Te hoê nahoa rahi o te feia haamori mau—Nohea mai ratou i te haereraa mai?

“E inaha e feia rahi roa, . . . no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono, e i mua i te Arenio.”—APOKALUPO 7:9.

1. No te aha e mea anaanatae mau â te mau orama i tohuhia i roto i te Apokalupo no tatou i teie nei mahana?

I TE pae hopea o te senekele matamua o to tatou nei tau, ua ite te aposetolo Ioane i te mau orama o te mau tupuraa faahiahia mau ia au i te opuaraa a Iehova. Te tupu ra te tahi o te mau mea ta ˈna i ite orama i teie nei mahana. E tupu te tahi atu i te tau no a muri aˈe. Te haaati ra te reira atoa i te faahopearaa faufaa mau o te opuaraa rahi a Iehova no te faaraa i to ˈna iˈoa i mua i te poieteraa atoa. (Ezekiela 38:23; Apokalupo 4:11; 5:13) Hau atu, te faaô ra te reira i te mau tiaturiraa no te ora o tatou tataitahi. Mea nafea ïa?

2. (a) Eaha ta te aposetolo Ioane i ite i roto i te maharaa o ta ˈna orama? (b) Eaha te mau uiraa no nia i teie orama ta tatou e tuatapapa mai?

² I roto i te maharaa o te mau tuhaa orama a te Apokalupo, ua ite o Ioane i te mau melahi i te tapearaa i te mau mataˈi o te haamouraa ia hope roa “te mau tavini o to tatou Atua” i te tapaohia i nia i to ratou rae. I muri iho ua ite oia i te hoê ohipa anaanatae roa ˈtu â—“e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa,” o tei tahoê no te haamori ia Iehova e no te faatura i ta ˈna Tamaiti. O te mau taata ïa ratou, tei parauhia ia Ioane, o te haere mai mai roto mai i te ati rahi. (Apokalupo 7:1-17) O vai ma tei faataahia mai te mau “tavini o to tatou Atua”? E o vai te ‘nahoa rahi’ o te feia i ora mai i te ati rahi? E vai atoa anei outou i rotopu ia ratou?

O vai “te mau tavini o to tatou Atua”?

3. (a) I roto i te Ioane 10:1-18, mea nafea to Iesu faahohoˈaraa i to ˈna taairaa e ta ˈna mau pǐpǐ? (b) Eaha ta Iesu i haamatara no ta ˈna mau mamoe na roto i to ˈna pohe tusia?

³ Tau maha avaˈe na mua ˈˈe i to ˈna pohe, ua faahiti o Iesu ia ˈna iho mai “te tiai mamoe maitai” e i ta ˈna mau pǐpǐ mai te mau “mamoe” o ta ˈna i pûpû atu i to ˈna ora. Ua faahiti oia ma te taa ê i te mamoe i iteahia mai ia ˈna i roto i te hoê aua mamoe taipe e ua aupuru taa ê oia i muri iho ia ˈna. (Ioane 10:1-18)a Ma te here, ua horoa o Iesu i to ˈna nephe no ta ˈna mau mamoe, ma te pûpû i te faufaa o te hoo i titauhia ia tiamâ mai ratou i te hara e i te pohe.

4. O vai te feia matamua i haaputuhia ei mau mamoe ia au i ta Iesu i parau i ǒ nei?

⁴ Teie râ, na mua ˈˈe a rave ai i te reira, ua haaputuputu o Iesu iho ei Tiai mamoe maitai i te mau pǐpǐ. Ua arataihia te mau taata matamua ia ˈna ra na Ioane Bapetizo, te “tiai opani” o te faahohoˈaraa a Iesu. Ua imi o Iesu i te mau taata o te farii i te ravea ia riro ei melo o te ‘huaai’ tatuhaahia ‘o Aberahama.’ (Genese 22:18; Galatia 3:16, 29) Ua faatupu oia i roto i to ratou mafatu te mauruuru no te Basileia o te raˈi, e ua haapapu oia ia ratou e e haere oia e faaineine i te hoê parahiraa no ratou i roto i te fare o to ˈna Metua i te raˈi ra. (Mataio 13:44-46; Ioane 14:2, 3) Ma te tano roa ua parau oia e: “Mai te itearaa mai o Ioane Bapetizo ra, e tae roa aˈenei i teie nei, te mârôhia nei te basileia o te ao ra, e te titau nei te feia mârô ia noaa i te haru.” (Mataio 11:12) Ua haapapu teie feia i pee ia ˈna no te tapae atu i taua fa ra e tei roto ratou i te aua mamoe ta Iesu i faahiti na.

5. (a) O vai “te mau tavini o to tatou Atua” faahitihia i roto i te Apokalupo 7:3-8? (b) Eaha te mea e faaite ra e e apiti mai e rave rahi atu â i roto i te haamoriraa i te mau ati Iseraela i te pae varua?

⁵ I roto i te Apokalupo 7:3-8, te faaau-atoa-hia ra te feia e tamau ra ma te manuïa i te tapae i taua fa ra mai “te mau tavini o to tatou Atua.” (A hiˈo Petero 1, 2:9, 16.) O te mau ati Iuda i te pae tino noa anei te mau 144 000 i faahitihia i ǒ nei? E mau ati Iuda i te pae tino noa anei te feia e vai ra i roto i te aua mamoe taipe o te faahohoˈaraa a Iesu? Aita roa ˈtu; e mau melo ratou o Iseraela i te pae varua a te Atua, te amui nei ratou paatoa e o te Mesia i roto i te huaai i te pae varua o Aberahama. (Galatia 3:28, 29; 6:16; Apokalupo 14:1, 3) Ma te papu maitai, e tae mai te taime ia naeahia te numera i haamauhia. Eaha ïa to muri iho? Mai ta te Bibilia i tohu, e apiti mai vetahi ê atu—te hoê nahoa rahi o ratou—i teie mau Iseraela i te pae varua no te haamori ia Iehova.—Zekaria 8:23.

Te “mau mamoe ê atu”—E mau kerisetiano no te mau nunaa anei ratou?

6. Eaha te ohipa ta te Ioane 10:16 e haamatara ra?

⁶ I muri aˈe i te faahitiraa i te hoê aua mamoe i roto i te Ioane 10:1-15, ua faaô o Iesu i te tahi atu pǔpǔ i roto i te tupuraa o te mau ohipa, ma te parau e: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” (Ioane 10:16) O vai teie “mau mamoe ê atu”?

7, 8. (a) No te aha e mea hape te manaˈo e e mau kerisetiano no te mau nunaa te mau mamoe ê atu? (b) Eaha te mau tupuraa no nia i te opuaraa a te Atua no te fenua nei e taairaa to te reira e to tatou taaraa e o vai te mau mamoe ê atu?

⁷ Te manaˈo ra te feia tuatapapa o te amuiraa faaroo kerisetiano i te pae rahi e teie mau mamoe ê atu o te mau kerisetiano no te mau nunaa ïa e te feia i roto i te aua mamoe faahitihia i te omuaraa o te mau ati Iuda ïa, te feia i raro aˈe i te faufaa a te Ture, e e haere na toopiti pǔpǔ i nia i te raˈi. Ua fanauhia mai râ o Iesu ei ati Iuda e no to ˈna aiˈa tei raro aˈe ïa oia i te faufaa a te Ture. (Galatia 4:4) Hau atu, te erehia ra i te feia e faariro ra i te mau mamoe ê atu ei mau kerisetiano no te mau nunaa o te haamauruuruhia e te oraraa i te raˈi ra i te haapao i te hoê tuhaa faufaa roa o te opuaraa a te Atua. I to Iehova poieteraa i te mau taata matamua e i to ˈna tuuraa ia ratou i roto i te ô i Edene ra, ua haapapu maitai oia e ta ˈna opuaraa oia hoi ia taatahia te fenua, ia riro te reira atoa ei paradaiso, e ia fanaˈo ta ˈna mau tiai taata i te ora e a muri noa ˈtu—mai te peu noa e e faatura ratou e e auraro ratou i to ratou Poiete.—Genese 1:26-28; 2:15-17; Isaia 45:18.

⁸ I to Adamu hararaa, aita te opuaraa a Iehova i haafifihia. Ua rave te Atua ma te here i te tahi faanahoraa no te huaai a Adamu ia nehenehe ratou e fanaˈo i tei erehia ia Adamu i te haafaufaa. Ua tohu o Iehova e e faatia mai oia i te hoê faaora, te hoê huaai, na roto oia e faufaahia te mau nunaa atoa i te mau haamaitairaa. (Genese 3:15; 22:18) E ere teie parau tǎpǔ te auraa e e afaihia te mau taata maitatai atoa o te fenua i nia i te raˈi. Ua haapii o Iesu i ta ˈna mau pǐpǐ ia pure e: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:9, 10) Aita i maoro roa i to ˈna faahitiraa i te faahohoˈaraa faatiahia i roto i te Ioane 10:1-16, ua faataa o Iesu i ta ˈna mau pǐpǐ e ua farii to ˈna Metua i te hoê noa “nǎnǎ iti” no te horoa ˈtu i te Basileia o te raˈi. (Luka 12:32, 33) No reira ia taio tatou i te faahohoˈaraa a Iesu no nia ia ˈna iho ei Tiai mamoe maitai o te pûpû ra i to ˈna nephe no ta ˈna mau mamoe, e mea hape paha te oreraa e haapao i te rahiraa o te feia ta Iesu i aupuru ma te here, te feia o te riro ei mau taata i nia i te fenua o to ˈna Basileia i te raˈi ra.—Ioane 3:16.

9. Mai te matahiti 1884 mai â, eaha ta te Feia haapii Bibilia i taa no nia i te faataaraa o vai ma te mau mamoe ê atu?

⁹ Mai te matahiti 1884 mai â, ua faahohoˈa te Watch Tower i te mau mamoe ê atu mai te mau taata o te horoahia te ravea ia ora i nia i teie nei fenua i raro aˈe i te mau huru tupuraa o te faatupu i te opuaraa matamua a te Atua. Ua manaˈo teie na Feia haapii Bibilia matamua e vetahi o teie mau mamoe ê atu o te mau taata ïa i ora e i pohe na mua ˈˈe te taviniraa a Iesu i nia i te fenua. Teie râ, aita ratou i taa ma te tano i te tahi mau tuhaa iti. Ei hiˈoraa, ua manaˈo ratou e e tupu te haaputuputuraa o te mau mamoe ê atu i muri aˈe e fanaˈo ai te feia atoa i faatavaihia i ta ratou haamauruururaa no te raˈi. Teie râ, ua faataa ratou i te pae hopea e e ere te mau mamoe ê atu e mau kerisetiano no te mau nunaa noa. Te haamatarahia ra te neheneheraa e riro ei mamoe ê atu i te mau ati Iuda e i te feia no te mau nunaa, te mau taata no te mau nunaa e te mau iri atoa.—A faaau e te Ohipa 10:34, 35.

10. Ia riro mai tatou te feia ta Iesu e faariro mau ra mai ta ˈna mau mamoe ê atu, eaha te mea mau no tatou?

¹⁰ No te faaau i te faataaraa horoahia e Iesu, e tia i te mau mamoe ê atu ia riro ei mau taata, noa ˈtu eaha te iri aore ra te nunaa taata, o te farii ia Iesu Mesia mai te Tiai mamoe maitai. Eaha ïa te auraa? E tia ia ratou ia faatupu i te haehaa e te ineineraa ia arataihia ratou, o te mau huru maitatai hoi te reira o te mamoe. (Salamo 37:11) Mai te itehia no te nǎnǎ iti, e tia ia ratou ia ‘ite i te reo o te tiai mamoe maitai’ e ia ore e vaiiho ia ratou ia arataihia e vetahi ê o te imi ra i te mana i nia ia ratou. (Ioane 10:4; Ioane 2, 9, 10) E tia ia ratou ia haafaufaa i te faufaaraa o te mea ta Iesu i rave na roto i te pûpûraa i to ˈna nephe no ta ˈna mau mamoe e ia faatupu i te faaroo taatoa i roto i taua faanahoraa ra. (Ohipa 4:12) E tia ia ratou ia “faaroo” i te reo o te Tiai mamoe maitai i to ˈna faaueraa ia ratou ia horoa i te hoê taviniraa moˈa ia Iehova noa, ia tamau i te imi na mua i te Basileia, ia faataa ê noa i te ao, e ia faaite i te here faatusia i te tahi e te tahi. (Mataio 4:10; 6:31-33; Ioane 15:12, 13, 19) Te faaau ra anei outou i teie faataaraa o te feia ta Iesu e faariro ra mai ta ˈna mau mamoe ê atu? Te hinaaro ra anei outou ia riro mai? Auê haamaitairaa faufaa roa no te feia atoa e riro mau ra ei mau mamoe ê atu o Iesu!

Te faaturaraa i te mana faatere o te Basileia

11. (a) I roto i te tapao o to ˈna vairaa mai, eaha ta Iesu i parau no nia i te mau mamoe e te mau puaaniho? (b) O vai te mau taeae ta Iesu i faahiti?

¹¹ E rave rahi mau avaˈe i muri aˈe i to ˈna horoaraa i te faahohoˈaraa i nia nei, tei Ierusalema faahou o Iesu. Ia ˈna i parahi i te Mouˈa no Oliveta i nia mai i te hiero, ua horoa oia i ta ˈna mau pǐpǐ te tahi mau haapapuraa o ‘te tapao o to ˈna vairaa mai e te hopea o te faanahoraa o te mau mea.’ (Mataio 24:3) Ua faahiti faahou oia i te haaputuputuraa o te mau mamoe. I rotopu i te tahi atu mau mea, ua parau oia e: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa te mamoe i te puaaniho ra: e e tuu oia i te mamoe i tana rima atau, e te puaaniho i te rima aui.” I roto i teie parabole, ua faaite o Iesu e e haavahia ïa te feia i hutihia mai te ara-maite-raa e te Arii i nia i te niu e mea nafea to ratou faaauraa e ta ˈna mau “taeae.” (Mataio 25:31-46) O vai ma teie mau taeae? O te mau kerisetiano faatavaihia i te varua o ratou ïa te mau ‘tamarii a te Atua.’ O Iesu te Tamaiti matahiapo a te Atua. No reira, e mau taeae o te Mesia ïa ratou. O ratou “te mau tavini o to tatou Atua” faahitihia i roto i te Apokalupo 7:3, te feia i maitihia i ropu i te huitaata no te apiti atu i te Mesia i roto i ta ˈna Basileia o te raˈi.—Roma 8:14-17.

12. No te aha e mea faufaa roa te huru taatiraa o te mau taata e te mau taeae o te Mesia?

¹² E mea faufaa roa te huru faaauraa a vetahi atu â mau taata e teie feia aiˈa o te Basileia. Te hiˈo ra anei outou ia ratou mai ta Iesu Mesia e ta Iehova e hiˈo ra? (Mataio 24:45-47; Tesalonia 2, 2:13) Te ohipa ra te huru haerea o te hoê taata i mua i teie feia faatavaihia i nia ia Iesu Mesia iho e to ˈna Metua, te Arii Mana hope.—Mataio 10:40; 25:34-46.

13. I teihea faito te Feia haapii Bibilia i te matahiti 1884 i te taaraa i te parabole o te mau mamoe e te mau puaaniho?

¹³ I roto i ta ˈna tumu parau no atete 1884, ua haapapu te Pare Tiairaa ma te tano e te mau “mamoe” i roto i teie parabole o te feia ïa tei horoahia i mua ia ratou te tiaturiraa o te ora tia roa i nia i te fenua. Ua taa-atoa-hia e e tupu te parabole ia faatere mai te Mesia mai to ˈna terono hanahana ra i nia i te raˈi. Teie râ, i taua taime ra aita ratou i taa maitai e afea oia e haamata ˈi i te ohipa faataa-ê-raa faataahia i ǒ nei aore ra ehia taime te maororaa.

14. Mea nafea te hoê oreroraa parau i te tairururaa i te matahiti 1923 i te tautururaa i te Feia haapii Bibilia ia haafaufaa e afea te parabole i tohuhia a Iesu e tupu ai?

¹⁴ Teie râ, i te matahiti 1923, i roto i te hoê oreroraa tairururaa, ua haamaramarama o J. F. Rutherford, peretiteni o taua taime ra o te Taiete Watch Tower, i te taime o te tupuraa o te parabole o te mau mamoe e o te mau puaaniho. No te aha? I roto i te hoê tuhaa, no te mea te faaite ra te parabole e e vai â te mau taeae o te Arii—inaha vetahi o ratou—i nia i te fenua. I rotopu i te mau taata, o ta ˈna mau pǐpǐ faatavaihia i te varua anaˈe o te nehenehe e piihia ta ˈna mau taeae. (Hebera 2:10-12) Eita ratou e vai mai i nia i te fenua i te Mileniuma, ma te horoa i te mau taata te ravea ia rave i te maitai no ratou ia au i ta Iesu i faataa na.—Apokalupo 20:6.

15. (a) Eaha te mau haapapuraa o tei tauturu i te Feia haapii Bibilia ia faataa ma te tano i te mau mamoe o te parabole a Iesu? (b) Mea nafea te mau mamoe i te haapapuraa i to ratou mauruuru no te Basileia?

¹⁵ I roto i taua oreroraa parau ra i te matahiti 1923, ua ravehia te hoê tutavaraa no te haapapu i te feia e au i te faataaraa a te Fatu o te mau mamoe e o te mau puaaniho, ua titauhia râ te tahi atu mau tupuraa no te taa na mua ˈˈe a maramarama ˈi te auraa taatoa o te parabole. I te roaraa o te mau matahiti i muri iho, ua faaara mǎrû o Iehova i te ara-maite-raa o ta ˈna mau tavini e teie mau haapapuraa. Ua taa-maitai-hia, i te matahiti 1927, e “te tavini haapao maitai e te paari” o te tino taatoa ïa o te mau kerisetiano faatavaihia i te varua i nia i te fenua; ua haafaufaa-atoa-hia, i te matahiti 1932, te faufaaraa ia taati ma te piri roa ia ˈna iho ma te mǎtaˈu ore e te mau tavini faatavaihia a Iehova, mai ta Ionadaba i rave e o Iehu. (Mataio 24:45; Te mau arii 2, 10:15) I taua taime ra, i nia i te niu o te Apokalupo 22:17, ua faaitoitohia ma te taa ê teie feia e au i te mamoe ia apiti i roto i te tufaraa i te poroi o te Basileia ia vetahi ê. E turai to ratou mauruuru no te Basileia Mesia ia ratou eiaha noa ia haaparare i te hamani maitai taata i te feia faatavaihia a te Fatu ia pûpû râ i to ratou oraraa no Iehova na roto i te Mesia e ia taati ma te piri roa e ta ˈna feia faatavaihia, ma te apiti ma te itoito i roto i te ohipa ta ratou e rave ra. Te rave ra anei outou i te reira? I te feia e na reira ra, e parau te Arii e: “A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te fenua nei ra.” Te vai ra i mua ia ratou te tiaturiraa rahi o te ora mure ore ma te tia roa i nia i te fenua ta te Basileia e faatere.—Mataio 25:34, 46.

Te ‘nahoa rahi’—Te haere ra ratou ihea?

16. (a) Eaha te mau manaˈo hape i vai na i te Feia haapii Bibilia matamua no nia i te faataaraa o vai te feia rahi roa, aore ra te nahoa rahi, o te Apokalupo 7:9? (b) Afea e i nia i teihea niu i tano ai to ratou manaˈo?

¹⁶ I te hoê taime ua tiaturi te mau tavini o Iehova e mea taa ê te feia rahi roa (aore ra, nahoa rahi) o te Apokalupo 7:9, 10 i te mau mamoe ê atu o te Ioane 10:16 e te mau mamoe o te Mataio 25:33. No te mea te parau ra te Bibilia e ‘te tia ra’ ratou ‘i mua i te terono,’ ua manaˈohia e e parahi ratou i nia i te raˈi, eiaha i nia i te mau terono, ma te faatere ei feia aiˈa e o te Mesia, i nia râ i te pitiraa o te parahiraa i mua mai i te terono. Ua faarirohia ratou mai te mau kerisetiano iti aˈe i te haapao maitai, te feia o tei ore i faaite i te hoê huru feruriraa faatusia mau. I te matahiti 1935 ua faatitiaifarohia teie manaˈo.b Ua haapapu te hoê hiˈopoaraa o te Apokalupo 7:9 ma te maramarama o te tahi mau irava mai te Mataio 25:31, 32 e e nehenehe te mau taata i ǒ nei i nia i te fenua e tia “i mua i te terono.” Ua haapapu-atoa-hia e aita to te Atua e piti huru haapao maitai. E tia i te feia atoa e hinaaro ra ia fariihia mai ia tapea noa i te taiva ore ia ˈna.—Mataio 22:37, 38; Luka 16:10.

17, 18. (a) Eaha te tumu o te maraaraa rahi, mai te matahiti 1935 mai â, o te numera o te feia e tiai ra i te ora mure ore i nia i te fenua? (b) I roto i teihea ohipa faufaa roa ta te feia o te nahoa rahi e apiti ra ma te itoito?

¹⁷ No e rave rahi mau matahiti ua faahiti te nunaa o Iehova i te mau parau tǎpǔ a te Atua no nia i te fenua. No te mea ta ratou i tiai ia tupu mai i te mau matahiti 1920, ua poro ratou e “E ore roa te mau mirioni taata e ora ra i teie nei e pohe.” Aita râ ratou i naeahia tau mirioni o tei faufaahia i te mau opuaraa a te Atua no te ora i taua taime ra. I roto i te rahiraa o tei farii i te parau mau, ua ninii mai te varua moˈa i te tiaturiraa o te oraraa i nia i te raˈi. Teie râ, i muri aˈe i te matahiti 1935 iho â râ, ua fa mai te hoê tauiraa tapaohia. E ere te auraa e ua haafaufaa ore Te Pare Tiairaa i te tiaturiraa o te ora mure ore i nia i te fenua. No tau ahuru matahiti ua paraparau te mau tavini o Iehova no nia i te reira e ua imi ratou i te feia e au i te faataaraa a te Bibilia. I te taime râ faataahia e Iehova, ua aratai mai oia i te mau tupuraa e ua faataa mai ratou ia ratou iho.

¹⁸ Te faaite ra te mau tabula o te feia i putuputu mai e no e rave rahi mau matahiti ua amu te rahiraa o te feia i tae mai i te oroa Haamanaˈoraa i te mau taoˈa taipe. I roto râ e 25 matahiti i muri aˈe i te matahiti 1935, ua maraa uˈana te rahiraa feia i tae mai i te oroa Haamanaˈoraa tamatahiti o te pohe o te Mesia hau atu i te hoê hanere taime o te numera o te feia i amu i te oroa. O vai ma teie feia ê atu? O te mau melo ïa o te nahoa rahi. Ma te papu maitai, ua tae te taime o Iehova no te haaputuputu ia ratou e no te faaineine ia ratou no te ora mai mai te ati rahi i mua noa mai. Mai tei tohuhia, ua haere mai ratou “no te mau fenua atoa, e te mau opu atoa, e te mau nunaa atoa, e te mau reo atoa.” (Apokalupo 7:9) Te apiti ra ratou ma te itoito i roto i te ohipa ta Iesu i tohu ia ˈna i parau e: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.”—Mataio 24:14.

[Nota i raro i te api]

Eaha ta outou pahonoraa?

◻ No te aha e mea anaanatae mau â te orama i roto i te Apokalupo pene 7?

◻ No te aha e ere te mau mamoe ê atu o te Ioane 10:16 te mau kerisetiano no te mau nunaa noa?

◻ Eaha te mea mau no te feia e au i te faataaraa a te Bibilia o te mau mamoe ê atu?

◻ Nafea te parabole o te mau mamoe e te mau puaaniho e haamatara ˈi i te faaturaraa no te mana faatere o te Basileia?

◻ Na te aha e faaite e eaha te taime o Iehova e tae mai ai no te haaputuputu i te nahoa rahi o te Apokalupo 7:9?