Na vai e tarai ra i to outou feruriraa?

“EIAHA te hoê taata e parau mai eaha ta ˈu e feruri! E eiaha te hoê taata e parau mai eaha ta ˈu e rave!” Te auraa pinepine o teie mau parau, oia ïa e tiaturi rahi roa to outou ia outou iho e i to outou manaˈo. Te reira anei to outou manaˈo? Papu maitai, eita e tia i te tahi atu taata ia rave i te mau faaotiraa no outou. E haerea paari anei râ ia patoi oioi i te tahi manaˈo maitai? Eita roa ˈtu anei te tahi taata e nehenehe e tauturu ia outou no te rave i te mau faaotiraa paari? Teie râ, e nehenehe anei outou e ite papu e aita te tahi taata e tarai ra i to outou feruriraa, ma te ore outou e ite i te reira?

Na mua ˈˈe i te Piti o te Tamaˈi Rahi, ei hiˈoraa, na Joseph Goebbels, te faatere hau o te haaparareraa parau a Hitler, i faatere i te pu tapihaa o te mau hohoˈa tavirihia i Helemani. No te aha? No te mea ua ite o ˈna e maoti te reira e fanaˈo ai oia i te hoê mauhaa puai roa no te “ohipa i nia i te mau tiaturiraa o te taata e to ratou atoa ïa haerea.” (Propaganda and the German Cinema 1933-1945) Peneiaˈe ua ite outou i ta ˈna faaohiparaa aravihi hepohepo i taua ravea ra e vetahi atu â no te rama i te mau taata riirii—matauhia e te au noa—ia farii ratou ma te feaa ore i te haapiiraa philosopho Nazi.

E ohipa noa iho â te mau manaˈo o te feia ta outou e faaroo ra i nia i to outou huru feruriraa, e i to outou atoa ïa haerea. Parau mau, e ere te reira i te mea ino. Mai te peu e te anaanatae mau ra ratou i to outou maitai—mai te mau orometua haapii, te mau hoa, aore ra te mau metua—e faufaa-rahi-hia ïa outou i ta ratou mau aˈoraa e mau manaˈo paari. Mai te peu râ e e haapao noa ratou i to ratou iho maitai, ua haavarehia e ua faainohia ratou i roto i to ratou feruriraa, e e feia “haavare” ratou “i te maramarama, MN” mai ta te aposetolo Paulo e faataa ra, a haapao maitai ïa!—Tito 1:10; Deuteronomi 13:6-8.

No reira, eiaha e mauruuru noa ia outou iho e e manaˈo e eita te hoê taata e nehenehe e ohipa i nia ia outou. (A faaau e te Korinetia 1, 10:12.) Ua tupu aˈena paha te reira—ma te pinepine roa ˈˈe i ta outou e farii—ma te ore outou e ite i te reira. A rave noa na i te hiˈoraa o te mea ta outou e opua i te hoo ia haere outou i te fare toa. Na outou iho noa anei tera faaotiraa? Aore ra ua ohipa anei te tahi atu mau taata, e pinepine mea ite-ore-hia, ma te paari e te puai atoa râ i nia i ta outou maitiraa? Te manaˈo nei te papai vea maimi ra o Eric Clark e oia. “Rahi noa ˈtu â tatou i te faaruru i te mau faatianianiraa,” ta ˈna ïa e parau ra, “iti noa ˈtu â tatou i te taa i te puai o te reira, e mea papu râ, e rahi noa ˈtu â tatou i te hema.” Ua parau atoa oia e ia anihia i te taata eaha to ratou manaˈo no nia i te aravihi o te mau faatianianiraa, “e parau te rahiraa e mea puai te reira, eita râ ratou e hema.” Te manaˈo nei te taata e e vare haere noa vetahi ê, eiaha râ ratou. “E au ra e o ratou anaˈe tei paruruhia.”—The Want Makers.

Taraihia e Satani?

Eita paha to outou hemaraa i te mau faatianianiraa i te mau mahana atoa e faatupu i te mau faahopearaa ino roa. Te vai ra râ te tahi atu mana atâta roa ˈtu â. Te faaite maitai maira te Bibilia e o Satani te faahema rahi. (Apokalupo 12:9) Hoê â ta ˈna haapiiraa philosopho e te manaˈo o te hoê taata faatianiani i parau e te vai ra e piti ravea no te rama i te feia hoo—“te taparu-ino-raa aore ra te faaauraa ˈtu ia ratou.” Mai te peu e e nehenehe te feia haaparare parau e te feia faatianiani e faaohipa i teie mau huru raveraa aravihi no te tarai i to outou feruriraa, mea aravihi roa ˈtu â ïa o Satani i te faaohipa i taua atoa mau ravea ra!—Ioane 8:44.

Ua ite te aposetolo Paulo i te reira. Ua mǎtaˈu oia ia ore vetahi o to ˈna mau hoa Kerisetiano e vai ara e ia vare ratou i te haavare a Satani. Teie ta ˈna i papai: “Te mǎtaˈu nei râ vau, o te faainohia to outou aau ia ore atu te rotahi noa e au i te Mesia nei, mai ta te ophi i haavare atu ia Eva i to ˈna ra paari.” (Korinetia 2, 11:3) A faaroo i teie faaararaa. Ia ore anaˈe, e nehenehe outou e riro mai taua mau taata ra e tiaturi ra e mea aravihi taua mau poroi e mau faaauraa ra—“eita râ ratou e hema.” Te ite-maitai-hia ra te aravihi o te mau poroi a Satani e ati aˈe ia tatou i roto i te huru haavî, te faufau, e te haavare i roto i teie nei ui.

No reira o Paulo i taparu ai i to ˈna mau hoa Kerisetiano “eiaha e faaau atu i teie nei ao.” (Roma 12:2) Teie te huriraa a te hoê taata huri i te Bibilia: “Eiaha e vaiiho i te ao ia taumi ia outou i roto i ta ˈna iho farii faataheraa hohoˈa.” (Roma 12:2, Phillips) E tamata Satani i te mau ravea atoa no te taumi ia outou i roto i ta ˈna farii faataheraa hohoˈa, mai te potera i tahito ra i haapue i te araea i roto i te hoê farii matara noa ia noaa mai ia ˈna te mau hohoˈa e te huru tarairaa ta ˈna i hinaaro e nenei i nia i te araea. Ua faaineine Satani i te mau ohipa politita, tapihoo, faaroo, e te faaanaanataeraa a te ao no te reira. Eaha te aanoraa o to ˈna mana? Ua parare roa te reira mai i te tau o te aposetolo Ioane ra. “Te vai noa nei to te ao atoa,” ta Ioane ïa i parau, “i raro aˈe i taua varua ino ra.” (Ioane 1, 5:19; a hiˈo atoa i te Korinetia 2, 4:4.) Mai te peu e te feaa ra outou i te aravihi o Satani e faahema i te taata e e faaino i to ratou feruriraa, a haamanaˈo e mea nafea to ˈna na reiraraa ma te aravihi i nia i te nunaa Iseraela taatoa, i pûpûhia no te Atua. (Korinetia 1, 10:6-12) E tupu atoa anei te reira i nia ia outou? E, mai te peu e e vaiiho outou i te mana faahema o Satani ia ô i roto i to outou feruriraa.

Ia ite i te ohipa e tupu ra

E pinepine, e ohipa taua mau puai haavarevare ra i nia i to outou feruriraa ia vaiiho outou ia ratou ia na reira. I roto i ta ˈna buka ra The Hidden Persuaders, teie ta Vance Packard i parau: “Te vai ra iho â ta tatou ravea puai no te paruru ia tatou i teie feia arato [huna]: e nehenehe tatou e maiti ia ore tatou e aratohia. Fatata i roto i te mau huru tupuraa atoa, e nehenehe noa ta tatou e maiti, e eita tatou e nehenehe e faahema-ino-roa-hia mai te peu e e ite tatou i te ohipa e tupu ra.” E parau mau atoa no te haaparareraa parau e te haavare.

Parau mau, no te ‘ite i te ohipa e tupu ra,’ a haamahora i to outou feruriraa no te apo mai i te mau ohiparaa maitatai. E tia ia faatamaa-maitai-hia te hoê feruriraa maitai, mai te hoê tino maitai, ia tere maite oia. (Maseli 5:1, 2) Mea ino ia erehia outou i te mau haamaramaramaraa, mea ino atoa ia hape te mau haamaramaramaraa. No reira, noa ˈtu e e tia ia outou ia paruru i to outou feruriraa i te mau manaˈo e te mau haapiiraa philosopho haavare, a tamata i te ore e patoi e e tâhitohito i te mau manaˈo paari aore ra te mau haamaramaramaraa atoa e pûpûhia mai.—Ioane 1, 4:1.

Mea taa ê te faaitoitoraa haavare ore e te mau poroi huna i haapararehia. Eita e ore e ua faaara te aposetolo Paulo i te taata apî ra o Timoteo ia ara no te mea “te mau taata iino e te feia haavare ra, e tupu â to ratou ino e e rahi atu, i te haavare-noa-raa ˈtu, e te haavareraahia mai.” Ua na ô faahou râ Paulo e: “Ia mau maite râ oe i ta oe i haapii ra, i tei [faaitoitohia] ia oe [ia tiaturi], ua ite hoi oe [na vai i haapii ia oe i taua mau mea ra].” (Timoteo 2, 3:13, 14; MN) I te mea e e ohipa te mau mea atoa ta to outou feruriraa e apo mai i roto i te tahi faito, te ravea, o te ‘iteraa ïa na vai i haapii ia outou i taua mau mea ra,’ no te ite papu e mau taata anei ratou i anaanatae mau i to outou maitai, eiaha râ i to ratou iho.

Na outou e maiti. E nehenehe outou e maiti i te “faaau atu i teie nei ao,” na roto i te vaiihoraa i te mau haapiiraa philosopho e te mau faufaa o teie nei ao ia faatere i to outou feruriraa. (Roma 12:2) Aita râ teie nei ao e anaanatae ra i to outou maitai. No reira, “e ara,” ta te aposetolo Paulo ïa e faaara ra, “o te riro noa ˈtu outou i te parau paari e te haavare faufaa ore a te hoê taata ˈtu, i te parau tutuu a te taata nei.” (Kolosa 2:8) Mea ohie ia vaiiho ia Satani ia tarai ia outou, aore ra ia ‘riro ia ˈna.’ E au i te au auahi o te avaava ra. E nehenehe outou e raeahia na roto noa i te hutihutiraa i te mataˈi viivii.

I te tahi aˈe pae, e nehenehe outou e patoi i te hutihuti i taua “mataˈi” ra. (Ephesia 2:2, MN) A faaohipa ïa i te manaˈo paari o Paulo: “E faataui ia outou ma te faaapî i to outou feruriraa, ia tamata outou i te hinaaro tia roa o te Atua, e te au, e te maitai hoi.” (Roma 12:2, MN) E titauhia te tutavaraa. (Maseli 2:1-5) A haamanaˈo, eita Iehova e rama i te taata. Ua horoa oia i te mau haamaramaramaraa atoa, no te fanaˈo râ i te reira, e tia ia outou ia faaroo i te reira e ia vaiiho e ia ohipa i nia i to outou feruriraa. (Isaia 30:20, 21; Tesalonia 1, 2:13) Ia ineine ïa outou i te faaî i to outou feruriraa i te parau mau i roto i “te parau moˈa i papaihia,” te Parau faaurua a te Atua, te Bibilia.—Timoteo 2, 3:15-17.

A farii i te tarairaa a Iehova

Ua faahohoˈahia te faufaaraa o to outou haerea maitai e te auraro no te fanaˈo i te mana e tarai o Iehova, ma te puai i to Iehova faaueraa i te peropheta Ieremia ia haere e mataitai i te fare ohiparaa a te hoê potera. Ua ite Ieremia i te potera i te tauiraa i te manaˈo no nia i ta ˈna e rave i nia i te hoê aˈua ‘i ino i te rima o te potera.’ Na ô atura Iehova e: “E ore anei e tia atoa ia ˈu ia rave mai ta teie nei potera ia outou, e te utuafare o Iseraela? . . . Inaha, mai te araea tei te rima ïa o te potera te rave, tei ia ˈu atoa te rave ia outou, e te utuafare o Iseraela.” (Ieremia 18:1-6) Teie anei te auraa e e au noa te nunaa i Iseraela i te mau tâpû araea oraora ore i roto i te rima o Iehova ta ˈna e tarai ia au i to ˈna hinaaro mai te hoê huru aˈua aore ra te tahi atu?

Eita roa ˈtu Iehova e faaohipa i to ˈna puai mana hope no te turai i te taata ia rave i te mau mea aita ratou e hinaaro e rave; e ere atoa o ˈna te tumu o te mau hotu iino, mai i roto i te hiˈoraa o te hoê potera taata. (Deuteronomi 32:4) E tupu mai te mau paruparu ia patoi te feia ta Iehova e tamata ra i te tarai ma te raveraa maitai, i ta ˈna aratairaa. Tera ïa te tahi taa-ê-raa rahi i rotopu ia outou e te hoê tâpû araea oraora ore. E tiamâraa to outou. Ma te faaohipa i te reira, e nehenehe outou e maiti i te farii i te mana e tarai o Iehova aore ra i te patoi atu ma te opua.

Auê ïa haapiiraa faufaa mau! Mea maitai aˈe e faaroo i te reo o Iehova, maoti râ i te parau ma te teoteo e, “Eiaha te hoê taata e parau mai e eaha ta ˈu e rave”! E hinaaro tatou pauroa i te mana e aratai o Iehova. (Ioane 17:3) A pee i te hiˈoraa o te papai salamo ra o Davida, i pure e: “E faaite mai oe ia ˈu i to mau eˈa, e Iehova; e haapii mai oe ia ˈu i to mau haerea.” (Salamo 25:4) A haamanaˈo i ta te Arii Solomona i parau: “E riro te feia paari i te haapao, e e tupu to ˈna ite.” (Maseli 1:5) E faaroo anei outou? Mai te peu e e, “na te haapao maitai [ïa] e tiai ia oe i reira; e na te ite e faaora ia oe.”—Maseli 2:11.