Te mau fifi taa ê o te mau utuafare e metua apî to roto
E NEHENEHE TE MAU UTUAFARE E METUA APÎ TO ROTO E OAOA! NAFEA?
I roto e rave rahi tuhaa o teie nei ao, ua riro te mau utuafare e metua apî to roto ei huru utuafare matauhia i teie nei. Teie râ, e fifi taa ê roa to te mau utuafare e metua apî to roto. Te fifi rahi roa ˈˈe, o te raveraa ïa i te tamarii. Noa ˈtu râ, mai ta te mau tumu parau e piti no muri iho e tamata i te faaite atu, e nehenehe e rave i te tamarii ma te manuïa i roto i te hoê utuafare e metua apî to roto.
I TE RAHIRAA O TE TAIME, E FAAINOHIA TE MAU PAPA APÎ E TE MAU MAMA APÎ. I TO TATOU APÎRAA, E rave rahi i rotopu ia tatou tei faaroo i te aamu o Cendrillon, tei mauiui roa i roto i te rima o to ˈna mama apî iino. Ua haapii atoa te mau tamarii i Europa i te aamu o Blanche-Neige et les sept nains. Ua riro te mama apî o Blanche-Neige ei vahine tohutohu iino!
Te horoa ra anei teie mau aamu i te hoê huru hiˈoraa tano no nia i te mau utuafare e metua apî to roto? Mea ino mau anei te mau metua apî atoa? Eita. Te hinaaro ra te rahiraa o ratou i te mea maitai noa no te mau tamarii ta ratou e fanaˈo ra na roto i te faaipoiporaa. E tia râ ia ratou ia faaruru i te tahi mau fifi paari mau te tupu mai i roto i te oraraa utuafare e metua apî to roto.
Te mau fifi o te raveraa i te tamarii
Te tumu pinepine e ore ai te hoê faaipoiporaa matamua e manuïa, aita ïa te feruriraa o te mau hoa faaipoipo i paari maitai. I roto i te piti o te faaipoiporaa, e nehenehe te ohiparaa e te mau tamarii e haafifi i te mau taairaa. Ua faaite mai te tahi mau tabula e e hau atu i te 4 utuafare e metua apî to roto i nia i te 10 o te hope ra na roto i te hoê faataaraa i roto i na matahiti matamua e pae.
Aita te feia faaipoipo apî e ite eaha te tupu ra i roto i te feruriraa o te mau tamarii, te mau peapea o te haapao maitai, te mau manaˈo pohehae e te inoino no te taeraa mai te metua apî. E manaˈo paha ratou e mea here aˈe na to ratou iho metua i to ˈna hoa apî ia ratou iho. Hau atu i te reira, mea fifi roa paha no te hoê metua tei faaruehia e to ˈna hoa ia taa i te mea e te here noa ra ta ˈna mau tamarii i to ˈna hoa faaipoipo matamua. Ua tamata te hoê tamaroa i te faataa i to ˈna mau taairaa maitatai e to ˈna papa mau, ma te parau e, “Mama, ua ite au e ua rave ino o papa ia oe, teie râ, ua rave maitai o ˈna ia ˈu!” E nehenehe te hoê parau mai teie te huru, noa ˈtu e mea tano, e turai i te hoê metua vahine ia inoino noa i te papa o teie tamarii.
Ua faˈi te hoê papa apî e: “Aita vau i ineine mau i te faaruru i te mau fifi atoa o te raveraa i te mau tamarii a ta ˈu vahine apî. Ua faaô atu vau ia ˈu iho i roto i teie tupuraa ma te manaˈo e i te mea e ua faaipoipo vau i to ratou mama, o vau ïa to ratou papa. Mea ohie roa hoi! Aita vau i taa te here o te mau tamarii no to ratou iho papa mau, e e rave rahi hape ta ˈu i rave.”
E nehenehe te mau peapea e tupu mai i roto iho â râ i te parau o te aˈo. Te hiaai nei te mau tamarii i te aˈo ma te here, teie râ, te patoi nei ratou i te reira noa ˈtu e no ǒ mai i te metua mau ra. Mea fifi roa ˈtu â ia farii i te reira no ô mai i te metua apî ra! I te rahiraa o te taime, ia faaruru anaˈe te hoê tamarii i teie huru aˈo, e parau o ˈna mai teie, “E ere oe to ˈu papa mau!” Auê ïa te peapea ta teie mau huru parau e nehenehe e faatupu i nia i te hoê metua apî tei hinaaro noa i te mea maitai!
E nehenehe anei e rave i te tamarii ma te manuïa i roto i te hoê utuafare e metua apî to roto? E nehenehe anei te mau metua apî e hauti i te hoê tuhaa faufaa i roto i te paturaa i te hoê utuafare manuïa e metua apî to roto? Te pahonoraa i teie na uiraa e piti, oia ïa mai te peu e e pee te taatoaraa i te mau aˈoraa i roto i te Parau faauruahia a te Atua, te Bibilia.
[Hohoˈa i te api 3]
“E ere oe to ˈu papa mau!”