Te fatata roa maira te Tairururaa 1998-1999 “E aratai te eˈa o te Atua i te ora”!
I POLINESIA Farani nei, ua faanahohia e 5 tairururaa mai te avaˈe Tiurai e tae atu i te avaˈe Atete. Peneiaˈe, e tupu te hoê o teie mau haaputuputuraa e toru mahana i te hoê oire i pihai iho noa i to outou vahi faaearaa. I te rahiraa o te mau vahi, e haamata te porotarama e te upaupa i na mahana e toru—mai te Mahana pae e tae atu i te Sabati—i te hora 9 e te afa i te poipoi.
E haafaufaa te porotarama o te Mahana pae poipoi i te mau tabula no nia i te haereraa i mua o te pororaa o te Basileia i roto i te mau tuhaa e rave rau na te ao nei. E e huti te oreroraa parau tumu a te peretiteni “Te hoo o te Mesia—Te eˈa o te faaoraraa a te Atua” i te ara-maite-raa i nia i te tumu parau o te tairururaa.
I te avatea e horoa te oreroraa parau tatuhaahia, “E te mau metua—A haapii i te eˈa o te Atua i ta outou mau tamarii” i te mau manaˈo tauturu e nafea ia turai i te feia apî ia here e ia tavini ia Iehova. E hope te porotarama o te avatea na roto i te oreroraa parau ra “Te vai ra anei te ora i muri aˈe i te pohe?”
E haamatara te porotarama o te Mahana maa poipoi i te ohipa faariroraa i te taata ei pǐpǐ e ravehia ra e te mau Ite no Iehova i roto e toru tuhaa, “E tauturu anaˈe i te taata ia haere na nia i te eˈa e tae atu ai i te ora,” “Te tautooraa ia farerei i te taata,” e “E haapii anaˈe i te mau pǐpǐ i te mau mea atoa ta te Mesia i faaue mai.” I te hopea o te porotarama o te poipoi, e bapetizohia ïa te mau pǐpǐ apî.
E faaitoito mai te oreroraa parau matamua i te avatea o te Mahana maa, “E tavini anaˈe no te fanaˈo i te ora aita e hopearaa,” ia tatou ia feruri na roto i te pure i te mau tumu no reira tatou iho e tavini ai i te Atua. E faaite te mau oreroraa parau “E haafaufaa anaˈe i te ‘mau ô taata’ e haapii maira i te eˈa o te Atua” e “A haapae atu i te huru taata tahito e a ahu mai i te huru taata apî” i te hoê tatararaa anaanatae o te mau irava tataitahi o te Ephesia pene 4. I muri iho, e horoahia mai te hoê aˈoraa maitatai a te mau Papai na roto i te oreroraa parau “Eiaha outou ia viivii i te ao nei” e na roto i te oreroraa parau e toru tuhaa “E te mau taurearea—A pee i te eˈa o te Atua.” E hope te porotarama o te avatea na roto i te oreroraa parau ra “Te Poiete—To ˈna huru e to ˈna mau eˈa.”
I roto i te porotarama o te Sabati poipoi, te vai ra te hoê oreroraa parau e toru tuhaa, o te vauvau mai i te pae hopea o te mau pene o te buka Bibilia a Ezekiela e tae noa ˈtu i te tupuraa o te mau parau tohu o taua mau pene ra. E hope te porotarama o te Sabati poipoi na roto i te hoê darama e hautihia mai ma te oomo i te mau ahu no tahito ra niuhia i nia i te haapao maitai o na taurearea ati Hebera e toru. Te hoê taime faufaa roa o te tairururaa i te avatea, o te oreroraa parau huiraatira ïa, “Te eˈa otahi e tae ai i te ora mure ore.”
Oia mau e faufaahia outou i te pae varua ia tae mai outou i na mahana e toru atoa. E farii-popou-hia outou i te mau tuhaa atoa o te tairururaa, parau mau e tupu te taatoaraa o teie mau tuhaa ma te tamoni ore. No te ite e ihea roa e tupu ai te tairururaa fatata aˈe i to outou vahi, a ani atu i te Piha no te Basileia a te mau Ite no Iehova aore ra a papai atu i te feia nenei i teie vea.