Te mau haamaitairaa o te mǎtaˈuraa i te Atua mau
“O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.”—ISAIA 48:17.
1. Eaha te mau ati o tei nehenehe hoi e paruruhia e te mǎtaˈu paieti?
AHIRI o Adamu i faatupu i te mǎtaˈu paieti, e faatiamâ ïa te reira ia ˈna i te hara o tei aratai i to ˈna iho pohe mure ore e tau tausani matahiti mauiui no ta ˈna huaai. Ahiri te nunaa tahito o Iseraela i haapao i te aˈoraa a Iehova oia hoi ia mǎtaˈu e ia here ia ˈna, eita ïa teie nunaa e hopoi-tîtî-hia i Babulonia, eita atoa ratou e patoihia e te Tamaiti a te Atua e e faahapahia no te haamaniiraa i to ˈna toto. Ahiri te ao i mǎtaˈu i te Atua i teie nei mahana, eita ïa e itehia te ohipa ino i roto i te faatereraa aore ra i roto i te imiraa moni, te taparahiraa taata, te tamaˈi.—Maseli 3:7.
2. Noa ˈtu te mau huru tupuraa i roto i te ao e haaati ra ia tatou, no te aha e tia ia tatou ia faatupu i te mǎtaˈu ia Iehova?
2 Noa ˈtu râ e eaha ta te ao e haaati ra ia tatou e rave nei, e nehenehe tatou te mau taata, te mau utuafare fetii, e te mau amuiraa o te mau tavini o Iehova e faufaahia i roto i te faatupuraa i te mǎtaˈu i te Atua mau. E tuea te reira i te faahaamanaˈoraa ta Mose i horoa i te nunaa o Iseraela: “Eaha to te Atua no oe na to Iehova hinaaro ia oe, maori râ e, ia mǎtaˈu oe i to Atua ia Iehova, e ia haere i to ˈna atoa ra mau eˈa, e ia hinaaro oe ia ˈna; e ia haamori oe i to Atua ra ia Iehova ma to aau atoa, e ma to [nephe] atoa; e ia haapao maite oe i te mau parau a Iehova, . . . ia maitai oe ra?” (Deuteronomi 10:12, 13) Eaha vetahi mau haamaitairaa e faufaahia e tatou ia mǎtaˈu anaˈe tatou ia Iehova, te Atua mau?
Te paari—E mea faufaa aˈe i te auro
3. (a) Eaha te haamaitairaa matamua ta tatou e nehenehe e fanaˈo? (b) Eaha te auraa o te Salamo 111:10?
3 O te paari mau te haamaitairaa matamua. Te parau ra te Salamo 111:10 e: “O to matamua o te paari ra, oia te mǎtaˈu ia Iehova ra.” Eaha ïa te auraa? Ua riro te paari te aravihi ia faaohipa i te ite ma te manuïa no te faatitiaifaro i te mau fifi, no te ape i te ino, e no te faatupu i te tahi mau tapao. E titau te reira i te feruriraa papu. Te haamataraa, te tuhaa matamua, te niu o teie paari, o te mǎtaˈu ïa ia Iehova. No te aha? No te mea ua riro te poieteraa atoa ei ohipa hamanihia e ta ˈna nau rima. Tei ia ˈna noa te faaotiraa. Ua faafanaˈo oia i te huitaata i te tiamâraa ia maiti eiaha râ i te aravihi no te aratai i to ratou iho mau taahiraa avae ma te manuïa maoti ta ˈna aratairaa. (Iosua 24:15; Ieremia 10:23) Mai te peu noa e e haafaufaa tatou i teie mau tupuraa faufaa mau no nia i te oraraa e e ora tatou ia au i te reira, e nehenehe tatou e manuïa e a muri noa ˈtu. Mai te peu e te horoa maira to tatou ite no nia ia Iehova i te tiaturiraa aueue ore e e manuïa iho â te hinaaro o te Atua e e mea papu ta ˈna parau tǎpǔ e to ˈna aravihi ia haamauruuru i te haapao maitai, e turai ïa te mǎtaˈu paieti ia tatou ia ohipa ma te paari.—Maseli 3:21-26; Hebera 11:6.
4, 5. (a) No te aha aita te haapiiraa tuatoru a te hoê taata apî i horoa ˈtu i te paari mau? (b) Mea nafea teie taata e ta ˈna vahine i te fanaˈoraa i muri aˈe i te paari mau, e mea nafea te reira i te tauiraa i to raua oraraa?
4 E rave anaˈe na i te hoê hiˈoraa. Tau ahuru matahiti i teie nei, ua haere te hoê taata apî i te Fare Haapiiraa Tuatoru no Saskatchewan, i Kanada. I roto i te porotarama haapiiraa e haapii-atoa-hia te ihiora, e ua haapiihia oia e e mea tupu noa te mau mea. I muri aˈe i te faatuiteraahia, ua faaaravihi atu â o ˈna ia ˈna i roto i te tuatapaparaa i te huru o te mau taoˈa atomi, ua fanaˈo oia i te tufaa moni na te hau no te faanuu â i ta ˈna mau haapiiraa i mua i te Fare Haapiiraa Tuatoru no Toronto. A haapii noa ˈi oia, ua ite o ˈna i te haapapuraa faahiahia mau o te nahonahoraa e te tereraa o te mau huru atomi. Aita râ e pahonoraa i te mau uiraa e: Na vai i faanaho i te reira? I afea? E no te aha? Ahiri aita e pahonoraa i teie mau uiraa, e nehenehe anei oia e faaohipa i to ˈna ite ma te paari i roto i te hoê ao e tamaˈi ra? Na te aha e aratai ia ˈna? Te here aiˈa anei? Te hoê hinaaro i te mau haamauruururaa materia? I te tupuraa mau, ua noaa anei ia ˈna te paari mau?
5 Aita i maoro roa i muri aˈe i to ˈna faatuiteraahia, ua haamata teie taata apî e ta ˈna vahine i te haapii i te Bibilia e te mau Ite no Iehova. I roto i te Parau iho a te Atua, ua haamata aˈera raua i te ite i te mau pahonoraa tei erehia ia raua na mua ˈˈe. Ua ite aˈera raua e o vai te Poiete, te Atua ra o Iehova. A haapii ai raua no nia ia Mose i te Miti Uteute e no nia ia Daniela e to ˈna mau hoa i Babulonia, ua haapii raua i te faufaaraa o te mǎtaˈuraa eiaha i te mau taata i te Atua râ. (Exodo 14:10-31; Daniela 3:8-30) Ua haamata teie mǎtaˈu paieti apitihia e te here mau no Iehova i te ohipa i nia ia raua. Aita i maoro roa ua taui roa to raua huru oraraa taatoa. I te pae hopea ua itea i te taata apî te Taata i hamani i te mau mea ta ˈna i tuatapapa i roto i te ihiora. Ua haamata oia i te taa i te opuaraa o te Taata na ˈna te paari i faaitehia i roto i ta ˈna tuatapaparaa i te mau huru o te mau taoˈa atomi. Maoti i te faaohipa i to ˈna ite no te hamani i te mau mauhaa o te haamou i to ˈna taata-tupu, ua hinaaro oia e tae noa ˈtu ta ˈna vahine e tauturu ia vetahi ê ia here i te Atua e ia here i to ratou taata-tupu. Ua rave raua i te taviniraa ma te taime taatoa ei feia poro i te Basileia o te Atua. I muri aˈe, ua haere raua i te Haapiiraa bibilia no Gileada a te Taiete Watchtower e ua tonohia raua ei mau mitionare.
6. Mai te peu e e paari to tatou i aahia i roto i te mǎtaˈu ia Iehova, eaha te mau tapitapiraa papu ore o ta tatou e ape, e eaha râ ta tatou e rave?
6 Papu maitai, eita te taatoaraa e nehenehe e riro mai ei mitionare. E nehenehe râ tatou paatoa e haafaufaa i te paari i aahia i roto i te mǎtaˈu ia Iehova. Mai te peu e e faatupu tatou i teie paari, eita tatou e roo-rahi-hia i te mau haapiiraa philosopho a te mau taata o te tamata noa i te horoa i te hoê manaˈo no nia i te tumu o te oraraa. E faaohipa tatou iho i te haapiiraa o te Bibilia, faauruahia e te Pu o te ora, te Atua ra o Iehova, o te nehenehe e horoa mai i te ora mure ore. (Salamo 36:9; Kolosa 2:8) Maoti i te riroraa ei tîtî o te hoê faanahoraa tapihooraa tauihaa i te hiti o te topatariraa, e ara maite tatou i te aˈoraa a Iehova ia mauruuru noa i te maa e te ahu, a faariro ai tatou i to tatou taairaa e te Atua ei mea matamua i roto i te oraraa. (Timoteo 1, 6:8-12) Maoti i te ohipa mai te huru ra e o te hoê tupuraa maitai i roto i teie nei ao to tatou oraraa no a muri aˈe, e tiaturi tatou i te Parau a Iehova i to ˈna parauraa e e mou teie nei ao e to ˈna atoa hoi hinaaro, o te taata râ e haapao i te hinaaro o te Atua e ora ïa e a muri noa ˈtu.—Ioane 1, 2:17.
7. (a) Nafea te Maseli 16:16 e tauturu ai ia tatou ia tapea i te hoê manaˈo aifaito no nia i te mau mea te tia ia haafaufaahia? (b) Eaha te mau haamauruururaa e noaahia mai i roto i te faariroraa te hinaaro o te Atua te tuhaa faufaa roa ˈˈe o to tatou oraraa?
7 Te faaitoito ra te Maseli 16:16 ia tatou na roto i te faataaraa ma te parau mau e: “E maitai rahi tei te noaa te paari [te paari o te haamata e te mǎtaˈuraa ia Iehova] i te auro; e ia noaa hoi te haapao ra, e maitai rahi ïa i tei te ario ra.” E turai teie paari e teie haapao ia tatou ia faariro i te hinaaro o te Atua ei tuhaa faufaa roa ˈˈe o to tatou oraraa. E eaha te ohipa ta te Atua i tuu no ta ˈna mau Ite no teie taime i roto i te aamu o te taata nei? Te pororaa ïa no nia i to ˈna Basileia e te tautururaa i te feia mafatu haavare ore ia riro mai ei mau pǐpǐ mau na Iesu Mesia. (Mataio 24:14; 28:19, 20) E horoa teie ohipa i te mauruuru mau e i te oaoa rahi. Ma te tano maitai, te parau ra te Bibilia e: “E ao te taata i noaa ia ˈna te paari.”—Maseli 3:13.
Ei parururaa i te hara
8. (a) A faahiti i te piti o te haamaitairaa o te mǎtaˈuraa i te Atua. (b) Eaha te mea ino te tia ia paruruhia tatou? (c) Nafea te mǎtaˈu paieti ia riro ei puai o te turai papu?
8 Te piti o te haamaitairaa o te mǎtaˈuraa i te Atua, o te parururaa ïa ia tatou i te raveraa i te mea ino. Eita te feia e faatura hohonu ra i te Atua e faaoti no ratou iho e eaha te mea maitai e eaha te mea ino. Eita ratou e faariro ei mea ino ta te Atua e parau ra e e mea maitai, eita atoa ratou e faariro i te mau mea ta te Atua e parau ra e e mea ino ei mau mea maitai. (Salamo 37:1, 27; Isaia 5:20, 21) Hau atu, eita te hoê taata o te faatupu mau ra i te mǎtaˈu paieti e faaea noa i te iteraa eaha ta Iehova e parau e e mea maitai e eaha ta ˈna e parau e e mea ino. E here teie taata i te mea ta Iehova e here ra e e riri oia i te mea ta Iehova e riri ra. Ei faahopearaa, e ohipa oia ia au i te mau ture a te Atua. No reira, mai tei faataahia i roto i te Maseli 16:6, “te faarue nei te taata i te ino i te mǎtaˈu ia Iehova.” E riro teie mǎtaˈu paieti ei puai rahi turai no te rave i te hoê ohipa te ore e nehenehe i te hoê taata ia rave i to ˈna iho ra puai.
9. Nafea te hoê hinaaro puai ia ore e haapeapea i te Atua i te manaraa i nia i te faaotiraa a te hoê vahine i Mexico, e eaha te faahopearaa?
9 Noa ˈtu e no teie roa nei te mǎtaˈu paieti i te mahoraraa i roto i te hoê taata, e haapuai te reira ia ˈna ia ape i te rave i te tahi mea o ta ˈna e nehenehe e tatarahapa no te toea o to ˈna oraraa. Ei hiˈoraa, ua aniani te hoê vahine faaipoipo i Mexico i te hoê Ite no Iehova no nia i te haamaruaraa tamarii. Ua taio atu te Ite e rave rahi mau irava e i muri iho ua haaferuri oia ia ˈna: “I mua i te aro o te Poiete, e mea faufaa roa te ora, tae noa ˈtu te ora o tei ore i fanauhia ˈtura.” (Exodo 21:22, 23; Salamo 139:13-16) Ua faaite te hoê hiˈopoaraa i te pae rapaauraa maˈi e e nehenehe to ˈna aiû e riro mai ei huma. I teie nei râ, turaihia e te mea ta ˈna i ite i roto i te Parau a te Atua, ua faaoti aˈera te vahine e fanau i ta ˈna aiû. Ua patoi to ˈna taote i te hiˈo faahou ia ˈna, e ua haamehameha ta ˈna tane ia ˈna e e faarue oia ia ˈna, ua mau papu râ o ˈna i ta ˈna faaotiraa. I te naearaahia te taime, ua fanau oia i te hoê tamahine—mai vetahi mau aiû atoa, te oraora maitai, e te nehenehe. Ma te turaihia e te mauruuru, ua imi oia i te mau Ite, e ua haamata aˈera ratou i te haapii i te Parau a te Atua e o ˈna. I roto hoê matahiti ua bapetizohia oia e ta ˈna tane. I te hoê tairururaa mataeinaa tau matahiti i muri iho, ua oaoa roa raua i te farerei-faahou-raa i te Ite matamua e ua faaite atu raua i ta raua tamahine nehenehe mau e maha matahiti. Papu maitai, e mana puai te faaturaraa tia i te Atua e te hoê hinaaro puai ia ore e haapeapea ia ˈna i nia i te oraraa o te hoê taata.
10. E nehenehe te mǎtaˈu paieti e haapaari i te mau taata ia tiamâ mai i teihea huru hara?
10 E haapaari te mǎtaˈu paieti ia tatou i mua i te rahiraa o te mau hara. (Korinetia 2, 7:1) Ia faatupuhia oia ma te tano, e nehenehe te reira e tauturu i te hoê taata ia faaea i te rave huna noa i te mau hara, itehia e Iehova anaˈe. E nehenehe te reira e tauturu ia ˈna ia tiamâ mai i te faatîtîraa o te inu-hua-raa i te ava aore ra i te rave-hua-raa i te raau taero. Ua faataa te hoê taata i pupuhi na i te raau taero i Afirika Apatoa e: “A rahi noa ˈi to ˈu ite no nia i te Atua, ua faatupu atoa vau i te hoê mǎtaˈu no te ore e haamauiui aore ra e haapeapea ia ˈna. Ua ite au e te hiˈo maira oia, e ua hinaaro rahi au e ia farii mai oia ia ˈu. Ua turai te reira ia ˈu ia faarue i te mau raau taero e vai ra ia ˈu ma te taora i te reira i roto i te vahi haumitiraa e te hutiraa i te pape.” Ua tauturu te mǎtaˈu paieti tau tausani atu â mai te reira huru atoa.—Maseli 5:21; 15:3.
Te parururaa i te mǎtaˈuraa i te mau taata
11. E paruru te mǎtaˈu tia ia tatou i teihea marei matauhia?
11 E paruru atoa te mǎtaˈu tia i te Atua ia tatou i mua i te mǎtaˈu taata. Te roohia ra te rahiraa o te mau taata i te mǎtaˈu taata i roto i te tahi huru faito rahi aˈe aore ra iti aˈe. Ua faarue atoa te mau aposetolo a Iesu Mesia ia ˈna e ua horo ratou i to ˈna tapearaahia e te mau faehau i roto i te ô i Getesemane ra. I muri aˈe, i roto i te fare o te tahuˈa rahi, oia i erehia i te aifaito e tapeahia e te mǎtaˈu, ua patoi Petero e e pǐpǐ o ˈna na Iesu e ua matau atoa oia ia ˈna. (Mareko 14:48-50, 66-72; Ioane 18:15-27) Ua tauturuhia râ te mau aposetolo ia noaa faahou ia ratou te aifaito i te pae varua. I te tahi aˈe pae, i te anotau o te Arii Iehoiakima ra, no te î hoi Uria te tamaiti a Semaia i te mǎtaˈu, faarue ihora oia i ta ˈna taviniraa ei peropheta no Iehova e faarue aˈera oia i te fenua, ia haru-noa-hia e ia taparahi-pohe-hia i muri aˈe.—Ieremia 26:20-23.
12. (a) I nia i teihea parururaa i mua i te mǎtaˈu taata ta te Maseli 29:25 e huti ra i te ara-maite-raa? (b) Nafea te tiaturiraa i te Atua ia tupu mai?
12 Eaha te nehenehe e tauturu i te hoê taata ia upootia i nia i te mǎtaˈu taata? I muri aˈe i te faaararaa e “e roohia i te fifi tei mǎtaˈu i te taata ra,” te na ô ra te Maseli 29:25 i muri iho e: “O tei tiaturi râ ia Iehova ra, e ora ïa.” O te tiaturiraa ia Iehova ïa te taviri. Ua niuhia teie tiaturiraa i nia i te ite e te aravihi e noaa mai i te oraraa. Na roto i te haapiiraa i ta ˈna Parau, e ite tatou i te haapapuraa o te parau-tia o te mau eˈa o Iehova. E ite papu ïa tatou i te mau tupuraa o te faaite i to ˈna huru o te nehenehe e tiaturihia, te papuraa o ta ˈna mau parau tǎpǔ (oia atoa te tia-faahou-raa), to ˈna here e to ˈna puai mana hope. I muri aˈe ia ohipa tatou ia au i teie ite, ia rave tatou i te mau ohipa ta Iehova e faaue maira e ia patoi tatou ma te faaherehere i te mea ta ˈna e faaara maira, e haamata ïa tatou i te haafaahiahia na mua roa i to ˈna aupuru here mau e to ˈna huru o te nehenehe e tiaturihia. E ite tatou iho i te haapapuraa e e ohipa to ˈna puai no te faaoti i to ˈna hinaaro. E rahi to tatou tiaturiraa ia ˈna, e apitihia i te reira, to tatou atoa here ia ˈna e to tatou hinaaro haavare ore i te haapeapea ia ˈna. Ua patuhia teie tiaturiraa i nia i te hoê niu paari mau. E ohipa te reira mai te hoê paruru i mua i te mǎtaˈu taata.
13. Nafea te mǎtaˈu paieti ia tauturu ia tatou i ta tatou vahi raveraa ohipa, i te fare, e i te fare haapiiraa?
13 E haamau papu to tatou tiaturiraa ia Iehova, apitihia mai e te mǎtaˈu paieti, ia tatou no te mea tia mai te peu e e haamǎtaˈu te hoê paoti ohipa ia tatou e e erehia tatou i ta tatou ohipa no to tatou hinaaro-ore-raa e amui atu i roto i te tahi mau ohipa tia ore. (A faaau e te Mika 6:11, 12.) Te faaitoito ra teie mǎtaˈu paieti e rave rahi tausani kerisetiano ia tamau noa i roto i te haamoriraa mau i mua i te patoiraa o te mau melo o te utuafare aita i roto i te parau mau. E horoa atoa te reira i te itoito i te mau taurearea haere haapiiraa ia faaite ia ratou iho ei mau Ite no Iehova, e e haapaari te reira ia ratou no te faaruru i te huru maamaa o te mau tamarii haere haapiiraa o te faaooo nei i te mau ture o te Bibilia. No reira, ua parau te hoê Ite taurearea tamahine e: “E ere roa ˈtu to ratou manaˈo i te mea faufaa. O ta Iehova râ e manaˈo te reira te mea faufaa.”
14. Nafea te mau tavini o Iehova ia upootia ia haamǎtaˈu-atoa-hia to ratou oraraa?
14 Te haapuai ra taua nei â manaˈo papu ra i te mau kerisetiano mau ia etaeta noa i roto i te mau eˈa o Iehova noa ˈtu te haamǎtaˈuraa no to ratou ora. Ua ite ratou e e tia iho â ia ratou ia faaruru i te hamani-ino-raa o teie nei ao. Te taa ra ia ratou e ua rutuhia te mau aposetolo e ua taparahihia o Iesu Mesia iho e ua haapohehia oia e te mau taata iino. (Mareko 14:65; 15:15-39; Ohipa 5:40; a faaau e te Daniela 3:16-18.) Te tiaturi taatoa nei râ te mau tavini o Iehova e e nehenehe te reira e haapuai ia ratou no te faaoromai; maoti te tauturu a te Atua e nehenehe ai ratou e upootia; ma te papu e haamauruuru Iehova i te feia haapao maitai—mai te peu e titauhia na roto ïa i te tia-faahou-raa no te ora i roto i ta ˈna ao apî. Na to ratou here i te Atua apitihia e te mǎtaˈu paieti e haapuai ia ratou ia ape i te rave i te tahi mea o te haapeapea ia ˈna.
15. Eaha tei tauturu i te mau Ite no Iehova ia tapea noa i to ratou taiva ore i roto i te mau aua tapearaa taata nazi?
15 Ua tauturu taua tiaturiraa papu ra i te mau Ite no Iehova ia faaruru noa i te mau ohipa hairiiri o te mau aua tapearaa taata nazi i te mau matahiti 1930 e 1940. Ua tapea maine ratou i te aˈoraa a Iesu papaihia i roto i te Luka 12:4, 5 i roto i to ratou mafatu: “E aˈo atura vau ia outou, e au mau hoa e, eiaha e mǎtaˈu i te taparahi mai i te tino nei e oti aˈera aita ˈtu a ratou e noaa. E faaite atura vau ia outou i ta outou e mǎtaˈu; o tei pohe te tino ia ˈna e muri aˈera e tia ia ˈna ia huri i te po ra; oia ïa, o ta ˈu ïa parau ia outou, oia ta outou e mǎtaˈu.” No reira, ua papai o Gustav Auschner, te hoê Ite i tuuhia i roto i te aua tapearaa taata i Sachsenhausen i muri aˈe e: ‘Ua pupuhi te mau SS ia August Dickmann e ua haamǎtaˈu ratou e e pupuhi ratou i te toea o matou mai te peu e eita matou e tarima i te hoê parau faaite no to matou faarueraa i to matou faaroo. Aita te hoê noa ˈˈe o matou i tarima. Ua rahi aˈe to matou mǎtaˈu ia haapeapea ia Iehova maoti hoi i ta ratou mau ofai pupuhi.’ E aratai te mǎtaˈu taata i te ofatiraa i te faaroo, e haamau papu râ te mǎtaˈu i te Atua i te hoê taata no te mea tia.
Te faaherehereraa i te ora
16. Eaha tei tauturu ia Noa ia tamau noa i roto i te hoê hororaa tia tau ahuru matahiti i muri aˈe e tae roa ˈtu i te Diluvi, e eaha te faahopearaa no ˈna e to ˈna utuafare?
16 Ua ora o Noa i roto i te mau mahana hopea o te ao na mua ˈˈe i te diluvi. Ua faaoti o Iehova e haamou i te ao ino o taua tau ra no te ino hoi o te taata. I roto râ i taua area taime ra, tei ropu Noa i taua ao ra o tei î i te haavîraa uˈana, te peu tia ore i te pae morare, e te tâuˈa-ore-raa i te hinaaro o te Atua. Noa ˈtu te pororaa a Noa i te parau-tia, “aore roa i ite, e roohia noa ihora ratou e te diluvi, pau roa ˈtura e te diluvi, pau roa ˈtura ratou.” (Mataio 24:39) Aita râ Noa i haaparuparu i te ohipa ta te Atua i tuu i mua ia ˈna. Ua na reira oia “mai ta te Atua i faaue mai ia ˈna ra, o ta ˈna ïa i rave maite.” (Genese 6:22) Eaha te mea i turai ia Noa ia tamau noa i roto i ta ˈna hororaa tae roa ˈtu i te Diluvi? Te pahono ra te Hebera 11:7 e: “No te faaroo hoi to Noa, a faaitehia mai ai oia e te Atua i te mau mea aore â i itea maira, e roohia ihora e te mǎtaˈu.” Ei faahopearaa, ua faaorahia oia e ta ˈna vahine e ta ˈna mau tamaiti e ta ratou mau vahine mai te Diluvi ra.
17. (a) Noa ˈtu e eaha ta te mau taata e rave nei, eaha te tia ia tatou ia rave? (b) No te aha o te feia o te mǎtaˈu ia Iehova te nunaa oaoa mau?
17 Te ora nei tatou i roto i te hoê tau mai to Noa atoa ra te huru i roto e rave rahi mau tuhaa. (Luka 17:26, 27) Te horoa-faahou-hia ra te hoê faaararaa. Te faahiti ra te Apokalupo 14:6, 7 no te hoê melahi o te maue ra na ropu i te reva ma te faaitoito i te mau taata o te mau nunaa e o te mau opu e o te mau reo atoa ia ‘mǎtaˈu i te Atua e ia faahanahana ia ˈna.’ Noa ˈtu e eaha ta te ao e haaati ra ia outou e rave nei, a ara maite i teie mau parau, e i muri iho a faatae atu te titau-manihini-raa ia vetahi ê. Mai ia Noa, a ohipa i roto i te faaroo e a faaite i te mǎtaˈu paieti. Ia na reira outou e nehenehe te reira e aratai i te faaherehereraa o to outou ora e to e rave rahi atu â. A mataitai ai tatou i te mau haamaitairaa fanaˈohia e te feia e mǎtaˈu ra i te Atua mau, e nehenehe noa tatou e farii i te papai salamo faauruahia o tei himene e: “E ao to te taata i mǎtaˈu ia Iehova ra: tei riro roa to ˈna aau i ta ˈna parau.”—Salamo 112:1.
Nafea outou ia pahono mai?
◻ Eaha vetahi mau haamaitairaa faahiahia e noaahia mai i te mǎtaˈuraa i te Atua mau?
◻ Nafea te paari tei aa i roto i te mǎtaˈu paieti ia paruru ia tatou?
◻ No te aha e haafariu ê te mǎtaˈu paieti ia tatou i te ino?
◻ Nafea te mǎtaˈu paieti ia paruru ia tatou i te mǎtaˈu taata?
◻ Eaha te taairaa o te mǎtaˈu paieti i nia i ta tatou mau tiaturiraa no to tatou oraraa no a muri aˈe?
[Hohoˈa i te api 16, 17]
“E ao to te taata i mǎtaˈu ia Iehova ra: tei riro roa to ˈna aau i ta ˈna parau.”—Salamo 112:1