Mai te mau fare teitei roa o te mau oire e tae roa ˈtu i te oviriraa o te uru aihere ra Toundra—A haere atu i te taata ra

AITA te ûa, te hiona, te ûa paari, te mau luko, te mau liona o te mouˈa e te tuhaa fenua enemi, i haaparuparu noa ˈˈe i to ratou huru feruriraa itoito. Ma te tere puai maere mau, ua horo ratou e 3 000 kilometera na nia i te puaahorofenua na te fenua î i te matie, na roto atu i te mau anavai puai, e te mau faa hohonu, no te taitai i te mau rata ru i te pae moana Tooa o te râ. O vai ma ratou?

O te mau taurearea faahoro i te puaahorofenua itoito ïa a te pony express.a Eaha tei faatupu i te itoito mai teie i roto i teie mau taurearea? Peneiaˈe te faatitiauaraa, te ori-haere-raa e te oaoaraa i te hopoiraa i te rata i te tahi paeau. Te mea faahiahia, te taitai ra te taata faahoro atoa i te hoê Bibilia i roto i ta ˈna pute aoao e te mau rata ru.

Hau atu i te hoê senekele i muri aˈe, ua faaitehia te hoê huru feruriraa itoito roa ˈtu â, te anaanatae, e te paieti, e na feia poro i te Basileia 113 000 tiahapa na Kanada taatoa. Na te aha e turai ra ia ratou? Na te here i te Atua e te taata-tupu e turai ra ia ratou ia opere i te parau mau o te Basileia, na roto i te mau api parau i neneihia e te parau o te vaha. Mea ru roa ˈtu â ïa teie parau mau e horoa i te ora mure ore i te mau rata i operehia e te pony express. Oia mau, o te poroi faufaa teie o te Basileia no roto mai i te Bibilia Moˈa, te buka mau i itehia i roto i te mau pute aoao a te feia faahoro a te pony express.—Maseli 2:21, 22; Isaia 2:2-4; 61:2; Mataio 22:37-39; 24:14.

Turaihia e te here ia Iehova e te taata

Mea au roa na te mau Ite no Iehova i te paraparau atu i te taata no nia i te Basileia. E ite outou ia ratou e te na reira ra i roto i te mau fare teitei roa o te oire rahi, te mau oire iti atea o te uru aihere ra te toundra, te mau tauraa manureva, te mau aroâ e te tahi atu â mau vahi taata, e na roto i te niuniu. Eaha ratou e haere ai i te mau vahi rau mai teie?

No te tauiraa o te huru oraraa i faahepohia e te mau tupuraa i te pae faanavairaa faufaa e te maraaraa o te numera o te taata, mea fifi roa ia farerei atu i te taata i to ratou fare. Te rahiraa o te taime, e rave te tane e te vahine atoa i te ohipa no te haapao i te hinaaro tumu o te utuafare i te pae tino, e mea pinepine, na roto i te vaiihoraa i te mau hinaaro pae varua. I raro aˈe i te mau faateimaharaa e te hepohepo mai teie, e hinaaro ru mau ratou i te hoê poroi tiaturiraa o te tamahanahana i te mafatu. E pahono te mau Ite no Iehova i te reira ma te oaoa. Ma te mamahu e te maitai, e faatupu ratou i te ravea no te hopoi i te parau apî maitai na te feia huru rau, na roto i te peu maitai e te haaferuri.—Timoteo 1, 2:3, 4.

Na roto i te tahi atu mau reo: I to Iesu faaueraa i te feia e pee ia ˈna ia ‘haere e faariro i te [“taata,” MN] ei pǐpǐ,’ ua faatia oia ia opua e ia itoito ratou i te hopoi i te poroi o te tiaturiraa na te taata no te mau reo atoa. (Mataio 28:19) Mai te mau fenua e rave rahi, ua riro mai o Kanada ei haapueraa peu tumu e reo rau, no reira te feia poro i te Basileia i faaau atu ai ia ratou iho na roto i te haapiiraa i te mau reo apî.

Ei hiˈoraa, ua ite mai na feia faaipoipo, e tavini ma te taime taatoa i Edmonton, i Alberta, i te faufaaraa ia farerei i te feia paraparau i te reo Tinito Mandarin i roto i to raua oire. Na mua roa râ, te hinaaro ra raua e haapii i te reo, no reira raua i farerei ai i te hoê taata haere i te haapiiraa tuatoru o te paraparau i te reo Mandarin. Ua farii oia i te haapii ia raua i te reo e hoê â atoa ia haapii oia i te parau mau o te Bibilia e o raua. Auê ïa te faahiahia e! I roto i te 24 avaˈe, ua aravihi roa teie nau feia poro i te Basileia itoito mau, no te haapii na roto i te reo Mandarin. I taua noâ taime ra, ua ineine atoa to raua orometua/taata haapii no te bapetizoraa kerisetiano.

Te oaoa atoa ra te feia poro i te Basileia no te tahi mau oire i roto i te mau tupuraa mai teie, i te mea e, ma te turaihia e te here, ua haapii ratou i te mau reo mai te reo Polonia, te reo Rusia e te reo Viêt Nam.

Na nia i te purumu: Mai te feia faahoro a te pony express no te senekele i mairi, i faahoro ratou anaˈe, oia atoa e feia faahoro ratou anaˈe te tahi feia poro i te Basileia i roto i te tuhaa fenua no Colombia Beretane. Te rahiraa o to ratou taime, tei roto ratou i ta ratou ohipa rapaeau faahororaa i te mau pereoo rahi puai utaraa raau, na roto i te ururaau e tae atu i te mau fare êêraa raau. E titau te reira ia taai tamau noa ratou i te tahi feia faahoro pereoo rahi na roto i te radio CB (citizens band, oia hoi pǔpǔ huiraatira), ma te tauaparau no nia i te huru o te tereraa pereoo e te mau mea atâta i nia i te purumu.

Ma te feruriraa aravihi, e faaohipa te feia poro i te Basileia i ta ratou radio CB na roto i te hoê ravea taa ê. E haamata ratou i te tauaparauraa i roto i te CB na roto i te faahitiraa i te mau ohipa e tupu noa ra. I muri iho, i reira ratou e faahaere ai ma te aravihi i roto i te Bibilia. I te hoê taime, ua pahono mai te hoê hoa faahoro pereoo rahi i ta te Bibilia e parau ra no nia i te tiaturiraa no tei pohe. (Ioane 5:28, 29; Ohipa 24:15) Ua peapea roa oia i te poheraa te hoê hoa faahoro pereoo i roto i te hoê ati i tupu i nia i te hoê purumu rahi. Ua farii oia ma te aau mehara i te hoê haapiiraa Bibilia e, i teie nei, e nehenehe oia e faaroohia ia poro oia i te parau apî maitai i to ˈna mau hoa rave ohipa e to ˈna mau hoa. I muri aˈe, ei oaoaraa no ˈna, ua haamatahia te hoê haapiiraa Bibilia e te vahine ivi a to ˈna hoa i pohe. Auê ïa haamaitairaa e, te opuaraa i te faaite i te poroi parau mau o te horoa i te ora mure ore, na roto i teie ravea maere!

Na nia i te reva: No nia i te pororaa i te poroi faufaa o te parau mau, e haere te feia poro itoito i te Basileia i te vahi tei reira te mau taata, ‘e tomo ratou i roto i te oire iti’ na nia i te mau manureva nainai. (Mataio 10:11, 12) Aita i maoro aˈenei, e piti pǔpǔ na nia i te manureva i turaihia e te itoito ia poro i te parau apî maitai, e na ratou iho i amo i te haamâuˈaraa, tei tere atu e farerei i te mau taata i purara i te vahi aano e te oviri o te toundra. Ua tapao te pǔpǔ taitahi fatata e 3 000 kilometera e ua tapae ratou i roto i na oire iti taa ê 14, e 250 kilometera to ratou haereraa ˈtu na te Porotaa i te pae Apatoerau atu. Ua tamau noa teie feia poro rohirohi ore e hitu mahana taatoa ia raeahia ia ratou te mau taata atea roa te tahi i te tahi.

Ua riro anei te reira ei tere faahiahia? A feruri noa na i te hopea oaoa ta te poroi a te Bibilia i faatupu i nia i teie mau oire iti. Ua tauturu te mau tavini i ratere atu ia haamâha i te hoê hiaai i te pae varua i to ratou faataa-maite-raa i te opuaraa a Iehova no nia i te hoê paradaiso i nia i te fenua e fatata roa maira. (Mataio 5:3) Maoro i muri aˈe i te revaraa te feia i hopoi mai i te poroi, e nehenehe â te feia mafatu tia i roto i te mau oire iti e taio i na Bibilia e na buka aratai Bibilia e 542 e na vea e 3 000 tei tuuhia ˈtu i roto i to ratou rima.—A faaau e te Ohipa 12:24.

Na roto i te niuniu: Mau tausani taata e faaea nei i roto i te mau fare teitei roa i roto i te mau oire rahi e mea aravihi roa ta ratou mau ravea parururaa ia ratou iho. Noa ˈtu râ, te rohi nei â te feia poro i te Basileia ma te itoito e te mamahu. Nafea ratou e haere ai i te vahi tei reira teie mau taata? Noa ˈtu â e mea au aˈe te paraparauraa ˈtu i te taata iho, mea pinepine te niuniu paraparau o te nohoraa i te faaohipahia ma te manuïa. Eita anaˈe e nehenehe e na reira, na to ratou ïa rima e rave i te ohipa, na roto i te taniuniu-roa-raa ˈtu i te taata.

I te hoê poipoi, ua pahono maira te hoê vahine paari i te niuniu. I muri aˈe i te hoê aroharaa poto noa ma te peu maitai, ua anihia ˈtu oia e e manaˈo anei oia e te vai ra te mahana e nehenehe te taata e haere na roto i te mau aroâ ma te mǎtaˈu ore ia pô. Ua taiohia ˈtu na ˈna te mau Papai no te haapapu atu e e rahi te hau a muri aˈe. (Salamo 37:10, 11; Daniela 2:44; Mataio 6:9, 10) Ua farii oia i te hoê paraparauraa na roto i te niuniu no te hebedoma mua, hoê â hora, no te tauaparau no te aha e nehenehe ai e tiaturi i te mau tǎpǔ a te Atua. Hoê avaˈe to raua haapiiraa i te Bibilia na roto i te niuniu ma te taio i te mau paratarapha i roto i te hoê buka aratai Bibilia e te uiraa i te mau uiraa tano maitai, ua arue mai nei te vahine ra i te taata poro i te Basileia no to ˈna faahitiraa i te mau tumu parau rau i te mau hebedoma atoa. O te taime maitai ïa no te faataa ˈtu eaha te buka haapiiraa Bibilia i faaohipahia e no te pûpû atoa ˈtu hoê na ˈna. Ua faanaho atura raua e ia farerei roa raua. Inaha, ua faaite te mau Ite no Iehova i to ratou here i te taata, e te pahono mai nei te taata, ma te faˈi e tei teie feia poro kerisetiano ra o Iehova.—A faaau e te Korinetia 1, 14:25.

Na roto i te mau api parau i neneihia: Te haere atoa ra te feia poro i te Basileia no te tuhaa fenua no Québec e reo Farani to te rahiraa, i te mau vahi tei reira te taata. Ua faataa mai te hoê tavini ratere e: “Ehia matahiti to te mau taeae i manaˈo-noa-raa e aita ratou e haere ra i mua no te taehae o te patoiraa a te ekalesia. Auaa râ te ohipa rohirohi ore a te mau taeae e ta ratou mau hoˈi-faahou-raa tamau, e itehia ˈi te Bibilia i roto i te rahiraa o te mau fare, o te hoê hoi buka matau-ore-hia e i taio-anaˈe-hia e te taata iti roa.”

Mea oaoa roa te mau faahopearaa no te mea te itehia ra te feia poro apî no te mau tuhaa atoa o te totaiete taata no Québec, oia atoa to te pǔpǔ taote. O tei tupu ïa i nia i te hoê taote. E pinepine ta ˈna vahine, e vahine poro i te Basileia hoi oia, i te tauaparau i nia i te tiaturiraa o te Bibilia e o ˈna. Ua opua aˈera te hoê matahiapo peepee o te amuiraa e titau manihini i te taote ia haere mai i te putuputuraa o te amuiraa i te taime a tuatapapahia ˈi te vea iti ra Nafea te toto ia faaora i to outou ora? Ua haere mai oia e ua pahono atoa oia. Ua horuhoru roa oia i te maitai e te hohonu i te pae varua o te mau paraparauraa e ua farii atura i te hoê haapiiraa Bibilia na ˈna iho. I teie nei, e taata poro atoa oia i te Basileia.

E faufaa rahi to te faaohipa-mau-raa i te mau vea i roto i te faaanaanataeraa i te taata i te Bibilia. Eita tatou e ite teihea tumu parau te ohipa no te aratai i te hoê taata i te parau mau. Ua pûpû te hoê taata poro i te Basileia i te hoê numera o te A ara mai na! na te hoê vahine tapiri o tei ore i hinaaro e faaroo i te poroi, o tei anaanatae râ i te mau manumanu o te ao. Ua maere oia i te hohoˈa e vai ra i roto i te numera o te 22 no Novema 1992 o te A ara mai na!, i te tumu parau “Te maˈi a Chagas—Te hoê apâ pohe” (Farani). I te mea e ua horuhoru roa oia i ta ˈna i taio, ua ani faahou oia i te mau vea hau. Ua haamatahia te hoê haapiiraa Bibilia, e i roto noa e ono avaˈe, te poro ra oia ia vetahi ê.

I te mau vahi taata: E faatia te ture a Kanada ia paraparauhia te taata i te mau vahi taata mai te mau tauraa manureva. I te tauraa manureva rahi no Halifax, e haafatata omoe noa ˈtu te feia poro i te Basileia i te feia tere manureva, i te area taime hou te revaraa, a tauaparau atu ai ia ratou. E faaohipahia te mau uiraa tano maitai no te aratai i te tauaparauraa i nia i te Bibilia. I te mea e e taitai ratou i te hoê Bibilia nainai roa e te mau buka, e nehenehe ratou e haamâha i te hiaai i te pae varua. E mau taote tâpû, mau aivanaa, mau paruru, mau pailati, mau ekalesiatiko, mau mutoi, mau taata faahoro ratere, mau taata aravihi i te pae o te mau matini, mau orometua haapii, mau faehau, e te feia politita no te mau fenua ěê mai, tei rotopu i tei faaroo i te poroi o te Basileia na roto i teie ravea e tei hopoi ê i te mau huero o te parau mau ia hotu atu i te mau vahi atea.—Kolosa 1:6.

Ia poipoi roa, i te tauraa manureva, ua farii te hoê taata i te mau vea ra Te Pare Tiairaa e te A ara mai na! Ua parau atura oia ma te reo mǎrû roa e: “Auê, eiaha, eiaha te mau Ite no Iehova!” Eaha hoi oia i na reira ˈi? E taata faaroo Mahometa te taata ra e no pure noa ˈtura oia i roto i te fare pure o te tauraa manureva. Te taparu ra oia i te Atua ia faaite mai ia ˈna i te paari, te ite hohonu e te parau mau. Mea maere roa na ˈna te manaˈoraa e o te mau Ite no Iehova te pahonoraa oioi i ta ˈna pure.

Inaha, aita roa ˈtu te feia poro itoito i te Basileia no Kanada i vaiiho i te hoê noa ˈˈe ohipa ia faataupupu i te pororaa i te poroi faufaa o te Basileia. Aita ratou i vaiiho i te mau reo ěê, te mau purumu ino e te reporepo, te mau oire iti atea, te mau fare teitei roa o te oire rahi i paruru-maitai-hia, ia haaparuparu ia ratou. Te hinaaro mau ra ratou e opere i te poroi ora a te Atua na te feia mafatu tia e imi ra i te parau mau. Mai to ratou mau taeae e mau hoa rave ohipa na te ao atoa nei, e faaroo ratou ma te miimii ore i te faaueraa a Iesu ia ‘haere e faariro i te [“taata,” MN] ei pǐpǐ.’—Mataio 28:19.

[Nota i raro i te api]

[Tumu parau tarenihia i te api 27]

Te faaohipa nei te feia poro i te Basileia i te niuniu ma te manuïa

Ua parau vetahi e: “Iaorana. O [a horoa i te iˈoa] to ˈu iˈoa. Ua paraparau poto noa vau i te mau taata i roto i to outou fare teitei nafea e noaa ˈi te hau. E manaˈo anei oe e e tupu te hau na te ao atoa nei? [A vaiiho i te taata ia pahono mai.] Ei tamǎrûraa i to oe feruriraa, aita vau e rave nei i te hoê tuatapaparaa aore ra e hoo nei i te hoê taoˈa. Aita, te opere nei au i te manaˈo no roto mai i te mau Papai Moˈa e e hopoi mai iho â te Atua i te hau.” I muri aˈe e nehenehe atu ai te paraparauraa e haere i mua na roto i te tauaparauraa poto i nia i te irava.

Ua parau te tahi atu â e: “Iaorana i teie arui. O [a horoa i te iˈoa] to ˈu iˈoa. E taata tauturu vau i to outou nei vahi. Te maimi nei au i te mau manaˈo o te mau taata taitahi e faaea ra i roto i to outou fare teitei. E rave rahi teie e haapeapea nei no to ratou iho vai-maitai-raa ia hiˈo ratou i te maraaraa o te haavîraa uˈana e te ohipa ino i to outou vahi. E haapeapea atoa anei teie mau mea ia oe? [A vaiiho i te taata ia pahono mai.] E manaˈo anei oe e te vai ra te hoê mahana e itehia ˈi te vai-maitai-raa na te ao atoa nei?” A vaiiho i te taata ia pahono mai e, i muri iho, a haere i mua na roto i te hoê poroi a te Bibilia.