E tae anei outou?

I te matahiti i mairi aˈenei, hau atu i te 8 700 000 taata na te ao nei, tei haere i te tairururaa mataeinaa a te mau Ite no Iehova, “Te feia e arue i te Atua ma te oaoa.” E tae anei outou i te hoê o te mau tairururaa mataeinaa ra “Te mau vea o te hau a te Atua”? Te titau-manihini-hia ˈtu nei outou ia haere atu.

I te rahiraa o te mau vahi, e haamata te tairururaa i te poipoi mahana pae i te hora 9 e te afa na roto i te upaupa. I roto i te rururaa matamua, e vauvauhia mai te oreroraa parau faaitoito mau ra “Eaha ta te Atua e titau ra ia tatou?” E horoahia mai te mau haamaramaramaraa ta tatou e nehenehe e faaohipa no te tauturu i te mau mirioni taata ia rave i te mea ta te Atua e titau ra.

E faaineine te oreroraa parau o te avatea ra “E tauturu anaˈe ia vetahi ê ia haapii i te mau titauraa a te Atua,” i te feia e ruru mai ia rave ma te aravihi atu â i te ohipa faariroraa i te taata ei pǐpǐ. I muri iho, e faaara te oreroraa parau e piti tuhaa ra “A ara i te mau marei huna o te faaanaanataeraa manaˈo,” no nia i te mau marei demoni e tia ia ape. E hope te porotarama o te mahana pae na roto i te oreroraa parau faufaa roa ra “E turu anaˈe ma te taiva ore i te tiaraa hapa ore o te Parau a te Atua.”

E haamatara mai te rururaa o te poipoi mahana maa i te faufaaraa o te ohipa faariroraa i te taata ei pǐpǐ, na roto i te oreroraa parau e toru tuhaa ra “Te faaite ra te mau vea i te parau apî maitai o te hau.” Te oreroraa parau hopea o teie rururaa, no nia ïa i te pûpûraa e te bapetizoraa, apeehia mai e te bapetizoraa o te mau pǐpǐ apî.

E pahono mai te oreroraa parau i te avatea o te mahana maa ra “A hiˈopoa i te mau manaˈo o Iehova i nia i te mau tupuraa,” i te mau uiraa a te taata e rave rahi no nia i te tahi mau tumu parau matauhia. E oaoa roa outou i te oreroraa parau e piti tuhaa e haaputapû i te aau ra “Te haapao ra te Atua o te hau ia outou.” E fanaˈohia te tahi mea taa ê i roto i te oreroraa parau hopea o teie rururaa ra “A tapi i te hau a te Atua i roto i te oraraa utuafare.”

E haamatara te oreroraa parau e toru tuhaa o te poipoi sabati, “Te iteraa e o vai te mau vea mau,” i te upoo parau o te tairururaa na roto i te tuatapaparaa i te hiˈoraa o te mau peropheta a te Bibilia. E hope te porotarama o te poipoi na roto i te hoê darama hautihia mai e te mau ahu no tahito ra, o te haamatara i te mau haapiiraa faufaa mau no roto mai i te aamu bibilia no nia i te Tavana ra o Gideona.—Te mau tavana 6:11–8:28.

I roto i te rururaa hopea o te tairururaa i te avatea o te sabati, e vauvauhia mai te oreroraa parau huiraatira ra “Inaha te hau mau!—Nohea mai ïa?” E na te oreroraa parau faaitoito mau ra “A haere i mua te mau vea o te hau a te Atua,” e faahope i te tairururaa.

A ani atu i te mau Ite no Iehova i te hora e te vahi e tupu ai te tairururaa fatata roa ˈˈe i to outou vahi faaearaa. E horoa te A ara mai na! o te 8 no tiunu i te tabula o te mau vahi nohoraa i reira te tairururaa e tupu ai i Patitifa Apatoa.