E rave faaoti hua i to outou ora!
“E au mau here e, . . . e rave faaoti hua i to outou ora ma te mǎtaˈu e te rurutaina.”—PHILIPI 2:12.
1, 2. Eaha te tahi mau tiaturiraa a te taata i turai i te feia e rave rahi ia manaˈo e aita roa ˈtu to ratou e mana no te aratai i to ratou oraraa?
“UA FANAUHIA anei outou mai teie te huru?” Aita i maoro aˈenei, ua haafaura-maite-hia teie tumu parau i nia i te api matamua o te hoê vea taio-rahi-hia. I raro aˈe i te upoo parau, te vai ra teie mau parau: “Te huru taata, te huru itoito e te mau maitiraa atoa i roto i te oraraa. Te faaite nei te mau maimiraa apî e tei roto te rahiraa i te mau vairaa tapao tupuna.” E nehenehe teie mau parau e turai i te tahi mau taata ia manaˈo e mea iti roa to ratou mana i nia i to ratou iho oraraa.
2 Te mǎtaˈu nei te tahi atu â e no te maitai ore o te aratairaa a to ratou mau metua aore ra no te maitai ore o te huru haapiiraa a to ratou mau orometua haapii, e oaoa ore iho â ïa to ratou oraraa. Peneiaˈe e manaˈo ratou e e rave â ratou i te mau hape a to ratou mau metua, e ohipa ratou ia au i to ratou mau hinaaro feruri-ore-hia ino roa ˈˈe, e riro ratou ei taata taiva ia Iehova—ei haapoto-noa-raa, e rave ratou i te mau maitiraa ino. Te reira anei ta te Bibilia e haapii ra? Parau mau, te vai ra te tahi feia faaroo o te mârô e te haapii ra te Bibilia i te hoê manaˈo mai teie, oia hoi te haapiiraa o te oraraa faataahia. Ia au i teie haapiiraa, ua faataa ê na te Atua i te mau tupuraa atoa o to outou oraraa.
3. Eaha te poroi faaitoito e vai ra i roto i te Bibilia no nia i te neheneheraa e amo i te hopoia o to tatou oraraa no a muri aˈe?
3 Hoê â poroi to teie mau manaˈo taa ê atoa: Mea iti roa ta outou maitiraa, mea iti roa to outou mana no te aratai i to outou oraraa. E tarapape te aau i teie poroi, e ere anei, e e rahi atu â te fifi ia tarapape te aau. Te parau nei Maseli 24:10 (MN) e: “Ua tarapape anei to aau i te mahana e ati ai ra? E iti roa to oe itoito.” E noaa mai râ te itoito ia ite tatou e ia au i te Bibilia, e nehenehe tatou ‘e rave faaoti hua i to tatou ora.’ (Philipi 2:12) Nafea tatou e haapapu ai i to tatou tiaturi i teie haapiiraa oaoa a te mau Papai?
Te ohipa “paturaa” ta tatou e rave i roto ia tatou iho
4. Noa ˈtu e te faahiti ra Korinetia 1, 3:10-15 no te paturaa ma te mau tauihaa e ore e ama i te auahi, ua taai-atoa-hia te reira i te aha?
4 A hiˈo na i te faahohoˈaraa a te aposetolo Paulo i roto i te Korinetia 1, 3:10-15. Te faahiti ra oia i te hoê ohipa paturaa Kerisetiano, e e nehenehe e faaauhia te manaˈo tumu o ta ˈna faahohoˈaraa i te taviniraa i roto e i rapae mai. Te parau ra anei oia e ia maiti te hoê pǐpǐ i te pae hopea e e tavini anei oia ia Iehova e e tapea anei oia i ta ˈna maitiraa aore eita, na te feia anaˈe i haapii e i faaineine ia ˈna te hopoia? Aita. Te haamatara noa ra Paulo i te faufaaraa ia rave te taata faatere i te haapiiraa i te ohipa paturaa maitai roa ˈˈe. Mai ta tatou râ i haapii i roto i te tumu parau na mua ˈtu, aita oia e parau ra e aita roa ˈtu ta te taata haapii aore ra te pǐpǐ e maitiraa i ǒ nei. Parau mau, te haapapu ra te faahohoˈaraa a Paulo i te ohipa ta tatou e rave i nia ia vetahi ê, eiaha i te paturaa ia tatou iho. E ite-maite-hia te reira no te mea te faahiti ra Paulo i te ohipa paturaa maitai ore e mou atura area te patu fare ra, te ora maira ïa. Teie râ, i te tahi taime, e taai te Bibilia i teie huru faaauraa parau i te ohipa ta tatou e rave i roto ia tatou iho.
5. Eaha te mau irava e faaite ra e e tia i te mau Kerisetiano ia rave i te hoê ohipa “paturaa” i roto ia ratou iho?
5 A hiˈo na i te Iuda 20, 21 [MN]: “Outou, e au mau here e, i te [paturaa] ia outou iho [i nia] i to outou faaroo moˈa rahi ra, e te pureraa ma te [varua moˈa], [ia vai] maite outou i [roto i te here o] te Atua.” Ua faaohipa Iuda i ǒ nei i te hoê â parau Heleni no te parau ra “paturaa” e ta Paulo i faaohipa i roto i te Korinetia 1, pene 3, to ˈna râ manaˈo, e au ïa e ia patu tatou ia tatou iho i nia i te niu o to tatou faaroo. Ia faataa oia i te faahohoˈaraa a Iesu no nia i te taata i haamau i to ˈna fare i nia i te pǎpǎ, ua faaohipa Luka i te hoê â parau Heleni no te parau ra “niu” e ta Paulo i faaohipa i roto i ta ˈna faahohoˈaraa o te paturaa Kerisetiano. (Luka 6:48, 49) Hau atu â, ua faaohipa Paulo i te hohoˈa o te hoê i haapapuhia i nia i te hoê “niu, MN” ia aˈo oia i to ˈna mau hoa Kerisetiano ia haere i mua i te pae varua. Oia, te haapii ra te Parau a te Atua e e rave tatou i te ohipa “paturaa” i roto ia tatou iho.—Ephesia 3:15-19; Kolosa 1:23; 2:7.
6. (a) A faahohoˈa na nafea te pǐpǐ Kerisetiano taitahi e riro ai ei ohipa a te hoê paturaa amui. (b) Eaha te hopoia a te pǐpǐ taitahi?
6 E ohipa taata hoê noa anei te paturaa i te hoê Kerisetiano? Inaha, a feruri na e e opua outou e patu i te hoê fare. E haere outou i te hoê taata papai hohoˈa fare ra no te mau hohoˈa fare. Noa ˈtu e te hinaaro ra outou e na outou iho e rave i te rahiraa o te ohipa, e aufau outou i te hoê patu fare ia rave oia i te ohipa e o outou e ia faaite mai oia i te mau ravea maitai roa ˈˈe. Mai te peu e e haamau oia i te hoê niu paari, e tauturu oia ia taa ia outou te mau hohoˈa fare, e faaite mai oia eaha te mau tauihaa maitatai roa ˈˈe e hoo mai, e e haapii mai oia e rave rahi mau mea no nia i te paturaa, e farii papu mau ïa outou e ua rave oia i te hoê ohipa maitai. Eaha râ mai te peu e eita outou e faaroo i to ˈna mau manaˈo, e hoo mai outou i te mau tauihaa mama aore ra te maitatai ore, e eita outou e pee i te mau hohoˈa a te taata papai hohoˈa fare? Papu maitai e eita outou e nehenehe e faahapa i te patu fare aore ra i te taata papai hohoˈa fare ia tahuri te fare! Oia atoa, e ohipa a te hoê paturaa amui te pǐpǐ Kerisetiano taitahi. O Iehova te taata papai hohoˈa rahi. E tauturu oia i te Kerisetiano haapao maitai o te haapii e te patu i te hoê taata haapii ei hoê o te mau “hoa rave ohipa . . . no te Atua.” (Korinetia 1, 3:9) E tia râ i te taata haapii ia ohipa atoa. I te pae hopea, tei ia ˈna te hopoia o to ˈna iho oraraa. (Roma 14:12) Mai te peu e e hinaaro oia e faahotu i te mau huru Kerisetiano maitatai, e tia ia ˈna ia rohi no te reira, ia patu i te reira i roto ia ˈna iho.—Petero 2, 1:5-8.
7. Eaha te mau tautooraa e farereihia e te tahi mau Kerisetiano, e eaha te nehenehe e tamahanahana ia ratou?
7 Teie anei ïa te auraa e eita te mau tapao tupuna, te huru tupuraa e te aravihi o ta tatou taata faatere haapiiraa e ohipa? E ere roa ˈtu te reira. Te faˈi nei te Parau a te Atua e mea faufaa e e ohipa teie atoa mau mea. E rave rahi mau hinaaro maitai ore e te hara i roto ia tatou o te riro ei mea fifi mau ia arohia. (Salamo 51:5; Roma 5:12; 7:21-23) E nehenehe te huru haapiiraa a te mau metua e te huru tupuraa i te fare e ohipa puai mau i nia i te tamarii—no te maitai aore ra no te ino. (Maseli 22:6; Kolosa 3:21) Ua faahapa Iesu i te mau aratai haapaoraa ati Iuda no te mau faahopearaa ino o ta ratou haapiiraa i nia ia vetahi ê. (Mataio 23:13, 15) I teie mahana, te ohipa ra teie mau mea i nia ia tatou paatoa. Ei hiˈoraa, te farerei nei te tahi mau melo o te nunaa o te Atua i te mau tautooraa ei faahopearaa no te hoê oraraa tamarii fifi. E hinaaro ratou i to tatou maitai e ia taa ia tatou to ratou huru. E nehenehe ratou e tamahanahanahia i te poroi a te Bibilia e aita ratou i faataahia ia rave â i te mau hape a te mau metua aore ra ia riro ei feia taiva. A hiˈo na nafea te tahi mau arii no Iuda i tahito ra e haapapu ai i teie manaˈo.
Te mau arii no Iuda—Ua rave ratou i ta ratou iho mau maitiraa
8. Eaha te hiˈoraa ino e vai ra i mua ia Iotama na roto i to ˈna metua tane, eaha râ te maitiraa ta ˈna i rave?
8 Ua riro Uzia ei arii no Iuda i te 16raa o to ˈna matahiti, te hoê matahiti apî roa, e ua faatere oia e 52 matahiti i te maoro. I te rahiraa o teie area taime, “ua rave [“tamau,” MN] oia i te parau-tia i te aro o Iehova, mai ta tana metua mai ta Amazia i rave i mutaaihora.” (Te mau arii 2, 15:3) Ua haamaitai Iehova ia ˈna i te mau upootiaraa faahiahia i te pae tamaˈi. Ma te peapea râ, ua faaoru aˈera Uzia no to ˈna mau manuïaraa. Ua teoteohia oia e ua orure aˈera oia i te hau ia Iehova na roto i te pûpûraa i te taoˈa noˈanoˈa i nia i te fata i roto i te hiero, te hoê ohipa i faataahia na te mau tahuˈa. Ua faahapahia Uzia, ua faaite noa râ oia i to ˈna riri. I reira oia i faahaehaahia ˈi—ua tairihia oia i te lepera e ua faahepohia ia ora oia anaˈe no te toea o to ˈna oraraa. (Paraleipomeno 2, 26:16-23) Eaha te huru o ta ˈna tamaiti o Iotama i mua i te reira? E nehenehe noa hoi teie taurearea e faahemahia e to ˈna metua tane e e inoinohia no te faatitiaifaroraa a Iehova. E nehenehe te toea o te mau taata e faahema ia ˈna no te mea te pee ra ratou i te mau haapaoraa hape. (Te mau arii 2, 15:4) Ua rave râ Iotama i ta ˈna iho maitiraa. “Ua rave [“noa,” MN] oia i te parau-tia i te aro o Iehova.”—Paraleipomeno 2, 27:2.
9. Eaha te tahi mau hiˈoraa maitai no Ahaza, eaha râ te huru o to ˈna oraraa?
9 Ua faatere Iotama i te roaraa 16 matahiti e ua haapao maitai noa oia e tae noa ˈtu i te hopea. Ua fanaˈo ïa ta ˈna tamaiti o Ahaza i te hiˈoraa maitai roa o te hoê metua tane haapao maitai. E te vai ra te tahi atu â mau hiˈoraa maitai no Ahaza. Ua haamaitaihia oia i te oraraa i te tau a rave ai te mau peropheta haapao maitai ra o Isaia, o Hosea e o Mika ma te itoito, i to ratou toroa peropheta i taua fenua ra. Ua rave râ oia i te hoê maitiraa ino. “Aita . . . oia i rave i te parau-tia i te aro o Iehova, mai tana tupuna ra mai ia Davida.” Ua hamani oia i te mau hohoˈa tarai no Baala e ua haamori oia i te reira e ua tae roa oia i te tanina i te tahi o ta ˈna mau tamaiti i roto i te mau auahi pûpûraa tusia na te mau atua etene. Noa ˈtu te mau hiˈoraa maitai roa, aita roa ˈtu oia i manuïa ei arii e ei tavini a Iehova.—Paraleipomeno 2, 28:1-4.
10. Eaha te huru o Ahaza ei metua tane, eaha râ te maitiraa ta ta ˈna tamaiti o Hezekia i rave?
10 I te pae o te haamoriraa viivii ore, eita e nehenehe e feruri i te hoê metua tane ino aˈe ia Ahaza. Teie râ, eita ta Hezekia e nehenehe e maiti i to ˈna metua tane! Papu maitai e te mau tamaiti apî ta Ahaza i pûpû ei tusia na Baala, o to Hezekia iho ïa mau taeae. Ua faahepo anei teie huru tupuraa riaria ia ora Hezekia ma te taiva ia Iehova? Aita roa ˈtu, ua riro mai râ Hezekia ei hoê o te mau arii rahi mau no Iuda, mea iti roa hoi ratou—ei hoê taata here, te haapao maitai e te paari. “Ua au maira hoi Iehova ia ˈna.” (Te mau arii 2, 18:3-7) Inaha, e nehenehe e manaˈohia e o Hezekia te taata papai i faauruahia o te Salamo 119 a tamaiti hui arii apî noa ˈi oia. Mai te peu e te reira iho â, e ere i te mea fifi ia ite no te aha oia i papai ai i teie mau parau: “Ua tarapape tau aau i te oto.” (Salamo 119:28) Noa ˈtu to ˈna mau oto, ua vaiiho Hezekia e na te Parau a te Atua e aratai ia ˈna i roto i te oraraa. Te parau nei te Salamo 119:105 e: “E lamepa ta oe parau i to ˈu nei avae, e tiarama no to ˈu nei mau eˈa.” Oia mau, ua rave Hezekia i ta ˈna iho maitiraa—te maitiraa maitai.
11. (a) Noa ˈtu te hiˈoraa maitai o to ˈna metua tane, eaha te faito rahi o te orureraa hau a Manase ia Iehova? (b) Eaha te maitiraa ta Manase i rave i te pae hopea o to ˈna oraraa, e eaha ta tatou e nehenehe e haapii mai na roto i te reira?
11 Mea huru ê roa râ, no roto mai i te hoê o te mau arii maitai roa ˈˈe no Iuda te faraa mai hoê o te mau arii ino roa ˈˈe. Ua paturu te tamaiti a Hezekia o Manase i te peu haamori idolo, te peu tahutahu, e te ohipa haavîraa uˈana i te hoê faito aitâ i itehia aˈenei. Te faaite ra te aamu e “ua parau [“tamau,” MN] mai hoi Iehova ia Manase, e te mau taata atoa no ˈna ra,” papu maitai na roto i ta ˈna mau peropheta. (Paraleipomeno 2, 33:10) Ia au i te tutuu ati Iuda, ua pahono Manase na roto i te raveraa e ia eehia Isaia. (A faaau e te Hebera 11:37.) E parau mau anei te reira aore ra eita, aita roa ˈtu Manase i faaroo i te hoê noa ˈˈe faaararaa a te Atua. Inaha, ua rave oia e ia tanina-oraora-hia te tahi o ta ˈna iho mau tamaiti i te auahi ei tusia, mai ta to ˈna iho â metua tupuna o Ahaza i rave. Teie râ, i mua i te mau tamataraa teimaha mau i te pae hopea o to ˈna oraraa, ua tatarahapa teie taata iino e ua taui oia i to ˈna mau haerea. (Paraleipomeno 2, 33:1-6, 11-20) Te faaite maira to ˈna hiˈoraa e e ere e aita roa ˈtu e ravea e tatarahapa ˈi te hoê taata i rave i te mau maitiraa riaria mau. E nehenehe oia e taui.
12. Eaha na maitiraa taa ê roa ta Amona e ta ta ˈna tamaiti o Iosia i rave no nia i te taviniraa ia Iehova?
12 E nehenehe te tamaiti a Manase o Amona e haapii mai na roto i te tatarahapa o to ˈna metua tane. Ua rave râ oia i te mau maitiraa ino. Oia mau, “ua rave noa ˈtura Amona i te hara, na nia iho, na nia iho” e ia taparahi-pohe-roa-hia ˈtu ai oia. Ua riro ta ˈna tamaiti o Iosia ei taata maitai ê roa ïa. Papu maitai e ua maiti Iosia e haapii mai na roto i tei tupu i nia i to ˈna metua tupuna. Ua haamata oia i te faatere i te 8raa noa o to ˈna matahiti. I te 16raa noa o to ˈna matahiti, ua haamata aˈera oia i te imi ia Iehova e mai reira mai, ua faaite oia e e arii hiˈoraa maitai e te haapao maitai oia. (Paraleipomeno 2, 33:20–34:5) Ua rave oia i te hoê maitiraa—te maitiraa maitai.
13. (a) Eaha ta tatou e haapii mai na roto i te mau arii no Iuda ta tatou i tuatapapa? (b) Eaha te faufaaraa o te faaineineraa a te mau metua?
13 Te horoa maira teie tuatapaparaa poto no nia i na arii e hitu no Iuda i te hoê haapiiraa faahiahia mau. I roto i te tahi mau hiˈoraa, e mau tamaiti maitai roa ta te mau arii ino roa, e i te tahi roa ˈˈe pae, e mau tamaiti ino roa ta te mau arii maitai roa. (A faaau e te Koheleta 2:18-21.) Eita te reira e faaiti i te faufaaraa o te faaineineraa a te mau metua. Te horoa papu ra te mau metua e faaineine ra i ta ratou mau tamarii ia au i te eˈa o Iehova i te ravea maitai roa ˈˈe ia riro ratou ei mau tavini haapao maitai a Iehova. (Deuteronomi 6:6, 7) Te maiti noa nei râ te tahi mau tamarii i te hoê aveia ino noa ˈtu te mau tutavaraa maitai roa a te mau metua haapao maitai. Te maiti nei te tahi atu â mau tamarii i te here e te tavini ia Iehova noa ˈtu te ohiparaa ino a te mau metua i nia ia ratou. Ma te haamaitaihia e ana, te haamanuïa nei ratou i to ratou oraraa. Te uiui ra anei outou i te tahi mau taime eaha to outou huru arauaˈe iho? A hiˈo na ïa i te tahi o te mau haapapuraa a Iehova iho e e nehenehe outou e rave i te maitiraa maitai!
Te tiaturi nei Iehova ia outou!
14. Nafea tatou e ite ai e te taa ra ia Iehova to tatou mau otia?
14 E ite Iehova i te mau mea atoa. Te parau nei Maseli 15:3 e: “Tei te mau vahi atoa nei to Iehova mata, i te hiˈoraa mai i te ino e te maitai.” Ua parau te Arii Davida no nia ia Iehova e: “Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa ra i te papaihia i roto i te buka na oe, i te mau mahana atoa te raveraahia, e aore roa te hoê i toe.” (Salamo 139:16) Ua ite ïa Iehova eaha te mau huru ino ta outou e rohi ra i te tinai—no roto mai anei i to outou fanauraahia aore ra o ta outou i matau noa ei faahopearaa o te tahi atu mau ohiparaa i nia ia outou aita outou i mana ˈtu i nia iho. Ua taa maitai ia ˈna nafea te reira i haapeapea ˈi ia outou. Ua taa maitai aˈe ia ˈna to outou mau otia ia outou iho. E aroha rahi mau to ˈna. Eita roa ˈtu oia e tiai ia rave tatou hau atu i ta tatou e nehenehe mau e rave.—Salamo 103:13, 14.
15. (a) Eaha te hoê tamahanahanaraa no te feia i haamauiuihia ma te opua-mau-hia e vetahi ê? (b) E faatura Iehova ia tatou taitahi na roto i te horoaraa mai i teihea hopoia?
15 I te tahi aˈe pae, eita Iehova e hiˈo ia tatou ei mau taata ravea ore i mua i te mau huru tupuraa. Mai te peu e ua roohia tatou i te mau ohipa ino i mutaa iho, e nehenehe tatou e tamahanahanahia i te ite-papu-raa e mea riri na Iehova te mau haamauiuiraa atoa i opua-mau-hia. (Salamo 11:5; Roma 12:19) E faaore râ anei oia i te mau faahopearaa ia fariu ê tatou e ia rave tatou i te mau maitiraa ino ma te ite maite? Eita iho â ïa. Te parau nei ta ˈna Parau e: “E riro hoi ta te taata nei hopoia ei nia ïa ia ˈna iho e ati noa ˈˈe.” (Galatia 6:5) E faatura Iehova i ta ˈna mau mea poietehia taitahi e te maramarama hoi na roto i te horoaraa na ratou i te hopoia e rave i te maitai e e tavini ia ˈna. Mai ta Mose ïa i faaite i to Iseraela: “Te tiaoro nei au i te raˈi e te fenua ei ite no ˈu ia outou i teie nei mahana e ua tuu vau i te ora e te pohe, i te maitai e te ino i mua ia oe; e tena na, a rave i te ora ia ora oe e to oe atoa ra huaai.” (Deuteronomi 30:19) Te tiaturi atoa nei Iehova e e nehenehe atoa tatou e rave i te maitiraa maitai. Nafea tatou e ite ai i te reira?
16. Nafea tatou e manuïa ˈi i te ‘rave-faaoti-hua-raa i to tatou ora’?
16 A tapao na eaha ta te aposetolo Paulo i papai: “E tena na, e au mau here e, . . . e rave faaoti hua i to outou ora ma te mǎtaˈu e te rurutaina. O te Atua tei ohipa i roto ia outou i te hinaaro e te rave i te maitai ta ˈna iho e hinaaro ra.” (Philipi 2:12, 13) Te auraa o te parau Heleni i hurihia na roto i te parau ra “rave faaoti hua,” te raveraa ïa i te hoê ohipa e ia oti roa. Aita ïa hoê aˈe i roto ia tatou i faataahia ia ore oia ia manuïa aore ra ia faarue oia. Papu maitai e te tiaturi nei te Atua ra o Iehova e e nehenehe ta tatou e faaoti i te ohipa ta ˈna i horoa mai ia rave tatou—te ohipa e aratai ia tatou i te ora—aore anaˈe eita ïa oia e faaurua i teie parau. Nafea râ tatou e manuïa ˈi? E ere mea na roto noa i to tatou iho puai. Mai te peu e mea navai maitai to tatou iho puai, aita ïa e faufaa “te mǎtaˈu e te rurutaina.” Aita, ‘e ohipa’ Iehova ‘i roto ia tatou,’ a ohipa ˈi to ˈna varua moˈa i roto i to tatou feruriraa e to tatou mafatu, a tauturu ai ia tatou ‘ia hinaaro e ia rave.’ Ma teie tauturu î i te here, te vai ra anei te hoê noa ˈˈe tumu eiaha tatou e rave i te mau maitiraa maitai i roto i te oraraa e e ora ia au i te reira? Aita!—Luka 11:13.
17. Eaha te mau tauiraa ta tatou e nehenehe e rave i roto ia tatou iho, e nafea Iehova e tauturu mai ai ia na reira tatou?
17 E faaruru atu tatou i te mau haafifiraa—peneiaˈe te mau peu ino matarohia i te roaraa o to tatou oraraa e te mau faahemaraa atâta o te nehenehe e taui i to tatou manaˈo. Teie râ, maoti te tauturu o te varua o Iehova, e nehenehe tatou e faaruru atu i te reira! Mai ta Paulo i papai atu i te mau Kerisetiano no Korinetia, mea navai maitai te puai o te Parau a te Atua no te faatahuri tae noa ˈtu i “te mau mea etaeta maitai.” (Korinetia 2, 10:4, MN) Oia mau, e nehenehe ta Iehova e tauturu mai ia faatupu tatou i te mau tauiraa rahi i roto ia tatou iho. Te aˈo maira ta ˈna Parau ia “haapae . . . i te taata tahito” e ia “faataata apî . . . o tei hamanihia ia au i te Atua ra, i te parau-tia e te [“haapao,” MN] maitai mau ra.” (Ephesia 4:22-24) E nehenehe mau anei te varua o Iehova e tauturu mai ia faatupu tatou i teie mau tauiraa? Oia mau! E faatupu te varua o te Atua i te mau hotu i roto ia tatou—e mau huru maitatai nehenehe e te faahiahia ta tatou paatoa e hinaaro e faahotu. Te matamehai o te reira, o te aroha ïa.—Galatia 5:22, 23.
18. Eaha te maitiraa ta te mau taata maramarama atoa e nehenehe roa e rave, e e tauturu te reira ia faaoti maite tatou e rave i te aha?
18 O te hoê teie parau mau rahi o te faatiamâ. E ravea faito ore to te Atua ra o Iehova no te here, e ua hamanihia tatou ia au i to ˈna hohoˈa. (Genese 1:26; Ioane 1, 4:8) E nehenehe ïa tatou e maiti e here ia Iehova. E o te reira here—e ere to tatou oraraa no mutaa iho, e ere to tatou mau hape i noaa mai, e ere to tatou mau hinaaro e rave i te ino no roto mai i to tatou fanauraahia—te ravea no to tatou oraraa no a muri aˈe. O te here i te Atua ra o Iehova ta Adamu raua Eva e hinaaro ra no te tamau i te haapao maitai i roto i te ô i Edene. O te reira here ta tatou taitahi e hinaaro no te ora ˈtu i Aramagedo e no te manuïa i roto i te tamataraa hopea ia hope te Faatereraa Mileniuma a te Mesia. (Apokalupo 7:14; 20:5, 7-10) E nehenehe tatou taitahi e tatou paatoa, noa ˈtu eaha to tatou mau huru tupuraa, e faahotu i teie here. (Mataio 22:37; Korinetia 1, 13:13) E faaoti maite anaˈe e here ia Iehova e e patu i nia i taua here ra e a muri noa ˈtu.
Eaha to outou manaˈo?
◻ Eaha te mau tiaturiraa a te taata i taa ê roa i te haapiiraa oaoa a te Bibilia no nia i te hopoia a te taata taitahi?
◻ Eaha te ohipa paturaa e tia i te Kerisetiano taitahi ia rave i roto ia ˈna iho?
◻ Nafea te hiˈoraa o te mau arii no Iuda e faaite mai ai e na te taata taitahi e rave i ta ˈna iho mau maitiraa?
◻ Nafea Iehova e haapapu mai ai e e nehenehe tatou e rave i te mau maitiraa maitai i roto i te oraraa, noa ˈtu eaha te mau faahemaraa e haaati ra ia tatou?
[Hohoˈa i te api 15]
Ua faataahia anei to outou oraraa no a muri aˈe i roto i te mau tapao tupuna?
[Hohoˈa i te api 17]
Noa ˈtu te hiˈoraa ino o to ˈna metua tane, ua maiti te Arii ra o Iosia e tavini i te Atua