Te taviniraa i te Atua e nehenehe mau e tiaturihia

Faatiahia e Kimon Progakis

Tei te hoê po toetoe roa i te matahiti 1955. Ua haamata mâua ta ˈu vahine, o Giannoula, i te haapeapea no te mea aitâ o George, ta mâua tamaiti e 18 matahiti, i hoˈi mai atura mai te fare hooraa vea i reira oia e rave ai i te ohipa. Ua hitimahuta mâua i te patotoraa mai te hoê mutoi i to mâua opani. “Ua faaûhia ta orua tamaiti a hoˈi mai ai oia i te fare na nia i to ˈna pereoo tataahi,” o ta ˈna ïa i faaara mai, “e ua pohe oia.” Ua piˈo maira oia i mua e ua na ô maira ma te reo mǎrû e: “E parau mai ratou e e ati purumu, a tiaturi mai râ i ta ˈu parau, ua taparahihia oia.” Ua opua hoi te perepitero no to matou vahi e te tahi mau raatira faehau e haapohe ia ˈna.

I TAUA mau matahiti ra, i te tau a faanaho faahou ai o Heleni ia ˈna i muri aˈe i te mau tau aroraa e te fifi, mea atâta mau ia riro ei Ite no Iehova. Ua ite maitai au i te mana o te Ekalesia Orthodoxe no Heleni e to te mau faanahonahoraa faehau no te mea hau atu i te 15 matahiti to ˈu riroraa ei melo itoito no teie mau pu. E faatia ˈtu vau i te mau ohipa i tupu hou teie ati i roohia i nia i to matou utuafare, hau atu i te 40 matahiti i teie nei.

To ˈu paariraa mai i Heleni

Ua fanauhia vau i te matahiti 1902 i roto i te hoê utuafare navai maitai, i roto i te hoê oire iti i pihai iho i te oire no Chalcis, i Heleni. Mea puai roa to ˈu papa i roto i te ohipa politita i to matou vahi, e e mau melo faaroo roa to ˈu mau fetii no te Ekalesia Orthodoxe no Heleni. Mea au roa na ˈu ia taio i te mau buka no nia i te politita e te faaroo, i te hoê tau i reira aita te rahiraa o te mau taata o to ˈu fenua i ite i te taio.

Ua faatupu te veve e te parau-tia ore i uˈana i te omuaraa o te senekele 20, i roto ia ˈu te hiaai no te hoê ao maitai aˈe. Ua manaˈo hoi au e e nehenehe ta te haapaoraa e haamaitai atu i te huru oraraa peapea o te mau taata o to ˈu fenua. No to ˈu au i te ohipa faaroo, ua ani maira te mau tia o to ˈu oire iti ia ˈu ia riro ei perepitero Orthodoxe Heleni no to matou mataeinaa. Teie râ, noa ˈtu e ua haere au e mataitai e rave rahi fare monahi e ua paraparau maoro vau e te mau epikopo e te mau raatira monahi, aita vau i ineine aore ra i hinaaro i te farii i teie huru hopoia.

I te tau tamaˈi tivila

Tau matahiti i muri iho, i te avaˈe Eperera 1941, ua topa ˈtura o Heleni i raro aˈe i te faatereraa Nazi. O te haamataraa ïa o te hoê tau taiâ tei î i te taparahiraa taata, te oˈe, te veve, e te mauiui taata aita e faaauraa. Ua fa maira te hoê taatiraa aro huna, e ua faaô atura vau i roto i te hoê o te mau pǔpǔ tamaˈi e aro ra i te mau enemi Nazi. No reira, e rave rahi taime, ua tutuihia to ˈu fare i te auahi, ua pepe au i te ofai pupuhi, e ua vavahihia ta ˈu mau faaapu. I te omuaraa o te matahiti 1943, aita ˈtu ravea ta ˈu e ta to ˈu utuafare maoti râ te hororaa e tapuni i nia i te mouˈa atâta. Ua faaea noa matou i reira e tae roa ˈtu i te hopea o te faatereraa Helemani i te avaˈe Atopa 1944.

I to te mau Helemani revaraa, ua uˈana ˈtura te mau aroraa politita e tivila i roto iho i te fenua. Riro mai nei te pǔpǔ patoi huna tei roto vau, ei hoê o te mau nuu aro rahi o te tamaˈi tivila. Noa ˈtu e ua hutihia to ˈu manaˈo i te mau fa communiste no te parau-tia, te aifaitoraa, e te auhoaraa, i muri aˈe râ i to ˈu iteraa i te tupuraa mau, aita ˈtura vau i tiaturi faahou. I te mea e e tiaraa teitei to ˈu i roto i te pǔpǔ, ua ite mata roa ˈtu vau e e faaino te mana i te taata. Noa ˈtu te mau manaˈo e te mau fa teitei ia hiˈohia, e faaino iho â te miimii e te huru tia ore i te mau opuaraa politita maitatai roa ˈˈe.

Te mea iho â râ o ta ˈu i ore roa i au, oia hoi i te mau pae ěê atoa o te aroraa tivila, ua rave te mau ekalesiatiko Orthodoxe i te mauhaa no te taparahi i te feia o ta ratou iho haapaoraa! Ua manaˈo vau, ‘Nafea teie mau ekalesiatiko ia parau e e tia ratou no Iesu Mesia, inaha ua faaara oia e: “O te rave hoi i te ˈoˈe ra, e pohe ïa i te ˈoˈe”?’—Mataio 26:52.

I te tau o te tamaˈi tivila, i te matahiti 1946, te tapuni ra vau i pihai iho i te oire no Lamia, i ropu ia Heleni. Ua motumotu roa to ˈu ahu, no reira, ua opua ˈtura vau e faahuru ê i to ˈu hohoˈa e e haere i te hoê taata nira ahu ra i te oire, no te nira i te tahi ahu apî no ˈu. Te tupu ra te hoê mârôraa rahi i to ˈu tapaeraa ˈtu, e aita i maoro, ua paraparau atoa vau, eiaha no nia i te politita, no nia râ i to ˈu here tahito, te haapaoraa. I to ratou iteraa i to ˈu ite no nia i teie mau ohipa, ua faaitoito maira te feia i reira ia paraparau vau e te hoê ‘orometua tuatapapa faaroo.’ I reira iho, ua haere atura ratou e tii ia ˈna.

Ua itea mai ia ˈu te hoê tiaturiraa papu

I roto i te aparauraa i tupu i muri iho, ua ani mai taua “orometua” ra e eaha te niu o to ˈu mau tiaturiraa. “Te mau Metua Moˈa e te mau Apooraa Eukumene,” o ta ˈu ïa i pahono atu. Aita oia i faahapa mai ia ˈu, tera râ, ua huri oia i ta ˈna Bibilia nainai i te Mataio 23:9, 10, e ua ani maira ia ˈu ia taio i te mau parau a Iesu: “E eiaha roa outou e faametua i te hoê taata o teie nei ao, oia anaˈe ra hoi to outou Metua o te parahi i te raˈi ra. Eiaha atoa e titau ia parauhia outou, i te aratai; hoê roa hoi o outou aratai, o te Mesia.”

Mai te mea e ua maramarama to ˈu mata! Ua taa ia ˈu e te faaite ra teie taata i te parau mau. I to ˈna parauraa mai e e Ite no Iehova oia, ua ani atura vau ia ˈna ia horoa mai i te tahi mau buka e taio. Ua afai mai oia na ˈu i te buka ra Maramarama (beretane), oia hoi te hoê tatararaa no nia i te buka Bibilia a te Apokalupo, e ua hoˈi atura vau e teie buka i to ˈu vahi tapuniraa. Ehia maororaa to te mau puaa faahitihia i roto i te Apokalupo riroraa ei miterio no ˈu, i teie râ taime, ua haapii au e te faahohoˈa ra teie mau puaa i te mau faanahonahoraa politita e vai nei i to tatou senekele e 20. Ua papu atura ia ˈu e e auraa mau to te Bibilia no to tatou nei tau e e tia ia ˈu ia haapii i teie buka e ia faaau i to ˈu oraraa i ta ˈna mau parau mau.

Haruhia e tapeahia

I muri noa iho, ua tomo taue maira te mau faehau i roto i to ˈu vahi tapuniraa e ua haru maira ratou ia ˈu. Ua taorahia vau i roto i te hoê piha tapearaa o te hoê pare. I te mea e mea maoro to ˈu imiraahia ei taata ofati ture, ua manaˈo iho â ïa vau e e haapohehia vau. I reira, ua haere mai te Ite o tei paraparau mai ia ˈu i te taime matamua ra e hiˈo ia ˈu i roto i to ˈu piha tapearaa. Ua faaitoito mai oia ia ˈu ia tiaturi taatoa ia Iehova, o ta ˈu ïa i rave. Ua faautuahia vau i te hopoi-ê-raa e ono avaˈe i nia i te motu o te miti Égée ra o Ikaria.

I to ˈu iho â tapaeraa ˈtu, ua faaite atu vau ia ˈu ei Ite no Iehova, eiaha ei Communiste. Ua hopoi-atoa-hia vetahi atu feia i haapii i te mau parau mau Bibilia i reira, ua imi atura vau ia ratou, e ua haapii amui matou i te Bibilia ma te tamau. Ua tauturu mai ratou ia ˈu ia faarahi atu â i to ˈu ite i te mau Papai e to ˈu maramarama no nia i to tatou Atua e nehenehe mau e tiaturihia, oia hoi o Iehova.

I te matahiti 1947, i te hoperaa ta ˈu utua, ua titauhia vau ia haere i te piha a te haava a te hau. Ua parau mai oia e ua maere roa oia i to ˈu haerea e ua parau oia e e nehenehe ta ˈu e rave i to ˈna iˈoa ei paruru no ˈu mai te peu noa ˈtu e e hopoi-ê-faahou-hia vau. I to ˈu taeraa ˈtu i Ateno, tei reira to ˈu utuafare i te faaearaa, ua haamata ˈtura vau i te tahoê atu e te hoê amuiraa a te mau Ite no Iehova e aita i maoro, ua bapetizo atura vau ei taipe no to ˈu pûpûraa ia ˈu no Iehova.

Faahapahia i te ohipa faataui faaroo

E mau ahuru matahiti to Heleni hororaa i te mau Ite no Iehova ia au i te mau ture i faaotihia i te mau matahiti 1938 e 1939, o tei opani i te ohipa faataui faaroo. No reira, mai te matahiti 1938 tae atu i te matahiti 1992, e 19 147 taime to te mau Ite tapearaahia i Heleni, e ua faaoti te mau tiribuna i te mau utua o tei naeahia i te taatoaraa e 753 matahiti, e e 593 tei rave-mau-hia. No ˈu nei, ua tapeahia vau hau atu i te 40 taime no te pororaa i te parau apî maitai o te Basileia o te Atua, e ia taio-pauroa-hia, ua tapeahia vau e 27 avaˈe i roto i te mau fare auri huru rau.

I te hoê taime, ua tapeahia vau no te mea ua papai au i te hoê rata i te hoê ekalesiatiko Orthodoxe Heleni i Chalcis. I te matahiti 1955, ua faauehia te mau amuiraa a te mau Ite no Iehova, ia hapono i te buka iti ra Amuiraa faaroo kerisetiano aore ra Kerisetianoraa—Teihea “te maramarama o te ao”? (beretane) i te mau ekalesiatiko atoa. Ua horo te hoê o te mau ekalesiatiko tiaraa teitei o ta ˈu i papai atu, ia ˈu no te ohipa faataui faaroo. I te haavaraa, ua vauvau te paruru e Ite oia e te paruru no taua vahi ra, i te hoê parururaa faahiahia roa, e ua faataa raua e e ohipa titauhia ia poro te mau Kerisetiano mau i te parau apî maitai no nia i te Basileia o te Atua.—Mataio 24:14.

Ua ani atura te haava peretiteni o te tiribuna i te tia faaroo (e ekalesiatiko tei raro mai i te epikopo) e: “Ua taio anei oe i te rata e te buka iti?”

“Aita,” o ta ˈna ïa i pahono ma te riri, “ua tumutu vau e ua faarue au i te reira te taime iho vau a iriti ai i te vehî rata!”

“No te aha ïa oe e parau ai e ua tamata teie taata i te faataui i to oe faaroo?” o ta te haava peretiteni ïa i ani.

I muri iho, ua faahiti to matou paruru i te hiˈoraa o te mau orometua haapii e vetahi atu feia o tei horoa ei ô i te mau haapueraa buka rahi na te mau fare vairaa buka a te huiraatira. “E parau anei outou e ua tamata teie mau taata i te faataui i to vetahi ê ra faaroo?” o ta ˈna ïa i ani.

Ma te papu maitai, e ere te reira i te ohipa faataui faaroo. Ua haamauruuru vau ia Iehova i to ˈu faarooraa i te faaotiraa: “Aita e hapa.”

Te poheraa ta ˈu tamaiti

Ua haapeapea-noa-atoa-hia ta ˈu tamaiti o George, mea pinepine o te mau ekalesiatiko Orthodoxe te tumu. E rave rahi atoa taime to ˈna tapearaahia no to ˈna itoito e au i te taurearea i te faaiteraa i te parau apî maitai o te Basileia o te Atua. I te pae hopea, ua faaoti atura te feia patoi i te haapohe ia ˈna e, i te hoê â taime, e faatae mai i te hoê poroi faariaria ia matou nei ia faaea matou i te poro.

Ua parau te mutoi i haere mai i to matou fare no te faaara mai i te poheraa o George e, ua opua te perepitero Orthodoxe Heleni no to matou vahi e vetahi mau raatira faehau, e haapohe i ta mâua tamaiti. Mea pinepine hoi teie mau “ati” i taua mau tau atâta ra. Noa ˈtu to matou mauiui i to ˈna poheraa, ua puai atu â to matou hinaaro e vai itoito noa i roto i te ohipa pororaa e e tiaturi taatoa ia Iehova.

Te tautururaa ia vetahi ê ia tiaturi ia Iehova

I ropu i te mau matahiti 1960, e haere atu ta ˈu vahine e ta mâua mau tamarii e faafaaea i te mau avaˈe veavea i te oire iti i te pae miti ra o Skala Oropos, tau 50 kilometera te atea ia Ateno. I taua tau ra, aita e Ite e faaea ra i reira, no reira, ua poro matou ma te faanaho-ore-hia i te feia tapiri. Ua farii maitai mai vetahi feia faaapu no taua vahi ra. I te mea e e rave te mau tane i te ohipa i roto i ta ratou mau faaapu i te mahana taatoa, e faatere ïa matou i te mau haapiiraa Bibilia e o ratou i te maororaa po, e ua riro mai vetahi ei mau Ite.

I to matou iteraa i to Iehova haamaitairaa i ta matou mau tutavaraa, tau 15 matahiti to matou tere-noa-raa i te mau hebedoma atoa i reira no te faatere i te mau haapiiraa Bibilia e te feia anaanatae. Fatata e 30 taata o ta matou i haapii tei haere i mua e tae roa ˈtu i te bapetizoraa. A tahi, ua haamauhia te hoê pǔpǔ haapii, e o vau tei faataahia no te faatere i te mau putuputuraa. I muri iho, riro mai nei te pǔpǔ ei amuiraa, e i teie mahana, hau atu i te hoê hanere Ite no taua vahi ra o te putuputu nei i roto i te Amuiraa no Malakasa. Te oaoa nei matou e e maha o te feia o ta matou i tauturu, tei riro i teie nei ei mau tavini ma te taime taatoa.

Te hoê tufaa hau aˈe i te faahiahia

I muri noa ˈˈe i to ˈu pûpûraa i to ˈu oraraa no Iehova, ua haamata ta ˈu vahine i te haere i mua i te pae varua e ua bapetizohia oia. I te tau fifi o te hamani-ino-raa, ua puai noa to ˈna faaroo e ua mau maite oia ma te aueue ore i to ˈna haerea taiva ore. Aita oia i amuamu noa ˈˈe no nia i te mau haafifiraa e rave rahi o ta ˈna i faaoromai no te mea ua tapea-pinepine-hia vau i te fare auri.

I te roaraa o te mau matahiti, ua faatere amui mâua e rave rahi haapiiraa Bibilia, e ua tauturu maitai oia e rave rahi taata na roto i ta ˈna huru raveraa ohie noa e to ˈna aau tae. I teie nei, e mau ahuru taata ta ˈna e opere tamau nei i na vea ra Te Pare Tiairaa e A ara mai na!

Auaa iho â râ te turu o to ˈu hoa here, mea itoito pauroa ta mâua e toru tamarii e ora noa nei e to ratou mau utuafare, oia hoi e ono mootua e e maha hina, i roto i te taviniraa a Iehova. Noa ˈtu e aita ratou i faaruru i te hamani-ino-raa e te patoiraa uˈana ta ta ˈu vahine e ta ˈu atoa i faaû, ua tuu ratou i to ratou tiaturi taatoa i roto ia Iehova, e ua haere noa ratou na nia i to ˈna mau eˈa. Auê matou pauroa i te oaoa e, ia farerei faahou matou i ta matou George iti i te tia-faahou-raa!

Hinaaro papu e tiaturi ia Iehova

I taua mau matahiti atoa ra, ua ite au i te varua o Iehova i te ohiparaa i nia i to ˈna nunaa. Ua tauturu ta ˈna faanahonahoraa arataihia e te varua ia ˈu ia ite e eita tatou e nehenehe e tuu i to tatou tiaturi i roto i te mau tutavaraa a te taata. Mea faufaa ore ta ratou mau parau tǎpǔ e haamaitai atu i te oraraa no a muri aˈe, e nehenehe hoi e parauhia e e haavare rahi te reira.—Salamo 146:3, 4.

Noa ˈtu to ˈu paari e to ˈu mau paruparu rahi i te pae tino, te tiatonu noa râ to ˈu mata i nia i te parau mau o te tiaturiraa o te Basileia. Te tatarahapa mau nei au i te mau matahiti atoa o ta ˈu i horoa no te haapaoraa hape e no te tamata i te haamaitai i te mau ohipa na roto i te mau ravea politita. Ahiri e e nehenehe ta ˈu e haamata apî faahou i to ˈu oraraa, ma te feaa ore, e maiti au i te tavini ia Iehova, te Atua e nehenehe mau e tiaturihia.

(Aita i maoro iho nei, ua pohe o Kimon Progakis. Ua tiaturi oia e ora i nia i te fenua nei.)

[Hohoˈa i te api 26]

Te hoê hohoˈa o Kimon e ta ˈna vahine, o Giannoula, i patahia aita i maoro aˈenei