Te mau Ite no Iehova na te ao nei—Beresilia
E FENUA rahi o Beresilia i roto e rave rahi tuhaa. No nia i to ˈna rahi e to ˈna huiraatira, ua riro oia te paeraa o te fenua rahi roa ˈˈe i te ao nei. Te tapoˈi ra oia fatata i te afaraa o te fenua o Marite Apatoa e mea rahi aˈe te huiraatira i reira i te tahi atu mau fenua atoa i amuihia o taua fenua rahi ra. I Beresilia atoa e itehia ˈi te uru raau heeuri haumi rahi roa ˈˈe i te ao nei. I roto i taua uru raau heeuri e tahe ai te anavai puai roa ˈˈe i nia i te fenua nei—te Amazonie.
E fenua rahi atoa o Beresilia i roto i te tahi atu tuhaa. Te fatata ra te numera o to ˈna feia poro i te parau apî maitai o te Basileia a te Atua i te 400 000, e i te matahiti i mairi aˈenei ua hau atu i te 1 000 000 o tei tae atu i te oroa Haamanaˈoraa o te poheraa o te Mesia. Mea anaanatae iho â râ teie fenua no te ohipa pororaa i te Basileia. Te haapapu ra te mau ohipa i tupu aita i maoro aˈenei i te reira.
Taviniraa i te vahi e titau-rahi-hia ra
Ua rave o Antonio e ta ˈna vahine i te faaotiraa fifi mau e faarue i to raua mau fetii e te hoê ohipa aufau-maitai-hia i São Paulo no te tavini i te vahi e titau-rahi-hia ra te feia poro i te Basileia i te hau no Minas Gerais. I roto i ta raua tuhaa fenua te vai atoa ra te hoê pǔpǔ rave ohipa i te hoê fare hamaniraa tihota. I te mahana matamua o to raua pororaa i reira, ua haamata raua e iva haapiiraa bibilia. I roto e 18 avaˈe, ua faatere raua hau atu i te 40 haapiiraa!
I te omuaraa, ua faatupuhia te mau putuputuraa i roto i te fare hamaniraa tihota. Ua hinaaro râ te feia poro apî e hiˈo i te hoê Piha mau no te Basileia. No reira, ua tarahuhia te hoê pereoo mataeinaa no te faauta e 75 taata i te amuiraa fatata roa ˈˈe. I muri iho ua tupu te hoê tairururaa; ua tae e ua uiuihia e 45 feia haapii bibilia apî. Ua bapetizohia hoê ahuru ma pae o ratou i taua tairururaa ra. Papu maitai, ua tahe rahi te mau roimata o te oaoa!
Ua faaohipahia taua noâ pereoo mataeinaa no taua mau huru tere ra, e ua haamama te feia toroa a te feia mana i te tute o te reira. Ei haamauruururaa, ua pûpû o Antonio i te hoê tauturu haapiiraa bibilia i te fatu o te taiete faautaraa taata. Ua farii oia ia haamatahia te haapiiraa bibilia i taua po ra e ua bapetizohia oia i muri aˈe e rave rahi avaˈe haapii-maite-raa. I te omuaraa, ua patoi ta ˈna vahine i te haapiiraa, i te taime au râ, ua mǎrû mai oia. I teie nei mahana e Ite no Iehova atoa o ˈna o tei bapetizohia.
I te avaˈe febuare 1992 ua haamauhia te hoê amuiraa e 22 feia poro itoito. Mai te matahiti 1994 mai â ua maraa teie numera i te faito e 42, e e 4 pionie tamau, aore ra feia poro ma te taime taatoa o te parau apî maitai. Ei faahopearaa, ua faaoti o Antonio e: “Ua taa ia mâua ta ˈu vahine e mai te peu e e ‘tamata tatou ia Iehova,’ mai ta te Malaki 3:10 e faataa ra, ‘e ninii mai oia i te hoê haamaitairaa e tae atu ai i te ravai-roa-raa.’”
Te pûpûraa i te mau buka bibilia
Peneiaˈe te tahi atu tumu e naeahia ˈi te ohipa pororaa i taua huru maraaraa ra i Beresilia oia hoi te pûpû nei te mau Ite i te mau buka bibilia i te mau taime atoa. Ei hiˈoraa, ua papai te hoê amuiraa i te amaa a te Taiete Watch Tower no te ani e 250 buka Les jeunes s’interrogent—Réponses pratiques. No te aha teie aniraa rahi?
Ua faataa te rata e: ‘Ua faaoti te hoê o te mau fare haapiiraa o te oire e faaohipa i teie buka ei mauhaa haapiiraa i roto i te hoê pǔpǔ haapiiraa. Te tumu o te faaotiraa a te feia rahi o te fare haapiiraa oia hoi ua horoahia te faaiteraa faanaho-ore-hia e te mau metua o te mau tamarii haere haapiiraa Ite no Iehova tae noa ˈtu i te hoê taata rahi o te fare haapiiraa. Ia tamau noa Iehova i te haamaitai i ta ˈna mau tavini a pûpû ai ratou i te haapiiraa maitai maoti teie buka.’ Oia mau, e ia tamau noa Iehova i te haamaitai i te haere-maitai-raa i mua o te ohipa pororaa i te Basileia i roto i te fenua rahi no Beresilia.
[Tumu parau tarenihia i te api 8]
TABULA O TE FENUA
Matahiti taviniraa 1994
NUMERA RAHI ROA ˈˈE O TE FEIA PORO: 385 099
FAITO: 1 Ite no e 404
FEIA I TAE MAI I TE OROA HAAMANAˈORAA: 1 018 210
NUMERA AU NOA O TE MAU PIONIE: 38 348
NUMERA AU NOA O TE MAU HAAPIIRAA BIBILIA: 461 343
RAHIRAA FEIA BAPETIZOHIA: 24 634
RAHIRAA AMUIRAA: 5 928
AMAA: CESÁRIO LANGE
[Hohoˈa i te api 9]
Pereoo haapuroro parau i ohipahia i São Paulo i te area 1940
[Hohoˈa i te api 9]
Te pororaa i te Ô Uru Raau i Rio de Janeiro
[Hohoˈa i te api 9]
Amaa i Cesário Lange