana hou to ˈna poheraa e: “Ia tia outou i nia e pure, e e hapa ta outou ia vetahi ê ra, a faaore atu; ia faaore atoa mai to outou Metua i te ao ra i ta outou hapa.”—Mareko 11:25.
22, 23. Nafea to tatou ineineraa i te faaore i te hara e taaihia ˈi i to tatou oraraa no a muri aˈe?
22 Oia mau, ua taai-rahi-hia te faaore-noa-raa mai te Atua i ta tatou mau hara i to tatou ineineraa i te faaore i ta to tatou mau taeae. Ia tupu te hoê peapea i rotopu i te mau Kerisetiano, a uiui e, ‘E ere anei te faaoreraa te Atua i te hara i te mea faufaa aˈe i te haapapuraa e ua hape te hoê taeae aore ra tuahine i nia i te tahi hapa iti, te tahi hara iti, aore ra te tahi manaˈo taata tia ore?’ Ua ite outou i te pahonoraa.
23 Nafea râ mai te peu e e ere te peapea i te tahi noa hara aore ra fifi iti? E afea te aˈoraa a Iesu tei papaihia i roto i te Mataio 18:15-18 e tano ai ia faaohipahia? E hiˈo mai ïa tatou i teie nau uiraa i mua nei.
[Nota i raro i te api]
a Te na ô ra te hoê taata ite e te parau faahohoˈa Hebera i faahitihia i roto i te Mika 7:18, “no roto mai ïa i te haerea o te hoê ratere e haere ra ma te ore e ite i te hoê mea ta ˈna e ore e hinaaro e haapao atu. Te manaˈo e matara maira, e ere ïa e aita te Atua e ite ra i te hara, aore ra e ere te reira i te mea faufaa roa aore ra aita roa ˈtu e faufaa, teie râ, aita oia e tapao ra i te reira i roto i te tahi mau tupuraa taa ê no te faautua; inaha eita oia e faautua, e faaore râ oia i te hara.”—Te mau tavana 3:26; Samuela 1, 16:8.
Te haamanaˈo ra anei outou?
◻ Eaha te hiˈoraa ta Iehova e horoa maira i te pae no te faaoreraa i te hara?
◻ Eaha te tia ia tatou ia haamanaˈo no nia i te feia i roto i te amuiraa?
◻ I roto i te rahiraa o te mau tupuraa, eaha te tia ia tatou ia rave i nia i te mau hape aore ra mau hara?
◻ Ia titauhia ra, eaha ta tatou e nehenehe e rave no te faahau e to tatou taeae?
[Hohoˈa i te api 15]
Ia peapea outou e te hoê Kerisetiano, a tamata i te vaiiho noa ˈtu i te reira; a mairi ai te tau, e riro mǎrû noa te peapea ei mea faufaa ore