I te tau aita e ohipa ino

E NEHENEHE anei ta outou e feruri i te hoê ao aita e ohipa ino? Eita paha, mai te peu e ua taio aˈenei outou i te mau parau apî mai tei neneihia i roto i te hoê vea Helemani, te Süddeutsche Zeitung: “Te faahiti nei te feia tuatapapa i te ohipa ino, i te parau no te hoê faito ohipa ino apî. Te tohu nei ratou i te mau ohipa riaria e te vauvau nei ratou i te hoê hohoˈa mehameha roa no a muri aˈe.”

Ia au i te hoê fafaraa manaˈo i ravehia i te matahiti 1995 i nia tau tausani taata no Europa, fatata te taatoaraa o tei haapeapea e ia roohia ratou i te ohipa ino. I Beretane, i Helemani, i Holane, i Polonia, e i Rusia, o te ohipa ino te numera hoê i nia i te tabula o te mau mea e riaria-rahi-roa-hia nei e te taata. O te mǎtaˈu i te ohipa ino te numera piti i Danemata, i Filelane, e i Helevetia, e te toru i Farani, i Heleni, e i Italia. I nia i na nunaa 12 i fafahia, o Paniora anaˈe tei ore i faahiti i te ohipa ino i roto i na tumu mǎtaˈuraa matamua e toru.

Ua maraa taue te mau ohipa iino i Europa Hitia o te râ i na matahiti e hitu i mairi aˈenei. I roto e rave rahi o teie mau fenua, tei roto teie maraaraa i te 50 e te 100 %, area i roto i te tahi atu mau fenua ra, tei roto ïa i te 193 e te 401 %!

Teie râ, i te matamua ra, ua vai na te hoê ao aita e ohipa ino. Anafea te reira i te tupuraa, e mea nafea taua ao ra i te inoraa?

Nohea mai te ohipa ino?

Te ohipa ino, faataahia mai “te ofatiraa ino mau i te ture,” ua haamata ïa i roto i te ao varua. Aita na taata matamua, o Adamu raua o Eva, i poietehia e te mau hinaaro e rave i te ohipa ino i roto ia raua, e e ere atoa na raua te hape taatoa i ô mai ai te ohipa ino i roto i te totaiete taata nei. Ua vaiiho te hoê tamaiti varua tia roa a te Atua i te mau manaˈo iino ia aˈa i roto i to ˈna mafatu, e i to ˈna atuaturaa i te reira, ua aratai tia ˈtura ia ˈna ia rave i te ohipa ino. O taua varua ra te tumu i viivii ai te ao aita e ohipa ino i te matamua ra. Na roto i te ofatiraa i te ture a te Atua, ua faariro oia ia ˈna iho ei taata ohipa ino, e te piihia ra oia i roto i te Bibilia te Diabolo ra o Satani.—Iakobo 1:13-15; Apokalupo 12:9.

I te mea e ua maiti oia i te patoi atu i te Atua i roto i te mau raˈi itea-ore-hia, ua opua ˈtura o Satani e haaparare i ta ˈna mau eˈa ohipa ino i roto i te mau taata i nia i te fenua nei. Mea poto e mea ohie roa te aamu a te Bibilia e mea nafea te Diabolo i te raveraa i te reira, e faatiaraa papu râ. (Genese, mau pene 2-4) Ua patoi o Adamu raua o Eva, tei aratai-hape-hia e taua varua ohipa ino haavarevare ra, i te auraro i te mau faaueraa a te Atua. Ua riro maira raua ei feia ohipa ino na roto i te faaroo-ore-raa i te Atua. I muri iho, eita e ore e ua hitimahuta raua ma te riaria atoa hoi a faaere ai o Kaina, ta raua matahiapo, i te taoˈa faufaa roa ˈˈe a to ˈna teina ra o Abela, oia hoi to ˈna ora!

No reira, i nia i na taata matamua e maha i ora na i nia i te fenua nei, e toru o tei riro mai ei feia ohipa ino. Ua erehia ˈtura o Adamu, o Eva, e o Kaina i te ravea e ora i roto i te hoê ao aita e ohipa ino. Nafea tatou, i muri aˈe i tera roaraa tau, e papu ai e te fatata roa maira te hoê ao mai te reira te huru?