E faaruru anei ta outou ohipa i te auahi?

“E haapao maitai râ te taata atoa i te huru o tana paturaa i nia iho i taua niu ra.”—KORINETIA 1, 3:10.

1. Eaha ta te mau Kerisetiano haapao maitai e atuatu no nia i te mau pǐpǐ no arauaˈe iho?

E HIˈO noa na feia faaipoipo Kerisetiano i to raua tamarii fanau apî. E ite te hoê taata poro i te Basileia i te mata anaanatae rahi o te hoê taata haapii Bibilia. E tapao te hoê matahiapo Kerisetiano e haapii ra mai nia mai i te tahua i te hoê taata anaanatae apî i rotopu i te feia e faaroo maira o te hiˈo ra i te mau irava i roto i ta ˈna Bibilia ma te anaanatae rahi. Ua î roa te mafatu o teie mau tavini haapao maitai a Iehova i te tiaturiraa. E ui maere iho â ïa ratou e, ‘E here anei e e tavini anei teie taata ia Iehova—e e tamau noa anei oia i te haapao maitai?’ Oia mau, eita te reira e tupu noa mai. E titauhia te ohipa.

2. Nafea to te aposetolo Paulo faahaamanaˈoraa i te mau Kerisetiano Hebera i te faufaaraa o te ohipa haapiiraa, e nafea tatou ia hiˈopoa ia tatou iho, e tia ˈi?

² Ua haapapu te hoê taata aravihi i te haapii, oia hoi te aposetolo Paulo, i te faufaa o te ohipa haapiiraa e faariroraa i te taata ei pǐpǐ i to ˈna papairaa e: “Ahiri hoi mai teie nei ua riro outou ei [“feia ite i te haapii,” MN] ua tia ïa i te maoro.” (Hebera 5:12) Aita te mau Kerisetiano ta ˈna e papai atu ra i haere rahi i mua ia hiˈohia i te maoro o to ratou riroraa ei feia faaroo. E ere noa e aita ratou i ineine i te haapii ia vetahi ê, te hinaaro atoa ra râ ratou ia faahaamanaˈohia ratou i te mau haapiiraa tumu o te parau mau. I teie mahana, mea maitai ia faito tatou paatoa i te tahi taime i to tatou mau aravihi ei feia haapii atu e ia hiˈo nafea tatou e nehenehe ai e rave i te tahi mau haamaitairaa. E mau ora tei taaihia i te reira. Eaha ta tatou e nehenehe e rave?

3. (a) Ua faaau te aposetolo Paulo i te ohipa faariroraa i te taata ei pǐpǐ i te aha? (b) Ei patu fare Kerisetiano, eaha te haamaitairaa rahi ta tatou e fanaˈo nei?

³ Na roto i te hoê faahohoˈaraa i faaaanohia, ua faaau Paulo i te ohipa faariroraa i te taata ei pǐpǐ i te ohipa paturaa i te hoê fare. Ua haamata oia na roto i teie mau parau: “E hoa rave ohipa hoi matou no te Atua, e aua outou na te Atua; e fare outou no te Atua.” (Korinetia 1, 3:9) Te apiti nei ïa tatou i roto i te hoê ohipa paturaa o te taata te tapao; te tauturu nei tatou i te patu ia ratou ei pǐpǐ na te Mesia. Te na reira nei tatou ei hoa rave ohipa no Tei “faatia . . . i te mau mea atoa.” (Hebera 3:4) Auê ïa haamaitairaa e! E hiˈo anaˈe nafea te aˈoraa i faauruahia a Paulo i to Korinetia e tauturu mai ai ia aravihi atu â tatou i roto i ta tatou ohipa. E hiˈo iho â râ tatou i to tatou “aravihi i te haapii.”—Timoteo 2, 4:2, MN.

Te haamauraa i te niu maitatai

4. (a) Eaha te tuhaa ta Paulo i rave i roto i te ohipa paturaa Kerisetiano? (b) No te aha e tia ia parauhia e ua ite maite Iesu e te feia no to ˈna tau i te faufaa o te mau niu maitatai?

⁴ Ia hinaarohia te hoê fare aueue ore e te paari, e titauhia te hoê niu maitatai. No reira Paulo i papai ai e: “No te maitai a te Atua i horoahia mai ia ˈu nei, ua haamau vau i te niu mai te patu fare paari ra.” (Korinetia 1, 3:10) Ma te faaohipa i te hoê faahohoˈaraa mai teie, ua faahiti Iesu Mesia no te hoê fare i faaruru i te hoê vero no te mea ua maiti te feia patu i te hoê niu paari. (Luka 6:47-49) Ua ite Iesu i te faufaa rahi o te mau niu. Tei reira oia a haamau ai Iehova i te niu mau o te fenua.a (Maseli 8:29-31) Te haafaufaa atoa ra te mau taata no te tau o Iesu i te mau niu maitatai. Te mau fare niu maitatai anaˈe o te mau maitai i mua i te mau vai pue taime poto e te mau aueueraa fenua e tupu i te tahi taime i Paletetina. Eaha râ te niu ta Paulo e manaˈo ra?

5. O vai te niu o te amuiraa Kerisetiano, e nafea te reira i te tohuraahia?

⁵ Ua papai Paulo e: “Aita ˈtu hoi e niu e tia i te taata atoa ia haamau, maori râ o tei haamauhia ra, oia hoi te Mesia ra o Iesu.” (Korinetia 1, 3:11) E ere teie i te taime matamua i faaauhia ˈi Iesu i te hoê niu. Inaha, ua tohu Isaia 28:16 [MN] e: “Te parau maira te Fatu ra o Iehova, Inaha, te haamau nei au i te tahi ofai i Ziona ei [niu], e ofai tamatahia, e ofai maitai ei tihi, e [niu] aueue ore e te mau papu.” Ua opua aˈena Iehova e e riro ta ˈna Tamaiti ei niu no te amuiraa Kerisetiano.—Salamo 118:22; Ephesia 2:19-22; Petero 1, 2:4-6.

6. Nafea to Paulo haamauraa i te niu maitai no te mau Kerisetiano no Korinetia?

⁶ Eaha te niu no te mau Kerisetiano taitahi? Mai ta Paulo i parau, aita ˈtu e niu no te Kerisetiano mau maori râ tei haamauhia e te Parau a te Atua—o Iesu Mesia. Papu maitai, te reira te niu ta Paulo i haamau. I Korinetia, i reira hoi te philosophia i haafaufaa-rahi-hia ˈi, aita oia i tamata i te faahoruhoru i te taata na roto i te paari o teie nei ao. Aita, ua poro Paulo i “te Mesia [“i rîhia i nia i te raau,” MN] ra,” ta te mau nunaa i faarue ei “mea maamaa” mau. (Korinetia 1, 1:23) Ua haapii Paulo e o Iesu te taata faufaa roa ˈˈe i roto i te opuaraa a te Atua.—Korinetia 2, 1:20; Kolosa 2:2, 3.

7. Eaha ta tatou e haapii mai na roto i te faahitiraa a Paulo ia ˈna iho ei “patu fare paari”?

⁷ Ua tapao Paulo e ua rave oia i teie haapiiraa “mai te patu fare paari ra.” E ere teie mau parau i te faateiteiraa ia ˈna iho. E farii-noa-raa e e ô faahiahia te reira ta Iehova i horoa mai na ˈna—te faanahoraa aore ra te faatereraa i te ohipa. (Korinetia 1, 12:28) Parau mau, aita tatou e fanaˈo ra i teie mahana i te mau ô semeio i horoahia na te mau Kerisetiano o te senekele matamua. E peneiaˈe aita tatou e manaˈo ra e e feia ite tatou i te haapii. Na roto râ i te hoê auraa faahiahia, oia. A hiˈo na: E horoa mai Iehova i to ˈna varua moˈa no te tauturu ia tatou. (A faaau e te Luka 12:11, 12.) Te here nei tatou ia Iehova e ua ite tatou i te mau haapiiraa tumu o ta ˈna Parau. E mau ô faahiahia mau teie ta tatou e nehenehe e faaohipa ia haapii tatou ia vetahi ê. E opua anaˈe e faaohipa i te reira no te haamau i te niu mau.

8. Nafea tatou e haamau ai i te Mesia ei niu no te mau pǐpǐ no arauaˈe iho?

⁸ Ia rave tatou i te Mesia ei niu, eita tatou e faaite ia ˈna mai te hoê pêpe ravea ore i roto i te hoê vairaa maa, aore ra mai te hoê i aifaito ia Iehova i roto i te Toru Tahi. Eita, e riro te reira mau manaˈo e ere no roto i te Bibilia ei niu no te mau Kerisetiano haavare. E haapii maori tatou e oia te taata rahi roa ˈˈe i ora aˈenei, e ua faarue oia i to ˈna oraraa taata tia roa no tatou, e i teie nei, ua riro oia ei Arii faatavaihia a Iehova e faatere nei i nia i te raˈi. (Roma 5:8; Apokalupo 11:15) E tutava atoa tatou i te faaitoito i ta tatou feia haapii ia pee i te mau taahiraa avae o Iesu e ia pee i to ˈna mau huru maitatai. (Petero 1, 2:21) E hinaaro tatou ia putapû maitai ratou i te itoito o Iesu no te taviniraa, to ˈna aroha i te feia haehaa e tei hepohepo, to ˈna aroha i te feia hara i teimaha no to ratou manaˈo faahapa ia ratou iho, to ˈna mǎtaˈu ore i mua i te mau tamataraa. Oia mau, e niu faahiahia roa o Iesu. Eaha ˈtu ai râ to muri mai?

Te paturaa ma te mau tauihaa maitatai

9. Noa ˈtu e ua riro na mua Paulo ei taata haamau i te niu, eaha ta ˈna e haapeapea ra no te feia i farii e e parau mau ta ˈna i haapii?

⁹ Ua papai Paulo e: “E teie nei, ia patu te hoê taata i te auro, e te ario, e te ofai maitatai, e te raau, e te nonoha, e te aihere, i nia iho i taua niu ra; e faaitehia ta te taata atoa ra ohipa; na taua mahana ra hoi e faaite, e faataahia ïa e te auahi, e na te auahi e tamata i te huru o ta te taata atoa ra ohipa.” (Korinetia 1, 3:12, 13) Eaha ta Paulo e hinaaro ra e parau? E hiˈo anaˈe i te mau huru tupuraa no taua tau ra. E taata haamau niu na mua o Paulo. I roto i to ˈna mau tere mitionare, ua haere oia mai tera oire i tera oire, a poro atu ai i te feia e rave rahi aitâ i faaroo aˈenei no nia i te Mesia. (Roma 15:20) A farii ai te taata i te parau mau ta ˈna e haapii atura, ua haamauhia te mau amuiraa. Ua aupuru maite Paulo i teie feia haapao maitai. (Korinetia 2, 11:28, 29) Teie râ, te titau ra ta ˈna ohipa ia tamau noa oia i te tere haere. No reira, i muri aˈe 18 avaˈe to ˈna haamauraa i te hoê niu i Korinetia, ua faarue aˈera oia i reira e haere atura e poro i roto i te tahi atu mau oire. Te anaanatae noa ra râ oia i te huru e haapao ai vetahi ê i te ohipa ta ˈna i rave i ǒ.—Ohipa 18:8-11; Korinetia 1, 3:6.

10, 11. (a) Nafea to Paulo faaauraa e piti huru tauihaa paturaa taa ê roa? (b) Eaha te mau huru fare pae tino i vai na paha i Korinetia i tahito ra? (c) Eaha te mau huru fare e faaruru papu i te auahi, e eaha te haapiiraa ta te reira e horoa mai na te mau Kerisetiano e faariro i te taata ei pǐpǐ?

¹⁰ E au ra e te rave ra te feia e patu ra i nia i te niu i haamauhia e Paulo i Korinetia i te hoê ohipa maitai ore. No te faataa i te fifi, te faaau ra Paulo e piti huru tauihaa paturaa taa ê roa: te auro, te ario, e te mau ofai maitatai i te hoê pae; te raau, te nonoha, e te aihere i te tahi. E nehenehe te hoê fare e hamanihia i te mau tauihaa maitatai, te paari e te ore e ama i te auahi; aore ra e faatia-ru-noa-hia i te mau tauihaa faarue, te ore e vai maoro e te ama haere noa i te auahi. Papu maitai e e rave rahi mau fare no na huru e piti i roto i te hoê oire rahi mai ia Korinetia. Te vai ra te mau hiero rarahi hamanihia i te mau ofai rarahi e te moni rahi, peneiaˈe i tapoˈihia aore ra i faaunaunahia te tahi paeau i te auro e te ario.b E au paha ïa teie mau fare paari i te mau aorai i pihai iho i te mau fare nainai fatata noa, te mau fare pê e te mau hoohooraa i te matete, i hamanihia i te mau raau aita i taraihia e i atohia i te nonoha.

¹¹ Eaha te tupu i nia i teie mau fare ia ama i te auahi? Mea maramarama maitai te pahonoraa i te tau o Paulo mai i to tatou nei tau. Inaha, ua haruhia te oire o Korinetia e ua taninahia i te auahi e te Tenerara Roma Mummius i te matahiti 146 H.T.T. Ua ore roa iho â ïa te mau fare raau, nonoha aore ra aihere e rave rahi. E te mau fare ofai paari, faaunaunahia i te ario e te auro? Papu maitai ïa e ua vai mai. Peneiaˈe e i te mau mahana atoa, ua na mua ˈtu te feia i haapiihia e Paulo i Korinetia i taua mau fare ra—mau fare ofai teitei i faaruru i te mau ati i hahu i te mau fare paari ore e mea maoro aˈenei. Ua tano mau ïa ta Paulo mau parau! Ia faatere tatou i te haapiiraa, e tia ia hiˈo tatou ia tatou iho ei mau patu fare. E hinaaro tatou e ohipa e te mau tauihaa maitatai roa ˈˈe e te paari roa ˈˈe. Papu maitai ïa e e vai maoro ta tatou ohipa i rave. Eaha taua mau tauihaa paari ra, e no te aha mea faufaa roa ia faaohipa i te reira?

E faaruru anei ta outou ohipa i te auahi?

12. Nafea to te tahi mau Kerisetiano no Korinetia raveraa i te ohipa paturaa ma te haapao ore?

¹² Papu maitai e te ite ra Paulo e te patu ra te tahi mau Kerisetiano i Korinetia ma te maitai ore. Eaha te hape? Mai tei faaitehia ra e te mau huru tupuraa no taua tau ra, te farerei ra te amuiraa i te amahamaharaa, te haamǎtaˈu ra te umereraa i te mau taata i te tahoêraa o te amuiraa. Te parau ra te tahi pae e, “No Paulo vau,” area te tahi ra te mârô ra ïa e, “No Apolo vau.” Te faateitei papu ra vetahi i to ratou iho paari. E ere ïa i te mea maere e ia horoa mai te reira i te hoê huru feruriraa a te tino, te paari ore i te pae varua, e ia parare roa “te feii, e te mârô.” (Korinetia 1, 1:12; 3:1-4, 18) E ite-roa-hia iho â ïa teie mau huru feruriraa i roto i te haapiiraa e horoahia ra i roto i te amuiraa e te taviniraa. Ua faatupu te reira i te hoê ohipa faariroraa i te taata ei pǐpǐ rave haapao-ore-noa-hia, mai te ohipa paturaa fare ma te mau tauihaa maitatai ore. Eita te reira e faaruru atu i te “auahi.” Eaha te auahi ta Paulo e faahiti ra?

13. Eaha ta te auahi i roto i te faahohoˈaraa a Paulo e faataipe ra, e eaha ta te mau Kerisetiano atoa e tia ia ara maitai?

¹³ Te vai ra te hoê auahi ta tatou paatoa e farerei i roto i te oraraa—te mau tamataraa i to tatou faaroo. (Ioane 15:20; Iakobo 1:2, 3) E tia i te mau Kerisetiano no Korinetia ia ite, mai ia tatou i teie mahana e tia ia ite e e tamatahia te mau taata atoa ta tatou e haapii nei i te parau mau. Ia haapii tatou ma te maitai ore, peneiaˈe e noaa mai te mau faahopearaa ino. Ua faaara Paulo e: “Ia toe ta te tahi ra ohipa, ta ˈna i patu i nia iho i taua niu ra, e rave ïa oia i te utua. Ia ama ta te hoê taata ra ohipa, e [“erehia oia,” MN], oia iho râ e faaorahia ïa; mai te mea ra e, i na roto i te auahi.”c—Korinetia 1, 3:14, 15.

14. (a) Nafea te mau Kerisetiano e faariro i te taata ei pǐpǐ e ‘erehia ˈi,’ nafea râ ratou e nehenehe ai e faaorahia mai te huru e mea na roto i te auahi? (b) Nafea tatou e faaiti roa ˈi i te ereraa?

¹⁴ E turai mau teie mau parau ia feruri! E nehenehe e riro ei mea mauiui mau te rohiraa no te tauturu i te hoê taata ia riro mai ei pǐpǐ, na te ite-noa-raa i te taata ia hema ˈtu i te faahemaraa aore ra i te hamani-ino-raa e i te pae hopea ia faarue roa i te eˈa o te parau mau. Ua ite maite Paulo i te reira ia parau oia e e erehia tatou i roto i teie mau huru tupuraa. Peneiaˈe mea mauiui roa teie ohipa e faataahia ˈi to tatou faaoraraa mai te huru ra “i na roto i te auahi”—mai te hoê taata i ere i te mau mea atoa i roto i te hoê auahi e oia noa iho tei ora mai. No tatou iho, nafea tatou e faaiti roa ˈi i te ereraa? A patu e te mau tauihaa paari! Ia haapii tatou i ta tatou feia haapii e ia putapû to ratou mafatu, a faaitoito ai ia ratou ia haafaufaa i te mau huru maitatai Kerisetiano mai te paari, te ite hohonu, te mǎtaˈu ia Iehova e te faaroo mau, te patu ra ïa tatou e te mau tauihaa paari e te ore e ama i te auahi. (Salamo 19:9, 10; Maseli 3:13-15; Petero 1, 1:6, 7) E tamau noa te feia i faahotu i teie mau huru maitatai i te haapao i te hinaaro o te Atua; e mau maite ïa ia ratou te tiaturiraa papu e e vai ora noa ratou e a muri noa ˈtu. (Ioane 1, 2:17) Nafea râ tatou e faaohipa ˈi i te faahohoˈaraa a Paulo? Teie te tahi mau hiˈoraa.

15. Nafea tatou e nehenehe ai e haapapu e aita tatou e rave ra i te ohipa paturaa ma te haapao ore i te pae o ta tatou feia haapii Bibilia?

¹⁵ Ia haapii tatou i te feia haapii Bibilia, eiaha roa ˈtu tatou ia faateitei i te taata i nia ˈˈe i te Atua ra o Iehova. E ere ta tatou fa te haapiiraa ia ratou ia hiˈo mai ia tatou mai te tumu rahi o te paari. E hinaaro tatou ia imi ratou i te aratairaa a Iehova, a ta ˈna Parau e a ta ˈna faanahonahoraa. No reira, eita tatou e horoa noa i to tatou mau manaˈo ei pahonoraa i ta ratou mau uiraa. Eita, e haapii tatou ia ratou ia imi i te mau pahonoraa ma te faaohipa i te Bibilia e te mau papai i horoahia mai e “te tavini haapao maitai e te paari.” (Mataio 24:45-47) No reira atoa, e ara maitai tatou eiaha ia tapea i ta tatou feia haapii Bibilia na tatou anaˈe. Eiaha tatou ia inoino ia anaanatae mai vetahi ê ia ratou, ia faaitoito maori tatou i ta tatou feia haapii ia “mahora” ratou i te pae o te here, ma te haamatau e te au atu i te rahiraa o ta ratou e nehenehe i roto te amuiraa.—Korinetia 2, 6:12, 13.

16. Nafea te mau matahiapo e patu ai ma te mau tauihaa e ore e ama i te auahi?

¹⁶ E tuhaa faufaa atoa ta te mau matahiapo Kerisetiano i roto i te paturaa i te mau pǐpǐ. Ia haapii ratou i te amuiraa, e tutava ratou i te patu ma te mau tauihaa e ore e ama i te auahi. Peneiaˈe e taa ê roa te aravihi i te haapii, te ite, e te huru taata o te tahi i to te tahi, eita râ ratou e faaohipa i taua mau taa-ê-raa ra no te arato i te mau pǐpǐ na muri ia ratou. (A faaau e te Ohipa 20:29, 30.) Aita tatou e ite mau ra no te aha te tahi pae i Korinetia i parau ai e, “No Paulo vau” aore ra, “No Apolo vau.” E nehenehe râ tatou e papu e aita hoê o taua mau matahiapo haapao maitai ra i paturu i teie huru feruriraa o te faatupu i te amahamaharaa. Aita Paulo i faahiahia i teie mau manaˈo hohonu; ua patoi etaeta oia i te reira. (Korinetia 1, 3:5-7) Oia atoa i teie mahana, te haamanaˈo nei te mau matahiapo e e mau tiai mamoe ratou no “te nǎnǎ a te Atua.” (Petero 1, 5:2) E ere roa ˈtu ratou na te hoê noa ˈˈe taata. No reira te mau matahiapo e patoi hua ˈi i te mau hinaaro atoa o te taata e mana i nia anei i te nǎnǎ aore ra i te tino matahiapo. Ia turai-noa-hia te mau matahiapo e te hinaaro haehaa e tavini i te amuiraa, e haaputapû i te mau mafatu, e e tauturu i te mau mamoe ia tavini ia Iehova ma te nephe taatoa, te patu ra ïa ratou ma te mau tauihaa e ore e ama i te auahi.

17. Nafea te mau metua Kerisetiano e faaitoito ai i te patu ma te mau tauihaa e ore e ama i te auahi?

¹⁷ E au roa atoa teie tumu parau i te mau metua Kerisetiano. Auê hoi ratou i te hinaaro mau e ia ora to ratou mau tamarii e a muri noa ˈtu! No reira ratou e rohi ai i te “haapii tamau maite” i te mau faaueraa tumu a te Parau a te Atua ia mau i roto i te mafatu o to ratou mau tamarii. (Deuteronomi 6:6, 7) E hinaaro ratou ia ite to ratou mau tamarii i te parau mau, eiaha noa ei anairaa ture aore ra ei faahitiraa parau, ei hoê râ huru oraraa î maitai, te hoona e te oaoa. (Timoteo 1, 1:11) No te patu i to ratou mau tamarii ei mau pǐpǐ haapao maitai a te Mesia, e faaitoito te mau metua î i te here i te faaohipa i te mau tauihaa e ore e ama i te auahi. E ohipa ratou ma te faaoromai e to ratou mau tamarii, a tauturu ai ia ratou ia faaore i te mau huru taata e ririhia e Iehova e ia faahotu i te mau huru maitatai ta ˈna e au.—Galatia 5:22, 23.

No vai te hape?

18. Ia faarue te hoê pǐpǐ i te haapiiraa maitatai, no te aha e ere paha i te hape a te feia i faaitoito i te haapii e te faaineine ia ˈna?

¹⁸ E faahiti teie tauaparauraa i te hoê uiraa faufaa roa. Ia faarue te hoê taata ta tatou i faaitoito i te tauturu, i te parau mau, teie anei te auraa e aita tatou i manuïa ei taata faatere i te haapiiraa—e peneiaˈe ua patu tatou ma te mau tauihaa maitatai ore? Eita paha. Parau mau, te faahaamanaˈo maira te mau parau a Paulo e e hopoia rahi te apitiraa i roto i te faariroraa i te taata ei pǐpǐ. E hinaaro tatou e rave i te mau mea atoa ta tatou e nehenehe no te patu maitai. Aita râ te Parau a te Atua e parau maira e e amo tatou i te hopoia taatoa e ia teimaha roa ˈtu tatou i te manaˈo faahapa ia tatou iho ia fariu ê te feia ta tatou i tamata i te tauturu, i te parau mau. Te vai ra te tahi mau mea ê atu i ta tatou iho tuhaa ei feia patu. Ei hiˈoraa, a tapao na eaha ta Paulo e parau ra no nia i te taata e haapii atu i rave i te ohipa maitai ore i roto i te paturaa: “E [“erehia oia,” MN], oia iho râ e faaorahia ïa.” (Korinetia 1, 3:15) Ia faaora-noa-hia ˈtu teie taata—area te huru taata Kerisetiano ta ˈna i faaitoito i te patu i roto i ta ˈna taata haapii, te faataahia ra ïa e te “ama” ra i te hoê tamataraa e au i te auahi—eaha ïa ta tatou e nehenehe e manaˈo? Papu maitai e, no Iehova, na te taata haapii e amo i te hopoia o ta ˈna iho mau faaotiraa e pee anei oia i te hoê haerea haapao maitai aore ra eita.

19. Eaha ta tatou e hiˈopoa i roto i te tumu parau i muri nei?

¹⁹ Mea faufaa roa te tumu parau o te hopoia taata taitahi. E faahopearaa to te reira i nia ia tatou taitahi. Eaha ta te Bibilia e haapii taa ê ra no nia i te reira? E hiˈopoahia te reira i roto i ta tatou tumu parau i muri nei.

[Nota i raro i te api]

Nafea outou e pahono ai?

◻ Eaha te “niu” i roto i te hoê Kerisetiano mau, e nafea te reira e haamauhia ˈi?

◻ Eaha ta tatou e nehenehe e haapii mai na roto i te mau tauihaa paturaa taa ê?

◻ Eaha ta te “auahi” e faataipe ra, e nafea te reira e nehenehe ai e ‘faaere’ i te tahi pae?

◻ Nafea te feia faatere i te haapiiraa Bibilia, te mau matahiapo, e te mau metua e nehenehe ai e patu ma te mau tauihaa e ore e ama i te auahi?

[Hohoˈa i te api 9]

I roto i te mau oire tahito e rave rahi, tei pihai iho noa te mau fare ofai e ore e ama i te auahi i te mau fare paari ore