Te faatia ra te feia poro i te Basileia

Te tauturu no tei “hiaai” i Rusia

“E AO to tei hiaai i te maitai; e faaîhia hoi ratou,” o ta Iesu ïa i parau. (Mataio 5:6) Te faaite ra te mau aamu i muri nei e mea nafea te mau Ite no Iehova i te tautururaa ˈtu no te haamâha i te hiaai i te pae varua no e rave rahi i Rusia, i reira te faaitiraahia te tiamâraa o te haapaoraa hau atu i te 70 matahiti.

▪ E mau uiraa Bibilia faufaa roa ta te hoê vahine o Valentina te iˈoa, tei ore i pahonohia e rave rahi matahiti. Ei hiˈoraa, ua aniani oia e: ‘O vai ta Iesu i pure?’ Ua feruri oia e ua pure o Iesu i te hoê tei teitei aˈe ia ˈna iho e ua aniani oia no nia i te iˈoa o taua Taata ra.

Ua haere atura oia i te fare pure Orthodoxe no te fenua Rusia. Teie râ, i roto i taua haapaoraa ra aita i itehia ia ˈna te mau pahonoraa i ta ˈna mau uiraa. No to ˈna mauruuru ore, ua haere atu oia i te hoê fare pure Porotetani aita i itehia mai ia ˈna te mau pahonoraa maramarama. No te taa ore e haere ihea, ua haamata o Valentina i te taio i te Bibilia, ma te tamata i te ite i te mau pahonoraa na roto ia ˈna iho—aita i manuïa. Ua pure oia no te ani i te tauturu.

Tau taime i muri iho, ua patoto mai te mau Ite no Iehova i to ˈna opani. Ua faaite raua ia ˈna i roto i te Bibilia e o Iehova te iˈoa o te Atua. A tahi ra ïa oia a ite ai e o vai ta Iesu i pure! Ua haamata oia i te haapii ma te tamau i te Bibilia e te mau Ite. Pinepine eita oia e taoto i te po no te taioraa i te mau papai neneihia e te Taiete Watch Tower e te hiˈoraa i te mau irava Bibilia. Oioi roa o Valentina i te faaoti e ua itehia mai ia ˈna te parau mau. I roto noa e toru avaˈe, ua haamata oia i te haere i roto i te ohipa pororaa, e e piti avaˈe i muri iho, ua bapetizohia oia. Ua haamauruuruhia to ˈna maimiraa ma te pure i te parau mau.

▪ Ua tere atu te hoê Ite na nia i te pereoo uta taata no te poro i roto i te hoê vahi atea. I roto i taua tere ra, ua paraparau atu oia i te hoê vahine apî no nia i te mau parau tǎpǔ a te Bibilia, aita râ te vahine apî i anaanatae. E piti avaˈe i muri iho ua ratere te Ite no te pitiraa o te tere i taua noa vahi ra no te horoa i te hoê oreroraa parau. I muri aˈe i te oreroraa ua haafatata ˈtu oia i te hoê taata e ua ui atu ia ˈna e: “Ua paraparau-aˈenei-hia oe na mua ˈˈe e te hoê taata no nia i te parau apî maitai no roto mai i te Bibilia?” Ua pahono atura te taata ra e, “Oia, na oe i paraparau mai.” Ua manaˈo te Ite e te parau hauti maira oia. Ua faataa râ te taurearea e e piti avaˈe na mua ˈtu, ua faaroo oia i te aparauraa i rotopu i te Ite e taua vahine apî ra, i roto i te pereoo uta taata. “Ua hinaaro vau e ite hau atu â, teie râ, ua pou oe, e ua manaˈo vau e eita vau e ite faahou i te mau Ite no Iehova. I muri iho i ta ˈu vahi raveraa ohipa, ua farerei au i te hoê taata o te haapii ra i te Bibilia e te mau Ite no Iehova. E inaha teie au!”

Ua haamata ˈtura teie taata e ta ˈna vahine i te haapii i te Bibilia. I muri iho i te hoê area taime poto, ua nehenehe oia e ite e aita ta ˈna ohipa e tu ra e te mau faaueraa tumu a te Bibilia. No to ˈna hinaaro e tapea i te hoê haava manaˈo maitai i mua i te Atua, ua taui oia ta ˈna ohipa. I teie nei, te faaite ra oia ia vetahi ê no nia i te Basileia o te Atua i te mau taime atoa. Te haere atoa ra ta ˈna vahine i mua i roto i ta ˈna haapiiraa Bibilia.

Te mauruuru nei te mau Ite no Iehova i roto i te tuhaa fenua rahi no Rusia i te apiti i roto i te parauraa ˈtu i te mau taata aau mehara atoa e: “E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.”—Apokalupo 22:17.