Te faˈi nei te mau ekalesia i ta ratou mau hapa

“Te haava nei te pâpa i te Ekalesia.” “Tiribuna hairesi e hamani-ino-raa i te ati Iuda—Te faaineine ra te Ekalesia i ta ˈna mea culpa.”a “Mea culpa no te Taparahiraa ati Iuda.” “Te tatarahapa nei te mau Méthodiste i te mau Inidia Marite Tooa o te râ.”

UA TAIO aˈena anei outou i teie mau huru upoo parau? E au ra e te pinepine noa ˈtura te mau ekalesia i te farii i to ratou hape e i te tatarahapa no te mau ohipa o ta ratou i rave na i te roaraa o te mau senekele. Te faahitihiti tamau nei te mau ravea haapurororaa i te mau mea culpa apî a te pâpa.

Ia tatarahapa anaˈe te pâpa

I rotopu i te mau matahiti 1980 e 1996, ‘ua faˈi [o Ioane Paulo II] i te mau hape ta te Ekalesia i rave i roto i te aamu aore ra ua tatarahapa oia’ e 94 aˈe taime, o ta te taata tatara parau no te Vaticana ra o Luigi Accattoli ïa e parau ra i roto i ta ˈna buka ra Quando il papa chiede perdono (Ia tatarahapa anaˈe te pâpa). Ia au i te parau a Accattoli Tane, “i roto i te Ekalesia Katolika, o te pâpa anaˈe tei faatiahia ia faatae i te hoê mea culpa.” O ta ˈna ïa i rave, no te mau tuhaa faahapa-roa ˈˈe-hia o te aamu Katolika—te mau Aroraa faaroo, te mau tamaˈi, te tururaa i te mau faatereraa haavî, te amahamaharaa i roto i te mau ekalesia, te hamani-ino-raa i te ati Iuda, te mau Tiribuna hairesi, te Mafia, e te au-ore-raa i te taata ê. I roto i te hoê rata i faataehia i te matahiti 1994 i te mau karadino (ta vetahi e faariro nei mai te papai faufaa roa ˈˈe a te tino pâpa), ua faaau o Ioane Paulo II i “te hoê faˈiraa taatoa i te mau hara o te mileniuma.”

E rave rahi mau ekalesiatiko o tei pee i te hiˈoraa o te pâpa. I te avaˈe Titema 1994, ua faataa te vea Italia ra Il Giornale e: “E rave rahi epikopo Marite o tei tia ˈtu na roto i te afata teata no te tatarahapa i mua i te huiraatira.” No te aha? No to ratou haafaufaa-ore-raa i te fifi o te mau perepitero mafera tamarii, e haerea hoi o tei faaino e rave rahi mau tamarii. I te avaˈe Tenuare 1995, ua faataa te vea ra La Repubblica i “te hoê ohipa aita i itehia aˈenei i roto i te aamu o te haapaoraa Katolika no teie nei tau”—ua faahitihia te fifi o te mamûraa te Pâpa Pie XII i mua i te Taparahiraa ati Iuda. I te avaˈe Tenuare 1995, ua faataa teie â vea e ua tatarahapa te tino epikopo Helemani no te “mau hape e rave rahi” a te mau Katolika Roma o tei turu na i te mau ohipa hairiiri a te mau Nazi. E rave rau mau ekalesia Porotetani o tei hiˈopoa atoa i ta ratou mau hapa i rave.

No te aha?

Te faaitoito ra te Bibilia ia tatou ia tatarahapa ia hape anaˈe tatou, e e rave rahi o te haapopou nei i te mau ekalesia no to ratou hiˈopoaraa i ta ratou mau hapa i rave. (Iakobo 5:16) No te aha râ te mau ekalesia e na reira ˈi? Nafea te reira ia ohipa i nia i to tatou huru hiˈoraa ia ratou?

[Nota i raro i te api]