E “mafatu faaroo” anei to outou?
I TO Solomona riroraa mai ei arii no Iseraela i tahito ra, aita oia i manaˈo e e maraa te reira ia ˈna. No reira oia i ani ai i te Atua i te paari e te ite. (Paraleipomeno 2, 1:10) Ua pure atoa Solomona e: “Ia horoa mai oe i te mafatu faaroo na to tavini no te haava i to nunaa.” (Te mau arii 1, 3:9, MN) E “mafatu faaroo” to Solomona ra, e pee ïa oia i te mau ture e te mau faaueraa tumu e e ite ïa oia i te haamaitairaa a Iehova.
E ere te hoê mafatu faaroo i te hoê faateimaharaa, te hoê râ tumu oaoaraa. Ua papai te aposetolo Ioane e: “Teie hoi te auraa o te here i te Atua, ia haapao tatou i ta ˈna mau faaueraa; e ere hoi ta ˈna mau faaueraa i te mea teimaha.” (Ioane 1, 5:3, MN) Papu maitai, e tia ia faaroo tatou i te Atua. Inaha hoi, o Iehova to tatou Poiete Rahi. Na ˈna te fenua e te mau mea atoa i nia iho, tae noa ˈtu te taatoaraa o te ario e te auro. No reira, eita ta tatou e nehenehe e horoa mau atu i te hoê noa ˈˈe mea na te Atua i te pae materia, noa ˈtu â e e farii oia ia faaohipa tatou i ta tatou mau faufaa no te faaite i to tatou here no ˈna. (Paraleipomeno 1, 29:14) Te titau ra Iehova ia tatou ia here ia ˈna e ia haere ma te haehaa e o o ˈna, a haapao ai i to ˈna hinaaro.—Mika 6:8.
I to Iesu aniraahia teihea te faaueraa rahi roa ˈˈe o te Ture, ua parau oia e: “[Ia here] oe i to Atua ia Iehova ma to aau atoa, e ma to [nephe] atoa, e ma to manaˈo atoa. O te ture matamua teie e te hau i te rahi.” (Mataio 22:36-38; MN) Te hoê ravea no te faaite i taua here ra, te faarooraa ïa i te Atua. O te pure ïa ta tatou taitahi e au ia faatae ia Iehova ra ia horoa mai oia i te hoê mafatu faaroo.
E mafatu faaroo to ratou
E rave rahi mau hiˈoraa i roto i te Bibilia o te feia mafatu faaroo. Ei hiˈoraa, ua faaue Iehova ia Noa e hamani i te hoê araka rahi roa no te faaoraraa. E ohipa rahi roa teie o tei rave fatata e 40 aore ra e 50 matahiti. Noa ˈtu e e faaohipahia te mau mauhaa puai no teie tau apî e te tahi atu â mau tauihaa e vai ra i teie mahana, e riro â te hamaniraa i te hoê afata rahi o te nehenehe e mau noa i nia i te pape ei ohipa maere mau. Hau atu â, e tia ia Noa ia faaara i te taata tei faaooo e tei tâhitohito ia ˈna ma te feaa ore. Ua faaroo noa râ oia e tae noa ˈtu i roto i te mau mea nainai. Te parau ra te Bibilia e: “O ta ˈna ïa i rave maite.” (Genese 6:9, 22; Petero 2, 2:5) Ua faaite Noa i to ˈna here ia Iehova na roto i te faarooraa ma te haapao maitai e rave rahi matahiti i te maoro. Auê ïa hiˈoraa maitai no tatou paatoa e!
A hiˈo atoa na i te patereareha ra o Aberahama. Ua faaue Iehova ia ˈna ia faarue i te oire taoˈa rahi no Ura i Kaladaio no te haere atu i te hoê fenua matau-ore-hia. Ua faaroo Aberahama ma te ore e ui maere. (Hebera 11:8) No te toea o to ˈna oraraa, ua faaea noa o ˈna e to ˈna utuafare i raro aˈe i te mau fare ie. I muri aˈe e rave rahi matahiti ei taata ěê i taua fenua ra, ua haamaitai ihora Iehova ia ˈna e ta ˈna vahine faaroo, o Sara, i te hoê tamaiti o Isaaka te iˈoa. Auê ïa Aberahama tei raeahia 100 matahiti i te here i ta ˈna tamaiti i noaa i to ˈna ruhiruhiaraa! Tau matahiti i muri aˈe, ua ani Iehova ia Aberahama ia pûpû ia Isaaka ei tusia taauahi. (Genese 22:1, 2) Ua mauiui roa paha Aberahama i te manaˈo-noa-raa i te reira. Teie râ, ua faaroo iho â oia no te mea mea here na ˈna ia Iehova e te tiaturi ra oia e e fa mai te huaai i tǎpǔhia na roto ia Isaaka, noa ˈtu e e titauhia ia faatia mai te Atua ia ˈna mai te pohe mai. (Hebera 11:17-19) Fatata roa Aberahama i te haapohe i ta ˈna tamaiti, tapea ihora Iehova ia ˈna e parau maira e: “Ua ite atura hoi au i teie nei, e e mǎtaˈu to oe i te Atua, o oe aore i pipiri i to tamaiti, i to tamaiti hoê roa ra ia ˈu.” (Genese 22:12) No to ˈna faaroo i parauhia ˈi te taata mǎtaˈu i te Atua ra o Aberahama te “Taua no [“Iehova,” MN].”—Iakobo 2:23.
O Iesu Mesia te hiˈoraa maitai roa ˈˈe i te parau faaroo no tatou. I roto i to ˈna oraraa hou a riro mai ai ei taata, te oaoa noa ra oia i roto i te taviniraa ma te faaroo i to ˈna Metua i nia i te raˈi. (Maseli 8:22-31) Ei taata, ua faaroo noa Iesu ia Iehova i te mau taime atoa, a oaoa noa ˈi i te haapao i to ˈna hinaaro. (Salamo 40:8; Hebera 10:9) No reira i nehenehe mau ai Iesu e parau e: “Aore a ˈu peu rave noa, o ta tau Metua râ i haapii mai ia ˈu ra, o ta ˈu ïa e parau nei. O tei tono mai ia ˈu nei ra, tei pihai atoa iho ïa ia ˈu, aore te Metua i faarue noa ia ˈu o vau anaˈe ra, e aore hoi au i faaea i te rave i te mea e mauruuru ai oia ra.” (Ioane 8:28, 29) I te pae hopea, no te faatia i te mana arii o Iehova e te hoo faahou mai i te huitaata faaroo, ua farii maite Iesu e horoa i to ˈna ora, a faaoromai ai i te pohe haamâ roa ˈˈe e te mauiui. Oia mau, “[i to ˈna riroraa mai] mai te taata nei i te huru, ua faahaehaa oia ia ˈna iho, i te haapao-maite-raa e tae noa ˈtura i te pohe i te pohe [i nia i te pou haamauiuiraa] ra.” (Philipi 2:8; MN) E hiˈoraa maitai mau ïa teie ei faaiteraa i te hoê mafatu faaroo!
Eita e navai te faarooraa i te tahi noa taime
Aita te feia atoa i parau e mea faaroo ratou i te Atua tei faaroo mau ia ˈna. A hiˈo na i te Arii ra o Saula no Iseraela i tahito ra. Ua faaue te Atua ia ˈna ia haamou roa i te mau ati Amaleka. (Samuela 1, 15:1-3) Noa ˈtu e ua haamou Saula ia ratou ei nunaa, ua faaora râ oia i to ratou arii e ua faaherehere oia i te tahi pae o ta ratou mau mamoe e mau puaatoro. Ua ani atu Samuela e: “Eaha ihora hoi oe i ore [ai e faaroo] i te parau a Iehova?” Ei pahonoraa, ua na ô maira Saula e: “Oia ïa, ua faaroo vau i te parau a Iehova . . . Ua rave râ te mau taata [no Iseraela] i [roto i te mau mamoe e te mau puaatoro i haruhia te mea maitatai roa ˈˈe] . . . , ei tusia na . . . Iehova.” Ma te haapapu e mea titauhia te faaroo taatoa, ua pahono aˈera Samuela e: “Tei te tusia taauahi e te mau tusia [anei] to Iehova mauruuru, mai tei te faaroo i te parau a Iehova ra? Inaha, e maitai rahi tei te [faaroo] i tei te tusia, e maitai rahi tei te [haapao maitai] i tei te toâhua mamoe oni ra. Ua faito atoa te faaroo ore i te hara a te hiˈohiˈo, e te mârô i te [peu tahutahu] e te [teraphi] ra: e tena na, ua faarue oe i te parau a Iehova ra, ua faarue atoa Iehova ia oe eiaha oe ei arii.” (Samuela 1, 15:17-23; MN) Auê ïa o Saula i te ere-rahi-hia no te mea e ere to ˈna i te mafatu faaroo!
Tae noa ˈtu te Arii paari ra o Solomona tei pure ia horoahia mai te hoê mafatu faaroo no ˈna, aita oia i tamau noa i te faaroo ia Iehova. Ma te ore e haapao i te hinaaro o te Atua, ua faaipoipo oia i te mau vahine ěê o tei turai ia ˈna ia hara i te Atua. (Nehemia 13:23, 26) Ua erehia Solomona i te hamani maitai o te Atua no te mea aita oia i tamau noa i te faaite i te hoê mafatu faaroo. E faaararaa ïa teie no tatou!
E ere ïa te auraa e te titau maira Iehova i te tia-roa-raa i te mau taata e tavini ra ia ˈna. ‘Te haamanaˈo ra oia e e repo tatou nei.’ (Salamo 103:14) Mea papu maitai e e hape tatou pauroa i te tahi taime, e ite râ te Atua e te hinaaro mau ra anei to tatou mafatu e faaoaoa ia ˈna. (Paraleipomeno 2, 16:9) Ia hape noa ˈtu tatou no to tatou tiaraa taata hara e ia tatarahapa râ tatou, e nehenehe tatou e ani ia faaorehia mai ta tatou hara auaa te tusia taraehara a te Mesia, ma te tiaturi e “te rahi ra hoi ia [Iehova] te faaore i te hara.” (Isaia 55:7; Ioane 1, 2:1, 2) Peneiaˈe e hinaaro atoa tatou i te tauturu a te mau matahiapo kerisetiano î i te here ia nehenehe tatou ia maitai mai i te pae varua e ia puai to tatou faaroo e ia fanaˈo tatou i te hoê mafatu faaroo.—Tito 2:2; Iakobo 5:13-15.
Eaha te faito o to outou faaroo?
Ei tavini no Iehova, e manaˈo te rahiraa i roto ia tatou ma te feaa ore e e mafatu faaroo to tatou. Peneiaˈe, e feruri tatou e, E ere anei e te apiti nei au i roto i te ohipa pororaa i te Basileia? Aita anei au e mau papu ra ia hiti noa mai te tahi mau tumu parau rahi mai te tiaraa amui ore? E aita anei au e haere tamau ra i te mau putuputuraa kerisetiano, mai ta te aposetolo Paulo i aˈo mai? (Mataio 24:14; 28:19, 20; Ioane 17:16; Hebera 10:24, 25) Oia mau, te faaite ra te nunaa o Iehova i te faaroo no roto roa mai i te mafatu i roto i te mau tuhaa faufaa mai teie.
Eaha râ no nia i to tatou haerea i roto i te mau ohipa no te mau mahana atoa, i roto paha i te mau tumu parau hiˈoraa faufaa ore? Ua parau Iesu e: “O tei haapao maitai i te mea iti ra, ua haapao maitai atoa i te mea rahi: e o tei ore i haapao i te mea iti ra, aore atoa ïa i haapao i te mea rahi.” (Luka 16:10) Mea tia ïa ia ui tatou ia tatou iho e, E mafatu faaroo anei to ˈu i roto i te mau ohipa nainai aˈe aore ra mau tumu parau aita vetahi ê e ite ra?
Ua faaite te papai salamo e, noa ˈtu e tei roto oia i to ˈna fare, i te hoê vahi e ore vetahi ê e ite ia ˈna, ‘e haere noa [oia] ma te tia o to ˈna mafatu.’ (Salamo 101:2) A parahi ai outou i roto i to outou fare, peneiaˈe e tuama outou i te afata teata e haamata ˈtu ai i te mataitai i te hoê hohoˈa. I ǒ noa ra, e nehenehe to outou faaroo e tamatahia. Peneiaˈe e riro te hohoˈa i te mea tia ore i te pae morare. E tamau noa anei outou i te mataitai, a manaˈo noa ˈi e te reira iho â te huru hohoˈa e haapararehia i teie nei mau mahana? Aore ra e turai anei to outou mafatu faaroo ia outou ia faaau atu i nia i te aˈoraa a te mau Papai, ‘te faaturi, e te mau parau faufau atoa, eiaha roa ia faahitihia i roto ia outou’? (Ephesia 5:3-5) E tupohe anei outou i te afata teata, noa ˈtu e mea anaanatae roa te aamu? Aore ra e taui anei outou i te reni ia î te hohoˈa i te ohipa taparahiraa taata? “Te tamata maira Iehova i te feia parau-tia [“e te feia iino atoa; te feia e au i te ohipa taparahiraa taata, e riri mau ïa To ˈna nephe ia ˈna,” MN],” ta te papai salamo ïa i himene.—Salamo 11:5.
E horoa mai te hoê mafatu faaroo i te mau haamaitairaa
Parau mau, e rave rahi mau tuhaa i roto i te oraraa e nehenehe tatou e hiˈopoa ia tatou iho ma te faufaahia e no roto mai anei to tatou faaroo i te Atua i te mafatu. E tia ia turai to tatou here ia Iehova ia tatou ia auhia mai e ana e ia rave i ta ˈna e parau maira i roto i ta ˈna Parau, te Bibilia. E tauturu te hoê mafatu faaroo ia atuatu tatou i te mau taairaa maitai e o Iehova. Oia mau, mai te peu e mea faaroo mau tatou, ‘e auhia mai te parau a to tatou vaha e te manaˈo o to tatou mafatu i mua i te aro o Iehova.’—Salamo 19:14.
No te mea e here Iehova ia tatou, e haapii oia ia tatou ia faaroo no to tatou iho maitai. E faufaa-rahi-hia tatou iho ia haapao maitai tatou i te haapiiraa a te Atua ma te mafatu taatoa. (Isaia 48:17, 18) No reira, e farii anaˈe ma te oaoa i te tauturu ta to tatou Metua i nia i te raˈi e horoa mai na roto i ta ˈna Parau, to ˈna varua e ta ˈna faanahonahoraa. Te haapii-maitai-hia ra tatou e mai te huru ra e te parau maira te hoê reo i muri mai ia tatou e: “Teie te eˈa: e na reira i te haere.” (Isaia 30:21) A haapii mai ai Iehova ia tatou na roto i te Bibilia, te mau papai kerisetiano e te mau putuputuraa a te amuiraa, ia haapao maitai tatou, ia faaohipa i ta tatou e haapii ra, e ia “faaroo i te mau parau atoa nei.”—Korinetia 2, 2:9.
E horoa mai te hoê mafatu faaroo i te oaoa rahi e te mau haamaitairaa e rave rahi. E horoa mai te reira i te hau o te varua, no te mea ua ite tatou e te au-maitai-hia maira tatou e te Atua ra o Iehova e te faaoaoa ra tatou i to ˈna mafatu. (Maseli 27:11) E riro te hoê mafatu faaroo ei parururaa ia tatou ia faahemahia tatou e rave i te ohipa hape. Papu maitai ïa, e tia ia faaroo tatou i to tatou Metua i nia i te raˈi e ia pure e: “Ia horoa mai oe i te mafatu faaroo na to tavini.”
[Faaiteraa i te fatu o te hohoˈa i te api 29]
No roto mai i te Self-Pronouncing Edition of the Holy Bible, te vai ra te mau tatararaa King James e Revised i roto