Ua haapii Iesu i te auraro

Ua auraro noa Iesu ia Iehova. (Ioa. 8:29) No te aha ïa te Bibilia e parau ai: “Ua haapii oia i te auraro na roto i te mau mea ta ˈna i faaruru”?—Heb. 5:8.

A ora ˈi i te fenua, ua faaruru Iesu i te mau tupuraa ta ˈna i ore i faaruru aˈenei i te raˈi. Ei hiˈoraa, mea here na to ˈna na metua ia Iehova, tera râ e taata hara raua. (Luka 2:51) Ua rave ino te mau tia faaroo e te feia mana ia ˈna. (Mat. 26:59; Mar. 15:15) Hau atu, “ua auraro noa [oia] e tae noa ˈtu i te pohe,” te hoê pohe mauiui mau.—Phil. 2:8.

Na roto i teie mau tupuraa, ua haapii Iesu i te auraro. E tupuraa teie ta ˈna i ore i farerei aˈenei i te raˈi. E nehenehe ïa o ˈna e riro mai ei Arii e Tahuˈa Rahi tia roa o te faaite i te aumauiui, inaha e taa ia ˈna to tatou mau paruparu. (Heb. 4:15; 5:9) Ua faahiahia roa Iehova i to Iesu haapiiraa i te auraro na roto i ta ˈna i faaruru. Hoê â huru no tatou. E faahiahia atoa Iehova ia tatou ta ˈna e faaohipa no te amo i te hopoia, mai te peu e auraro noa tatou i roto i te mau tupuraa fifi.—Iak. 1:4.